• Produzion didatiche par furlan
Esperiencis didatichis
La Societât Filologjiche Furlane
e promôf la racuelte dai materiâi prodots des scuelis pal
Centri di ricercje e documentazion
pe scuele furlane
Dopo fatis buinis lis leçs di tutele, la atenzion dai insegnants pe lenghe e pe culture furlane e je cressude une vore. In gracie di chest a son stâts prodots cetancj di sussidis didatics, publicazions e oparis multimediâls su la lenghe, sul teritori, su la storie e su lis tradizions culturâls dal Friûl. Cheste produzion e je cressude cence padin, sedi in cualitât che in cuantitât, massime tai ultins dîs agns. La atenzion de Societât Filologjiche Furlane pal mont de scuele e je ben cognossude. La Societât, di fat, in gracie de sô ativitât continuative ta chest setôr e pues vantâsi di vê une tradizion une vore lungje te racuelte dal materiâl che al ven prodot dal mont scuelastic regjonâl. Cheste ativitât di documentazion, tai ultins timps, e à puartât a une serie di ricercjis curadis di Lucio Peressi:
La recente produzione didattica per la Scuola friulana (pai agns 1967-1986)
• Guida Bibliografica per la Scuola friulana (1987-1995)
• Gnove produzion pe Scuele furlane (1995-2002)
• Gnove produzion pe Scuele furlane - Guide bibliografiche dai materiâi didatics (2003-2006).


Il probleme plui grant, cun rivuart ai struments e ai materiâi pe scuele furlane, nol è chel de lôr produzion (che par solit si fâs inte suaze di un progjet didatic promovût di une scuele o di une rêt di scuelis), ma chel de lôr distribuzion. Cuant che si sierin i progjets didatics, chescj struments a àn une difusion avonde limitade, che e compromet la pussibilitât di doprâju in altris contescj scuelastics. Par chest motîf a son za agns che la Societât Filologjiche si impegne a tirâ dongje chescj materiâi, che a vegnin conservâts intune sezion speciâl de sô Biblioteche e che a rapresentin la fonde dal Centri di ricercje e documentazion pe scuele furlane. La finalitât di cheste racuelte e je prin di dut chê di conservâ i materiâi prodots de scuele furlane, par vie che a riscjin di jessi sparniçâts e di lâ pierdûts. Une altre finalitât, no mancul impuartante, e je chê di meti chestis oparis a disposizion ancje di altris insegnants, che a puedin cjatâ modei e ispirazions par svilupâ i lôr programs scuelastics. La Societât si è impegnade a cirî fûr il materiâl di interès, massime domandantjural ai referents dai progjets.

La produzion didatiche: materiâi in marilenghe de scuele furlane

    • Produzion didatiche par furlan
    • Produzion didatiche par furlan
    • Produzion didatiche par ladin
Ore presint i titui che a son stâts metûts adun a son 750. Chest numar nol cjape dentri dome i lavôrs che a son stâts prodots dai Istitûts scuelastics te suaze di progjets di lenghe e di culture furlane, ma ancje la produzion editoriâl in marilenghe dedicade ai fruts e ai fantats che e ven distribuide comercialmentri. L’obietîf a lungje scjadince al è chel di meti in pîts une rêt plui grande che e promovi 1) la racuelte di dutis lis publicazions fatis de scuele furlane e pe scuele furlane su diviers supuarts (volums su cjarte, programs di aplicazion informatiche), ancje midiant de creazion di une bancje di dâts informatiche e 2) la produzion e distribuzion di sussidis didatics pe scuele furlane par rivâ a inviâ une rêt di scambi tra dutis lis scuelis dal Friûl.
L’invît, duncje, a ducj i Dirigjents scuelastics e ai insegnants al è chel di mandâi ae Filologjiche ducj i lavôrs che a son stâts fats vie pal an te suaze de ativitât didatiche in lenghe furlane. In chest mût altris docents a podaran cjatâ ideis gnovis e imprescj gnûfs par insegnâ il furlan tes scuelis, ma si judarà ancje in maniere fative a meti in pîts un Centri di ricercje e documentazion pe scuele furlane.

Fâs cognossi
Leams