• Front
Palaç Mantica
Palaç dal secul XVI in vie Manin,
tal Borc di San Bartolomio, dongje
di puarte Manin e dal tierç cercli
di muris di Udin.
La sede di Udin de Societât Filologjiche Furlane e je tal Palaç Mantica, une dimore udinese dal secul XVI. Al è al numar 18 di vie Manin, in Borc di San Bartolomio, dongje de puarte Manin, che e faseve part dal tierç cercli di muris di Udin. Tal 1492 Nicolò Vanni Onesti i vendè il palaç ae famee Filettini. Tal 1543, po, i Filettini i passarin la proprietât de cjase a Giuseppe Manin. Cualchi an dopo, tal 1560, sô fie Faustina i puartà in dote il palaç a Pietro Mantica. Al fo cussì che il palaç al deventà proprietât di une famee lombarde che e jere rivade in Friûl cui Torians. I gnûfs parons a rinovarin architetonicamentri il palaç e i derin l’aspiet che si pues amirâ in dì di vuê. L’edifici al passà in ereditât di une gjenerazion a chê altre de famee di Nicolò Mantica, fin che Emilia, la sô ultime dissendente, tal 1890 sui maridà cul cont Andrea Caratti e i lassà il palaç a sô fie Maria Teresa, che tal 1966 jal vendè ae Filologjiche.

Salis di Palaç Mantica

    • <!--01-->Segretarie
    • <!--02-->Sale de Biblioteche cul sofit di trâfs di len
    • <!--03-->Particolâr dal sofit de biblioteche di trâfs di len
    • <!--04-->Scjale che puarte al salon d'onôr
    • <!--05-->Salon d'onôr cul paviment in semenât venezian
    • <!--06--> Sale de presidence
Dopo dal taramot dal 1976, si invià une prime fase di restaur dal Palaç Mantica, che e finì tal 1986 e  che e fasè saltâ fûr lis olmis di une storie une vore interessante. Di fat, la sede de Societât Filologjiche e à conservât la stesse struture che a vevin volût i Mantica te seconde metât dal Cinccent. La part architetonicamentri plui preseade e je la façade dal secul XVI, che e je elegante e suturne tal stes timp. Al prin plan si viôt une pentafore cuntun puiulut par bande e, tal mieç, une balustrade a fîl dal mûr. Propit sot de balustrade al è il rilêf de Madone cul Bambin e cherubins,  opare di Carlo da Carona, fate tor dal 1520. Dentri dal palaç a son conservâts framents di afrescs de fin dal Cinccent. Simpri dal secul XVI al è ancje un sofit cun trâfs a viste e cantinelis. Lis decorazions in stîl Chinoiserie a son de fin dal Sietcent e i afrescs des salis dal prin plan a son dal Votcent.
Tal 2009 si à inviât une gnove fase di restaur e di manutenzion straordenarie dal palaç, par fâlu deventâ plui funzionâl e par recuperâ spazis pe biblioteche de societât. Intant di chescj intervents, tal mês di Lui dal 2009 a son stâts cjatâts reperts de ete protostoriche: a son saltâts fûr rescj dal agger dal cjastilîr di Udin (ven a stâi dal rivâl di tiere che al difindeve il paîs). Chescj rescj si puedin datâ de Ultime Ete dal Bronç (1400 p.d.C.), ma si à cjatât elements che a palesin che cheste zone e jere frecuentade za te Ete Miezane dal Bronç, ven a stâi tor dal 1700 p.d.C..
In plui dal agger dal cjastilîr, in gracie di chescj lavôrs si à podût cjatâ e valorizâ ancje une stanzie cul sofit a volt, fate in modon e clap, e une part des fondis dal edifici de Basse Ete di Mieç che al jere prime dal palaç di cumò.

Particolârs
dal plan in tiere

    • <!--01-->Sale tal plan in tiere cun sofit a volte
    • <!--02-->Locâl cun cuvierture a volte
    • <!--03-->Mûrs di epoche medievâl

Bibliografie su la storie dal palaç:

Bergamini, G. / Bartolini, E. / Sereni, L. 1983. Raccontare Udine: vicende di case e palazzi. Udine, Istituto per l'Enciclopedia del Friuli Venezia Giulia: 288-293.

Della Porta, G.B. 1984. Memorie su le antiche case di Udine (a cura di V. Masutti). Udine, Istituto per l'Enciclopedia del Friuli Venezia Giulia: civico 1671.

Appi, R. 1984. Cronaca di un acquisto. "Sot la Nape", 36, 2-3:6-7.

Bergamini, G. / Sereni, L. 1984. Palazzo Mantica: cenni di storia. "Sot la Nape", 36, 2-3:8-12.
AA.VV. 1986. La Filologica è ritornata a Palazzo Mantica. "Sot la Nape", 38, 1: 5-20.

Nicoloso Ciceri, A. / Del Basso, G. 1987. Ancora su Palazzo Mantica. "Sot la Nape" 39, 4: 5-12.

Pastres, P. / Sclippa, P.G. (a cura di) 2008. Tesori della Società Filologica Friulana. Udine, Società Filologica Friulana.

di Brazzà, R. 2013. Il recupero di Palazzo Mantica. "Sot la Nape" 65, 1-2: 134-138.

Fâs cognossi
Leams