Il discors dal President ae Fraie de Vierte di Sedean
Cjârs Cunfradis, Autoritâts e Amîs,

al è cun grant plasê che us puarti, a non de Societât Filologjiche Furlane, il plui cordiâl benvignût ae nestre tradizionâl Fraie de Vierte, la fieste di primevere, culì a Sedean, ta cheste biele curnîs di int rivade di dut il Friûl, di Triest e ancje dal Venit. O saludi i sorestants ch’a son chi cun nô e ancje chei ch’a rivin plui tart, impegnâts cumò te scree e te benedizion dal tor di Grediscje, simpri chi dongje. Il nestri agrât ur va a bons. Nicolino Borgo, ch’al à celebrade la Sante Messe, al coro parochiâl e al so mestri, Benigno Moratti, e naturalmentri ae bande “Armonie” che nus à compagnâts fin achì par tacâ lis voris de nestre zornade. I amîs de associazion dai Furlans Trevisans e Belunês vuê purtrop no son, par vie de adunade alpine di Trevîs, ma o vin però chei di Orsarie (grazionis a Renella, come simpri) e chei di Manià. E ancje altris, si capìs.

Cheste Fraie de Vierte dal 2017 e je une Fraie ch’e vîf i moments di simpri, lis relazions, la presentazion dal numar speciâl dal Sot la Nape – une vitrine vierte su dut il teritori e no dome di Sedean, ma ancje di Flaiban e di Merêt, une prime volte assolude di Fraie in condivision tra trê comuns – e dal volum cui Ats de Setemane de culture furlane dal an passât, lis premiazions dai concors, il ricognossiment ai mestris dai cors pratics, il gustâ in compagnie, lis visitis par man tal dulintor dal paîs. Ma la Fraie chi a Sedean al è ancje il moment che si siere un percors di grande ativitât sul teritori, di “mobilitazion” popolâr, si podarès dî, a pro de culture furlane. O vin vivût a partî dai 4 di Mai lis manifestazions de Setemane de culture furlane, la plui impuartant rassegne regjonâl di promozion e di valorizazion de identitât furlane, chest an rivade ae cuarte edizion cul numar, pardabon impuartant, di 121 manifestazions, events, apontaments, cunvignis, conferencis, mostris, visitis, escursions, spetacui teatrâi e musicâi, presentazions di volums, pai grancj e pai piçui, leturis in lenghe furlane. La Setemane de culture si siere vuê cu la Fraie, apont, e usgnot cul concert dai zovins dal USCI regjonâl a Codroip: di lunis o varìn timp di tirâ lis sumis de rassegne, valutâ i risultâts di cheste mobilitazion e viodi ce e cemût miorâ pe edizion dal an cu ven. Cuant che le vin pensade pe prime volte, la Setemane de culture, no podevin savê che l’acet e la partecipazion de int e sarès stade cussì buine: o podevin dome sperâlu. E la prove e je che la Setemane de culture e cres di an in an, cu l’adesion di personis e associazions ch’a cognossin, vivin e trasmetin i valôrs de nestre culture e de nestre identitât, che nus presentin il Friûl e la sô storie, lis sôs lidrîs, il so teritori, la sô art, la sô nature e la sô musiche.
Ta cheste edizion de Setemane de culture o vin consolidât la rêt di rapuarts e di relazions ch’o vin sul teritori e o sin rivâts, come ch’o disevi, a 121 manifestazions in passe 60 comuns, cu la colaborazion di 130 tra associazions, prolocos, grups teatrâi e musicâi, parochiis, cooperativis e altris istituzions. Chest par nô al è un risultât impuartant, o pensi, anzit une vore impuartant, che nus paie dal lavôr ch’o sin daûr a fâ. Parcè ch’o sin al servizi de nestre comunitât regjonâl e o cirìn di interpretâ te maniere miôr une domande di identitât e di unitât, pal Friûl, che salacor no je mai stade cussì fuarte. Cu la partecipazion corâl a cheste rassegne, ma no dome, il mont de culture furlane al ricognòs te Societât Filologjiche il moment di ecuilibri e il pont di riferiment par iniziativis di promozion e di valorizazion de nestre identitât, in dute la regjon, a partî de condivision dai valôrs di fonde dal jessi furlans. Cussì e je nassude l’idee di presentâ la Setemane de culture, un’ocasion par afermâ, une volte di plui, che cheste tiere e à une sô storie e une sô tradizion, un’ocasion, come ch’o ai za dit e ch’o ripet simpri, par dimostrâ che cheste tiere, la nestre tiere, e à un’anime.
Ce che si pues dî, duncje, di cheste Setemane de culture furlane dal 2017. O vin dât fûr une gnove edizion dal diari bilengâl Olmis, une publicazion ch’e compagne di 23 agns i nestris fruts a scuele, o vin vude la scree di mostris e la presentazion di libris, maratonis di leture in lenghe furlane e laboratoris didatics, visitis sul teritori, spetacui teatrâi e musicâi. E o vin dedicât ocasions di memorie a oms e feminis ch’a àn fat grant il nestri Friûl, ch’a son stâts esemplis di passion morâl e ideâl, modei di condote e di dedizion a pro de Piçule Patrie. Cussì al è stât par Tarcisio Petracco, pari de Universitât furlane, par Maria Tore Barbina, studiose di etnografie e di lenghistiche, par pre Domeni Zanier, poete e cultôr de marilenghe, promotôr de straordenarie esperience di Scuele libare furlane, par pre Toni Beline, inteletuâl, scritôr e tradutôr, che nus à regalât la Bibie par furlan, par Pieri Zorut, il nestri plui grant poete dal Votcent, ch’al à dât un contribût fondamentâl par fâ sù la koinè furlane cemût ch’e le cognossìn in dì di vuê, e ancjemò par Giovanni Minut, par Galliano Zof, par pre Zaneto, poete dal popul. 
E no stin dismenteâ là che si cjatìn cumò. Chest teritori di Sedean, di Flaiban e di Merêt al à dât cetant al Friûl. La liste e podarès jessi une vore lungje. Pensìn, par esempli, a Angelo Pittana (Agnul di Spere), scritôr, poete e tradutôr, Angelo Molaro, om di glesie e cronist, Celso Cescutti, poete e inteletuâl, Giovanni Del Degan, om di glesie e insegnant, i doi Someda de Marco, Carlo, storic de art, e Pietro, nodâr, storic e scritôr, Gian Domenico Bertoli, studiôs e archeolic dal Sietcent. Vinars o jerin a ricuardâ pre Gilberto Pressacco, musicolic e inteletuâl, in ocasion dai vincj agns de muart, ca di cualchi minût o scoltarìn un profîl di David Maria Turoldo par cure di bons. Nicolino Borgo. Ducj innomenâts fîs di chest teritori. Par nô, però, Sedean al è ancje, se no soredut, Tiziano Tessitori, om di grandis idealitâts e visions, senadôr de Republiche, pari de Regjon autonome e ancje President de Societât Filologjiche Furlane.
No mancje dal sigûr la bibliografie su la vite e la figure di Tiziano Tessitori, nassût a Sedean ai 13 di Zenâr dal 1895 e muart a Udin ai 19 di Avrîl dal 1973. Al sarès avonde citâ il volum Tiziano Tessitori, curât dal nevôt Michele Meloni, il libri Autonomia per il Friuli  1945-1964 (scrits e discors di Tessitori dâts dongje par cure di Gianfranco Ellero), La figura e l’opera di Tiziano Tessitori, ch’a son i ats de cunvigne inmaneade de Societât Filologjiche in ocasion dai cuindis agns de muart, la biele vôs biografiche dal Nuovo Liruti par cure di Pietro Zovatto, par rivâ al resint Intervista immaginaria a Tiziano Tessitori di Roberto Meroi.
Dopo des scuelis elementârs e i prins studis a Cividât, lu cjatìn tal ‘Seminari arcivescovîl di Udin dal 1909 al 1915, là ch’al à l’ocasion di cognossi e di preseâ l’insegnament di Pio Paschini, storic dal Friûl, dal scritôr Giuseppe Ellero, di Ivan Trinko, di Luigi Pelizzo, vescul di Padue, e di altris ancjemò. Si lauree in jurisprudence a Urbino e al è atîf, cun passion, in associazions tant che Scuola cattolica e Azione cattolica. Dal 1945 al fonde l’Associazion pe autonomie furlane, un moviment che si bat pal ricognossiment dal dirit naturâl dal popul furlan al autoguvier. E ta chel 1945 Tessitori al è ancje nomenât tra i components dal gnûf Consei de Societât Filologjiche, votât a San Denêl, il Congrès de elezion a President di Michele Gortani, il Congrès ch’al fâs bon l’ordin dal dì al comant aleât pe integritât teritoriâl de regjon furlane – in particolâr par mantignî il Friûl gurizan cu l’Italie. La sô presince e je costant ai apontaments istituzionâi de Societât e propit Tessitori al larà a cjapâ sù la Presidence dal Ent Friûl tal Mont, ch’al jere stât prefigurât tal Congrès dal 1951 di Gradiscje e formalizât dal Consei di Presidence de Societât dal 1953. Cun Tiziano Tessitori President o cjatìn, tal gnûf Ent, i Vicepresidents Mario Digiannantonio par Gurize e Eugenio Morra par Udin, ma ancje altris nons impuartants dal Friûl di chel timp, Alfredo Berzanti, Ernesto Piemonte, Ottavio Valerio, Oscar Luzzatto, Chino Ermacora, Cesare Malattia e altris ancjemò.
Al Congrès di Pordenon dal 1953, ai 4 di Otubar, Tessitori al ten la prolusion uficiâl e al sosten lis buinis resons de Societât no dome te azion di promozion de identitât e de lenghe furlane, ma ancje par oponisi a chei che no crodin ae istituzion di une regjon furlane autonome. E cheste linie di azion e risulte ancjemò plui fuarte cul 1954, cuant che Tessitori al va a cjapâ sù ancje la Presidence de Societât Filologjiche: di chel moment al sarà impegnât a rindi la Societât simpri di plui pont di riferiment dal mont de culture furlane. No dome di politiche culturâl si ocupe Tessitori, però, ma ancje di cuistions plui pratichis, resonant di iniziativis di promozion dal teritori, dai rapuarts cui cusins ladins di Gardene, Fasse e Badie, dal ricuart dai furlans benemerits (dal 1955 si fevele, par esempli, di Bindo Chiurlo e di Ugo Pellis), de colaborazion cun Friûl tal Mont, dai spazis de biblioteche sociâl e de miserie dai finanziaments publics.
Tal cors de sô Presidence, ch’e dure fintremai al 1963, duncje par nûf agns, Tessitori al ten naturalmentri plui di un discors. Dal 1957, par esempli, al Congrès di Cormons al fevele di “Vite e problemis dal Friûl”, confermant la sô vision di un Friûl unît e solidâl, par superâ lis divisions e valorizâ lis tradizions dal popul. Dopo di lui a cjapin la peraule, in chê cunvigne, pre Tita Falzari, plevan di Dolegne, su l’introduzion dal furlan a scuele, pre Domeni Zanier, ch’al fâs un resocont dai prins trê agns de azion di Scuele libare furlane, e po ancjemò pre Checo Placereani e altris socios e colaboradôrs. A Dimpeç, pal Congrès dal 1960, Tessitori al torne su la mission de Filologjiche e al propon di istituî une Cjase de furlanetât, là ch’a vedin dimore dutis lis istituzions culturâls furlanis – e cheste Cjase cumò le vin, a Palaç Mantiche, Cjase ch’e dà acet no dome ae Filologjiche, ma ancje ae Deputazion di Storie Patrie, ae Academie di Udin, ae Associazion teatrâl furlane, ai Amîs dai Museos, al Centro di Toponomastiche furlane e al Ordin dai gjornaliscj.
Tessitori, dutcâs, al capìs che dentri de Filologjiche a àn di stâ adun, in armonie, lis sôs dôs animis tradizionâls, chê popolâr e chê, clamìnle cussì, academiche: divulgazion, comunicazion e promozion de identitât furlane, di une bande, e studis e ricercjis, di chê altre. Al è fondamentâl il rapuart cu la comunitât, parcè che dome cussì la Filologjiche e rive a incidi te societât furlane, ma al è ancjetant fondamentâl ocupâsi dal progrès dai studis regjonâi, al pense Tessitori, ch’a viodin la Filologjiche uniche istituzion a chel risultât realmentri e esclusivamentri avodade. Ae Assemblee sociâl dai 25 di Fevrâr dal 1973 – un pâr di mês prime di murî – o cjatìn l’ultin riferiment a Tessitori tai verbâi uficiâi dal Sodalizi, cu la sô conferme tai probivîrs.
Une lungje stagjon di responsabilitât personâl e di azion – trente agns – e je stade duncje chê di Tiziano Tessitori in Filologjiche, a segnâ grandis trasformazions te nestre comunitât regjonâl e tes sôs istituzions. No si pues dî che nol sedi stât une figure di grant atrat e un grant President, ispirât di saldis idealitâts e valôrs fuarts, dal sigûr impegnât in batais duris e impuartantis, ma ch’al à podût zovâsi ancje de colaborazion di tancj di lôr ch’a àn lavorât par fâ de Societât Filologjiche l’ent culturâl di riferiment dal nestri Friûl. E ducj nô, ch’o sin clamâts a dâ un doman a chest Istitût, i vin agrât ae tiere di Sedean, che nusal à donât, chest so fi, e no podìn che fâ nestri l’apel che Tessitori al faseve e che dispès o ricuardi:

“Ducj i furlans di bon judizi a volaran fâsi dongje ae Societât Filologjiche Furlane, par dâi une vite prosperose e feconde pal ben de Piçule Patrie.”

Cun chestis peraulis di Tessitori o voi a sierâ il gno intervent di salût, no prime però di vê ringraziât di cûr ducj chei che si son spindûts par pensâ e par stâ daûr a lis manifestazions de Setemane de culture furlane, a chei ch’a àn partecipât tant che reladôrs, atôrs, coriscj, letôrs, vuidis, moderadôrs, tecnics, ai colaboradôrs e ai dipendents de Societât Filologjiche Furlane (a lis nestris impiegadis, al Diretôr, ai fantats dal Servizi civîl), ai ents publics e ai privâts, lis associazions e lis prolocos, i comuns, lis Provinciis, la Regjon, lis Fondazions, lis Bancjis di Credit Cooperatîf, ducj chei ch’a àn decidût di dâ une man, in formis diviersis, al bon pro di cheste rassegne. La Setemane si siere cun cheste Fraie de Vierte e cul conciert che usgnot o varìn a Codroip, ch’o sin ducj invidâts a partecipâ. O ringrazii i sindics di Sedean, di Flaiban e di Merêt pal acet che nus àn dât tes lôr comunitâts, i colaboradôrs dal numar speciâl dal Sot la Nape dedicât al nestri teritori e dal volum dai ats de Setemane de culture furlane dal an passât, che i doi curadôrs e plui di cualchi autôr a son chi cun nô. O sieri ricuardant l’apontament dal Congrès sociâl di Mueç, pe prime volte ta chê localitât, l’ultime domenie di Setembar, che di passe un an il comitât di redazion al è za sot pe redazion dal Numar Unic. Un Congrès ch’o sês ducj invidâts a vignî, naturalmentri. Un ringraziament duncje ai nestris volontaris, ai mestris dai cors pratics di lenghe e culture furlane, ai docents dai cors di formazion par insegnants, a ducj voaltris pe vuestre partecipazion. Buine Fraie de Vierte e buine zornade in famee a ducj nô!

Federico Vicario
President de Societât Filologjiche Furlane

 
Condividi
Links