L'intervento del Presidente Vicario al Congresso di Zoppola
Cjârs Cunfradis, Autoritâts e Amîs,

al è cun grant plasê che us puarti ancje jo, a non de nestre Societât Filologjiche, il plui cordiâl benvignût al Congrès di Sopula, ta cheste biele curnîs di int rivade di dut il Friûl, dal Venit e di Triest. E je une prime volte pal nestri Congrès sociâl, culì a Sopula, une localitât ch’e vîf di storie, di art, di tradizions, di culture, ma ancje di lavôr, di ambient, di nature, un paîs di int dinamiche e laboriose, cu la sô biele fevele furlane, dolce e musicâl, un paîs animât de passion di ducj chei che si impegnin par cheste comunitât. O saludi, in particolâr, i amîs de Associazion “Furlans-Trevisans-Belunês”, simpri cun nô – che vuê però a son vuarfins dal President Mario Secoli, ch’al è scugnût restâ a cjase –, chei di Manià, chei di Aquilee, chei di Cordenons, chei di Orsarie, ma ancje i rapresentants des istituzions, ch’a àn puartât o che nus àn mandât il lôr salût e i rapresentants di altris ents ch’a son culì cun nô.

Cun chest di Sopula dal 2015 o sin rivâts a cuote novantedoi pai Congrès – ancje se la Societât di agns a’nd à di plui, esatamentri novantesîs e al barlume di lontan, ma no masse di lontan, il travuart dal centenari – un apontament aromai tradizionâl par dute la Furlanie, une tradizion simpri gnove e un plasê simpri gnûf chel di cjatâsi cussì, in famee, par cognossi miôr la nestre tiere, par presentâ ce ch’o vin fat, ma ancje par pensâ a ce ch’o vin di fâ. E je une biele sodisfazion jessi rivâts a chest moment dal Congrès, cuant che dutis lis robis a son ladis al so puest, un Congrès ch’al nas une vore prime dal dì che si cjatisi culì: o vin vût lis manifestazions di cheste ultime setemane, impuartantis, ma soredut la redazion dal Numar Unic che, sot de direzion di Pier Carlo Begotti e di Pier Giorgio Sclippa, e à dât il straordenari risultât ch’o larìn ca di pôc a presentâ.

Il salût al Congrès al è ancje il moment che il President al propon une riflession su la situazion dal Friûl di vuê. I ponts ch’o vevi pensât di tocjâ a son doi.

Il prin pont al rivuarde il furlan a scuele, di cualchi an a plen titul materie curricolâr pai nestris fruts. Lis adesions des fameis al insegnament dal furlan, di an in an, a restin altis, par furtune, plui altis di ce che si spietavisi, sul imprin, ma jo mi domandi fin a cuant la situazion e restarà cussì buine. Nol covente jessi esperts di cuistions di scuele par stimâ che il sucès di cheste operazion, e ancje di altris, e je leade a strent a doi fatôrs fondamentâi: la cualitât dal intervent e la sô continuitât. La cualitât e je fondamentâl, si capìs, parcè che no podìn sperâ che il favôr pe introduzion de marilenghe a scuele, che i gjenitôrs a àn dimostrât fin cumò, al resti alt se no rivìn a superâ la precarietât e in cualchi câs l’improvisazion – cun ecezions – de ufierte formative dai singui istitûts. Al contrari, o vin di dediâ une cure particolâr te predisposizion dai percors formatîfs, parcè che dome cussì o confermìn la bontât de sielte di chei che le àn esercitade e o rivìn a recuperâ, disìn cussì, chei che ancjemò no le àn fate. O vin di dimostrâ, cui fats, che il furlan al è un alc in plui, che fâ furlan al è une vore impuartant pai fruts, in tiermins di cressite educative, cognitive, culturâl e personâl. Mi samee, in altris peraulis, ch’o vin di superâ a la svelte la cuistion emotive e di principi (si insegne il furlan a scuele “parcè ch’al è just”) e di passâ a une programazion curicolâr plui mirade e precise (si insegne il furlan a scuele “parcè ch’al conven”).
Par rivâ a chest risultât – valadî l’adesion “resonade” e no “emotive” dai gjenitôrs al furlan a scuele –, moment fondamentâl al è chel de formazion dai insegnants. No dîs nuie dal Centri di documentazion e sperimentazion didatiche de nestre Societât Filologjiche, cu la promozion dai materiâi didatics e de rêt dai insegnants e des scuelis (l’Assessôr Gianni Torrenti al à za dade la sô poie par consolidâ la struture, cul 2016, e di chest lu ringrazii di cûr). La formazion dai insegnant, duncje, al è fatôr fondamentâl pe cualitât de scuele furlane – o, miôr, pe cualitât dal furlan a scuele. La formazion le vin, par dî la veretât, e ancje di bon livel: al è stât inviât in Universitât, in Mai, il cors Lenghe furlane te scuele plurilengâl pai insegnants in servizi (300 oris), cun finanziament de Regjon; al è partît in Filologjiche, di cualchi setemane, ancje il cors di CLIL Lavagne plurilengâl simpri pai insegnants in servizi, cun finanziament dal ARLeF. E i numars a son une vore bogns: pensait che il cors CLIL, in Filologjiche, al conte 150 iscrits, un numar pardabon impuartant, segnâl che la domande de nestre comunitât e je fuarte. Cumò o vin di dâur continuitât a chestis azions, no podìn pensâ di vê fat une operazion una tantum e di jessi za a puest: o vin di garantî il finanziament pai agns ch’a vegnin, prime di dut, e di impegnâsi par mantignî la cualitât de formazion.
Ma nancje chest nol baste. La prioritât des prioritâts, cumò, e je chê di sclarî il status dal insegnant di furlan, lavorant sul cuadri normatîf, ch’al è ancjemò une vore ingherdeât, cjatâ une forme di “abilitazion” al insegnament pes scuelis dal oblic (infanzie, primarie e secondarie), daûr di une valutazion rigorose e precise dai titui, des competencis e des esperiencis acuisidis. Cuant che i mestris e i docents a varan puartât insom il percors di formazion de Universitât (une vore impegnatîf, a son 300 oris!) e nus domandaran cemût spindi chest titul, ce varino di rispuindiur? Cheste e je la domande vere, la sfide che la nestre Regjon e à di frontâ, par dâ stabilitât al furlan a scuele. Chest ur domandìn ai nestris politics.

Il secont argoment ch’o vevi pensât di tocjâ vuê al è chel de autonomie de Regjon. No feveli vulintîr di chest argoment, us dîs la veretât, un discors ch’a fasin dome chei che si proponin di ridusi o di scancelâ cheste autonomie. Ma nô, chi al Congrès de Societât Filologjiche Furlane, o sin ducj a pro de autonomie de Regjon e duncje al è propit dibant discutint. O sai, però, che plui di cualchidun si spiete di sintî un coment, ancje in ocasion di cheste cunvigne, par vie che ogni dì si lei sul gjornâl o si scolte par radio e par television l’intervent di chest politic o di chel inteletuâl ch’a declarin la lôr opinion su l’autonomie, su la macroregjon cul Venit e cul Trentin, su la citât metropolitane di Triest, su la compensazion ch’e varès di vê il Friûl tal câs di une citât metropolitane a Triest, su la gnove articolazion de Regjon e vie indenant.
L’autonomie de regjon. La prime osservazion ch’o fâs mi ven naturâl pensant a un’altre regjon d’Europe, la Catalogne, che propit vuê e je clamade a votâ il so parlament; chestis elezions a passin par jessi “decisivis”, parcè che l’argoment vêr in discussion al è adiriture l’indipendence di chê regjon da la Spagne, un percors ch’al sarès inviât, almancul a disin, se a vincin i partîts catalaniscj. Nissun s’insumie di domandâ l’indipendence chi di nô – no savarès nancje cemût definî cheste prospetive, tes condizions ch’o sin –, ma o volevi dome segnalâ che cualchidun al resone di lâ indenant cul procès di une devoluzion di funzions e di competencis simpri gnovis dal stât centrâl, i catalans (e magari l’indipendence e je dome che une scuse par otignî alc in plui), e nô chi o sin a cirî di resisti e a difindi ce ch’o vin, ch’a son daûr a roseanusal vie, di an in an, cu la diminuzion dai trasferiments. Mi plasarès sintî i nestris politics e i nestris aministradôrs impegnâts tal procès di slargjâ l’autonomie regjonâl, come ch’a àn fat i trentins e i sudtirolês tai ultins sessante agns, pensant par esempli a scuele, universitât, ambient e bens culturâi. Chestis a son lis prioritâts pal nestri teritori, pal Friûl e par Triest, chest al varès di jessi al ordin dal dì dal dibatit politic, no di sigûr il cirî la maniere di baratâ la licuidazion de autonomie regjonâl par otignî un tratament plui favorevul par cheste o par chê altre realtât. Nô, furlans e triestins, o sin fîs di Tiziano Tessitori, il pari de Regjon autonome, e nô chi dentri o sin dôs voltis fîs di Tiziano Tessitori e di cheste Regjon, parcè che Tessitori al è stât ancje un grant President dal nestri Sodalizi. Se no rivìn a fâ scuadre tra Friûl e Triest, par salvâ la Regjon cussì come ch’e je, l’uniche soluzion e je chê di cjatâ une gnove articolazion paritarie dal teritori, e o sotolinei paritarie, là che nissune part e je subordinade a chê altre, lassant finalmentri ognun paron a cjase sô. Se no rivìn a condividi e a gjestî nancje chest procès, tra di nô, anìn pûr, alore, a fâ la macroregjon cul Venit (no crôt propit cul Trentin e tant mancul cun Bolzan) e contentìnsi di vê Udin capitâl de Patrie dal Friûl, come ch’e je stade par secui sot di Vignesie, e lassìn Triest a frontâ di bessole i siei problemis, che di sigûr no son mancul grancj dai nestris, al contrari. Ma chest discors de licuidazion de Regjon almancul lassaitnusal fâ a nô, ch’o vin titul par fâlu: nissun al pues pensâ seriamentri di delegâ la soluzion des nestris cuistions a chei ch’a vegnin di fûr, sperant ch’a fasin il nestri ben. Chei al è miôr ch’a tasin.

O passi a concludi cui ringraziaments a chei ch’a àn lavorât pal bon pro dal nestri Congrès di Sopula. Prime di dut le ringrazii jê, siôr Sindic, e cun jê dute la zonte e il consei comunâl, il nestri Conseîr Claudio Petris, la biblioteche civiche e i uficis, dute la popolazion di Sopula pal bon acet che nus à dât, pe colaborazion te redazion dal Numar Unic, pe disponibilitât a condividi programs e iniziativis ch’a àn compagnade la nestre fieste. Un ringraziament, no formâl, a pre Antonio Buso, ch’al à celebrât la Sante Messe, ae corâl Sante Cecilie, ai reladôrs di cheste zornade dal Congrès, ai components de jurie dal Premi Ciceri, par no dî dal personâl de nestre Societât, il Diretôr Feliciano Medeot, cun Marilena, Daniela, Katia, Alessandra e Elena. Il nestri agrât speciâl al è però pai doi curadôrs dal Numar Unic, Pier Carlo Begotti e Pier Giorgio Sclippa, ch’a àn passât i ultins mês al lavôr in tipografie, e a ducj i colaboradôrs di cheste monografie, un tesaur pal nestri teritori. Une ultime robe. L’an cu ven, pal Congrès numar novantetrê, o varìn un’altre “prime volte”, un altri biel paîs furlan ch’al è timp che nus spiete, il comun di Martignà; a son ancje altris lis localitâts che no sin mai lâts, ma la Societât Filologjiche e à buine memorie e o rivarìn par dut.

Buine fieste a ducj nô!

Federico Vicario
Dean de Societât Filologjiche Furlane
 
Condividi
Links