La identitât dai teritoris e va simpri garantide
E je passade juste cualchi setemane di cuant che inte Cjamare dai Deputâts taliane al è sucedût chel grant davoi su la votazion pe gnove leç eletorâl che si à vût sintût su ducj i gjornâi e telegjornâi.
Come cualchidun al à fat justementri notâ, al è il câs di ricuardâ che l’acuardi su la leç eletorâl al è saltât propit suntun articul indulà che a jerin proviodudis normis di pueste pal Trentin e pal Tirôl di misdì pe elezion dai parlamentârs di chês dôs provinciis autonomis: in sumis, si voleve tirâ vie la norme pensade par tutelâ la rapresentance de comunitât lenghistiche todescje.
Chest nus fâs pensâ a cetant che il Stât talian al à inmò di cjapâ at dal test de Costituzion dal 1948: se a son normis di pueste pe tutele des minorancis lenghistichis, sedi chês nazionâls (come la todescje, la slovene e la francese) o lis comunitâts regjonâls (come chê furlane e sarde che a son lis plui numerosis e, di fat, a son maiorance in Friûl e in Sardegne), a àn di jessi normis di pueste ancje pe elezion dai lôr rapresentants tal Parlament. No je une cuistion di tutele legâl o ben di ricognossiment internazionâl, e je une cuistion di principi!
Al è interessant tornâ a viodi cemût che il concet di tutele e rapresentance tal Parlament nol è stât considerât te storie de Republiche Taliane, in particolâr pal Friûl e pe nestre Regjon.
Il test unic su lis leçs pe elezion de Cjamare dal 1957 al divideve il teritori dal stât talian in circoscrizions: di chestis, la XI e cjapave dentri lis provinciis di Gurize, Udin (e dopo ancje Pordenon) e chê di Belum; la XXXII dute la provincie di Triest. Il sisteme di ripartizion dai seçs al jere proporzionâl cu la pussibilitât pal eletôr di esprimi preferencis.
Po cu la stagjon dai referendum tai prins agns Novante dal secul passât (si ricuardaiso des bataiis di Mario Segni?) tal 1993 il sisteme al jere cambiât e si jere introdusût, sei ta la Cjamare che tal Senât, un sisteme coerent, cu la leç proponude di Sergio Mattarella: pe Cjamare, la Regjon e je stade metude adun intune uniche circoscrizion IX “Friuli Venezia Giulia”, cun 10 elets in coleçs indulà che al passave il plui votât e 3 elets cul sisteme proporzionâl.
In timps plui resints, o sin tal 2006, altri “ribalton” des leçs e si torne a un sisteme proporzionâl pe Cjamare, ma cence la pussibilitât di esprimi preferencis: un sisteme che al è stât nomenât “porcellum” (cun dut il rispiet par chê puare bestie).
La plui resinte, clamade “Italicum”, e je dal 2015 che e sdrume la nestre regjon in doi coleçs ch’a metin dongje un Triest cun Gurize, dute la Basse furlane, Cividât e po sù fin a Tarvis; chel altri ce ch’al reste de Provincie di Udin cun dute la Provincie di Pordenon (po cualchidun al varès ancje di spiegânus ce che àn in comun Tarvis cun Monfalcon o Mugle cun Prissinins). Ancje se e je stade in part çoncjade de Cort Costituzionâl, il sisteme dai doi coleçs al è inmò in vore.
E je vere che il sisteme eletorâl al varès di garantî sei la rapresentativitât di diviersis ideis e propuestis politichis e ancje la governabilitât dal Stât, ma al varès ancje di di garantî la rapresentance dai teritoris e des particolaritâts (soredut lenghistichis) presintis su chel teritori.
Pal stes resonament, la presince de minorance slovene tal Parlament e à di jessi garantide par principi daûr di regulis definidis e no su la fonde di un acuardi jenfri i rapresentants de minorance e un partît.
Si à di ricuardâ che il numar di deputâts mandâts a Rome dal Friûl e di Triest al è talmenti piçul (13 su di un totâl di 630 deputâts) che nol pues dal sigûr meti in dubit la guviernabilitât dal Stât. E il stes resonament al vâl ancje pes altris circoscrizions indulà che a son presintis minorancis lenghistichis.
A son passâts juste 70 agns de aprovazion da la specialitât de nestre Regjon (che e cole juste ai 27 di Jugn) e de Costituzion de Republiche taliane, ma il Parlament nol à inmò normât la rapresentance di pueste di chescj teritoris. No saressie ancje ore?


Feliciano Medeot
«Messaggero Veneto», 20.06.2017

 
Fâs cognossi
Leams