• Il pont di riferiment pe scuele furlane
Centri di documentazion ricercje e sperimentazion didatiche pe scuele furlane
Il pont di riferiment pai insegnants di lenghe furlane.
Il Centri di documentazion ricercje e sperimentazion didatiche pe scuele furlane (Docuscuele) al vûl jessi un pont di riferiment par ducj i insegnants di lenghe furlane. 

Docuscuele al è un progjet inmaneât de Societât Filologjiche Furlane inte suaze di une convenzion cu la Agjenzie Regjonâl pe Lenghe Furlane – ARLeF, cul jutori de Region Autonome Friûl Vignesie Julie e la colaborazion dal Ufici Scolastic Regjonâl pal Friûl Vignesie Julie


Docuscuele al lavore daûr cuatri direzions operativis:
  1. la documentazion: racuelte di materiâi, progjets, publicazions su la didatiche in/di lenghe furlane 
  2. la formazion: ativitâts didatichis tes scuelis, percors di inzornament pai insegnants 
  3. la informazion: incuintris e difusion di materiâi par insegnants, arlêfs e fameis; gjestion di un sît internet e di un servizi di newsletter
  4. la produzion e distribuzion di materiâi didatics pe scuele furlane.  
 
L’intindiment al è chel di:
  • fâ cognossi e fâ doprâ lis “buinis pratichis” metudis adun di insegnants e professioniscj;
  • slargjâ simpri di plui lis esperiencis inovativis 
  • inmaneâ une rêt di insegnants che a puedin miorâ tal timp la cualitât dai progjets pal furlan
  • indreçâ i insegnants viers di une formazion continue;
  • indreçâ lis fameis dai arlêfs viers di une sielte consapevule dal furlan a scuele.

Docuscuele al è a disposizion dai insegnants, dai arlêfs e des fameis.  

Docuscuele al è li de Biblioteche de Societât Filologjiche (vie Manin 18, Udin) dulà che za di agns si è metût adun un piçul tesaur di materiâi, libris e progjets cun passe un miâr di documents za a disposizion: la ambizion e je chê di fâ cressi une vore cheste racuelte cul jutori dai insegnants e di dut il mont de scuele furlane che a volaran meti a disposizion lis lôr competencis e la lôr creativitât. 

Lis ativitâts di Docuscuele a son coordenadis di un Comitât Tecnic formât di:
Walter Tomada (President)
Elisa Mengato
Patrizia Pavatti
Rosalba Perini
Donato Toffoli


Par informazions:
tel. +39 0432 501598 int. 5
info@scuelefurlane.it

Fâs cognossi
Leams