• Setemane de culture furlane
Setemane de culture furlane
Il Friûl si spiegle te sô storie, tai oms che a lu àn onorât, tes istituzions ch’a puartin indevant i valôrs de sô culture e de sô identitât

Di cualchi an incà la Societât Filologjiche Furlane e inmanee, tal mês di Mai, la Setemane de culture furlane / Settimana della cultura friulana, une nudride schirie di events e di manifestazions pe promozion dal patrimoni storic, lenghistic e artistic de Piçule Patrie.

L’iniziative e cjape dentri lis diviersis realtâts associativis de regjon, intune propueste culturâl uniche e organiche, cun chê di favorî la creazion di sinergjiis progjetuâls e operativis.

La cuinte edizion si è tignude dai 10 ai 20 di Mai dal 2018 cun plui di 130 manifestazions in cetantis localitâts dal Friûl e no dome, cjapant dentri lis comunitâts e lis associazions locâls, studiôs e apassionâts cultôrs di storie, tradizions, lenghe e leteradure, art e musiche furlane.

La Setemane de culture furlane e je stade patrocinade dal Ministeri dai Bens e des Ativitâts Culturâls e dal Turisim, de Regjon Friûl Vignesie Julie e dal Consei Regjonâl, di Turismo FVG, dai comuns di Gurize, Pordenon, Udin e atris 59 comuns, e des Fondazions Friuli e CARIGO.

A àn patrocinât la rassegne ancje: Universitât dal Friûl, Ufici Scuelastic Regjonâl dal Friûl Vignesie Julie, ARLeF (Agjenzie Regjonâl pe Lenghe Furlane), AICI (Associazion des istituzions di culture italianis), Comitât Regjonâl dal Friûl Vignesie Julie de Union Nazionâl des Pro Loco d'Italie, ANCI Friûl Vignesie Julie e Ent Friûl tal Mont.

Inte edizion dal 2018 a son stâts in dut 130 events: 21 conferencis e cunvignis, 32 incuintris e presentazions editoriâls, 16 visitis vuidadis e mostris, 20 spetacui e concierts, 41 apontaments pai fruts.

A àn colaborât 80 associazions, proloco, parochiis, centri culturâi, grups corâi e teatrâi.

La rassegne stampe de Setemane de culture furlane 2018 e sarà publicade in curt.



La Setemane de culture furlane e cjape dentri une biele schirie di iniziativis di gjenar diferent, che si tegnin in dute la regjon e ancje fûr: cunvignis, incuintris, conferencis, mostris, visitis vuidadis, concierts e spetacui
    • Buri, Fraie de Vierte
    • Cjistiel di Davian, Conversazions di art
    • Munistîr di Aquilee, visite al Museu Paleocristian
    • Pordenon, cunvigne su "Il domani degli archivi in Friuli"
    • Porpêt, "Cjase di planure" dedicât a Gina Marpillero
    • Romans dal Lusinç, esibizion dal Ensemble d'Anjou
    • San Vît dal Tiliment, Sale consiliâr di Palaç Rota
    • Spilimberc, "Cjantutis e vilotis" gnovis produzions corâls in lenghe furlane
    • Vençon, visite ae glesie di Sante Luzie
Dopo dai ats des edizions 2014, 2015 e 2016, cul titul Cultura in Friuli a son stâts presentâts i ats de edizion 2017 inte suaze de Fraie de vierte che e je stade ospitade dal comun di Budoie domenie ai 20 di Mai dal 2018.
Cualchi moment de cuarte edizion de Setemane de culture furlane che si è tignude, 4-14 di Mai dal 2017
    • Codroip, Coro Giovanile Regionale FVG
    • Cuar di Rosacis, mostre su "Friuli del vino"
    • Rosacis, cunvigne su "Intorno a Pietro Zorutti"
    • Rualp, cunvigne su "Lis peraulis di pre Antoni"
    • San Pieri dal Tiritori, ricostruzion di un ospedâl di cjamp de Grande Vuere
    • San Zorç da la Richinvelde, cunvigne su "Tarcisio Petracco, un eroe friulano"
    • Sedean, Fraie de Vierte
    • Udin, incuintri "Furlanis letteratura al femminile"
    • Vençon, visite al domo
Fâs cognossi
Leams