• Particolârs de tessare d'associazion agns Vincj
Statût e Regolament
"La Societât Filologjiche Furlane a sostente il studi, la cognossince
e la cussience dai problemis culturâi dal Friûl ...."

Art. 1 dal Statût.

STATÛT de SOCIETÂT FILOLOGJICHE FURLANE
Fat bon de Assemblee Straordenarie dai Socis ai 23 di Frevrâr dal 2003



Titul I: SÎT E FINALITÂTS

ART. 1 - La Societât Filologjiche Furlane «G. I. Ascoli», nassude a Gurize ai 23 di novembar dal 1919, deventade Ent Morâl cun R. D. dal 7 di avost dal 1936, e je logade a Udin. Sôs finalitâts a son: sostentâ e slargjâ l’ûs de lenghe furlane; la difese e l’invaloriment de minorance lenghistiche furlane; il studi, la cognossince e la cussience dai problemis culturâi dal Friûl tal cjamp de lenghe, de filologjìe, de leteradure, dal insegnament, de formazion culturâl e professionâl, de storie, de art, de musiche e dal spetacul, des arts e des tradizions popolârs; il studi, il manteniment, la sistemazion e l’invaloriment di bens culturâi di podê movi o ben stabii, sevi materiâi sevi no materiâi, che a parferissin un ciert interès lenghistic, architetonic, artistic, storic, archelogjic, etnografic, museâl, sientific, bibliografic e archivistic, ancje par che ducj a puedin gjòldint; sostentâ la cognossince des lenghis e des culturis minoritariis, tignudis cun di plui tant che mieç par sigurâ la pâs tal mont e la amicizie tra i popui.
La Societât Filologjiche Furlane no à fins di bêçs, no jentre cu la pulitiche e tant mancul cui partîts.

ART. 2 - Par intivâ lis sôs finalitâts, la Societât Filologjiche Furlane:
1.   e previôt, e met in program e e puarte indenant, tal cjamp de instruzion, cors e seminaris di formazion e inzornament culturâl e professionâl de lenghe, de filologjìe, de leteradure, de didatiche, de storie, des arts, des tradizions popolârs e in gjenerâl de culture furlane pal personâl, docent e no docent, des scuelis di cualsisei ordin e grât, pai dipendents di ents, associazions e par ducj chei che a son seneôs di imparâ o ben cognossi miôr la lenghe e la culture furlane;
2.  e previôt, e met in program e e sostente il studi, il manteniment, la sistemazion e l’invaloriment di bens culturâi;
3.  e ministre, fasint in mût che ducj a puedin gjòldint, i siei bens culturâi stabii o ben di podê movi, ancje no materiâi, e chei di altris sogjets, dant une man o pûr servizis ancje a ents e isntituzions ativis intal setôr;
4.  e da un jutori e e cjape part in progjets, iniziativis e ativitâts parie cun instituzions di ricercje nazionâls e internazionâls;
5.  e previôt, e met in program e e puarte indenant cors e seminaris di formazion e specializazion di nivel universitari e insieme cun instituzions scuelastichis, universitaris, ents di formazion sevi publics sevi privâts;
6.  si zove di sôs publicazions periodichis e no periodichis, di caratar sientific, divulgatîf, popolâr, scuelastic;
7.  e da borsis di studi, e inmanee concors, e promôf cunvignis, congrès, viaçs di studi e cors culturâi;
8.  e instituìs, e met adun e e rincure l’album dai insegnants di lenghe e culture furlane;
9.  e instituìs, e met adun e e rincure l’album dai tradutôrs in lenghe furlane;
10.  e da poie e assistence a associazions, ents o ben circui culturâi, grops folcloristics, musicâi, corâi, teatrâi, filodramatics.
Par intivâ i fins sociâi, la Societât Filologjiche Furlane e podarà zovâsi di cualsisei mieç bon o ancje dome comut par meti in pratiche lis propris finalitâts statutariis, comprindudis lis ativitâts comerciâls, pûr che no si trati ni dome di chês ni soredut di chês, e tignint cont, dut câs, dal fat che eventuâls ativitâts di cheste fate no podaran mai jessi decisivis pe direte realizazion dai fins prins puartâts in chest statût; in ogni mût, i vuadagns di chestis ativitâts a laran a insiorâ il patrimoni sociâl e a saran doprâts par meti in pratiche lis finalitâts sociâls.
Al è improibît, in mût clâr e net, di dividi tra i socis, ancje in vie indirete, vuadagns o beçs di soreplui, e tant mancul fonts di risierve o capitâl fin tant che l’associazion e je in vite, fûr che tal câs che la destinazion o ben la distribuzion a sedin metudis par leç.

ART. 3 - Sevi in Italie sevi tal forest, si puedin vierzi sîts de Societât filologjiche furlane che a rispuindin ai rapresentants diretîfs de societât stesse.

Titul II: SOCIS

ART. 4 - A fasin part de Societât Filologjiche Furlane chestis categoriis di socis:
         1) Socis ordenaris;
         2) Socis sostenidôrs;
         3) Socis meritevui.
La inscrizion ae Societât Filologjiche Furlane e vâl par un timp no stabilît e no si pues vêle par un timp stabilît.
Si devente Soci ordenari o ben sostenidôr paiant la relative cuote e parferint il propri laut aes finalitâts sociâls parie cul impen a rispietâ il statût e i regolaments.
I ents, lis associazions e lis personis juridichis a puedin notâsi dome come Socis sostenidôrs.
Lis cuotis di inscrizion dai Socis ordenaris e sostenidôrs a son decidudis ogni an dal Comitât diretîf.
A son nomenâts meritevui dal Consei gjenerâl e notâts intun libri apueste i socis che si fasin cognossi par oparis di alte culture, o ben par une stabile e lungje ativitât inte associazion, par donazions o contribûts no di pôc a pro de Societât filologjiche furlane.
Jessi soci di une fate o di chê altre nol da dirit a nissun favôr o ben limitazion nancje in vie indirete; ducj i socis a puedin vê lis incarghis sociâls cussì come ducj i socis a son libars di cjapâ part ae nomine dai rapresentants sociâi su la fonde di chest statût; si dopre il principi dal vôt unic.
La cuote o ben il contribût di inscrizion no si puedin trasmetiju ni par at tra vîfs ni par cause di muart e no puedin jessi rivalutâts.

ART. 5 - Ducj i socis, di cualsisei fate, a àn dirit di vôt intes Assembleis.
A àn ancje dirit di vê cjase lis publicazions periodichis e di cjoli lis publicazions de Societât Filologjiche Furlane cul scont sul presit di cuviertine, daûr des modalitâts decidudis dal Comitât diretîf.

ART. 6 - Un nol è plui soci cuant che si ritire o ben al ven slontanât. Il soci al pues ritirâsi de associazion in cualsisei moment. La decision di ritirâsi e à di jessi comunicade al Comitât Diretîf cuntune note scrite e e à valôr cu la fin dal an in cors pûr che e sedi fate almancul trê mês prime de fin dal an.
Il soci al ven slontanât in fuarce di une delibare dal Comitât diretîf cuant che nol paie la cuote par doi agns o ben par grâfs mutîfs.

Titul III: RAPRESENTANTS SOCIÂI

ART. 7 - A son rapresentants de Societât Filologjiche Furlane:
  •     la Assemblee Gjenerâl dai Socis;
  •     il Consei Gjenerâl;
  •     il Comitât Diretîf;
  •     l’Ufici di Presidence;
  •     il President;
  •     il Colegjo dai Revisôrs dai conts;
  •     il Colegjo dai Probivîrs;
  •     lis Comissions.

Assemblee Gjenerâl dai Socis

ART. 8 - La Assemblee Gjenerâl dai Socis e je il prin rapresentant sovran cun podê di decidi de Societât Filologjiche Furlane. La Assemblee Gjenerâl dai Socis e scuen jessi dade adun une volte ad an dentri dai prins trê mês par fâ bon il belanç; e je convocade dal President cuntun avîs che al à di jessi picjât tes sedis o ben burît fûr sul sît internet o ancjemò su lis rivistis de associazion almancul cuindis dîs prime de zornade fissade.
Ae assemblee a puedin cjapâ part i socis che a àn paiât la cuote sociâl.
La Assemblee e à valôr in prime convocazion se e je presint la majorance assolude dai socis e in seconde convocazion cualsisei al sedi il numar dai socis presints.
La Assemblee:
1.  e fâs bon il belenç di esercizi, la relazion morâl e finanziarie, il belanç di prevision dal an;
2.  e nomene i components dal Consei Gjenerâl, i components di dirit e suplents dal Colegjo dai Revisôrs dai conts, i components dal Colegjo dai Probivîrs;
3.  e fâs buinis lis modifichis dal statût e e decît su la fin de associazion daûr des modalitâts previodudis tal articul numar 20 che al ven dopo.
Inte assemblee ognidun dai socis al pues da la deleghe a di un altri par che al voti al so puest. A son tignudis par buinis dôs deleghis scritis par ogni soci.
La Assemblee Gjenerâl dai Socis e je dade adun dal President par sô iniziative o ben par decision dal Comitât Diretîf o pûr dal Consei Gjenerâl, o ancjemò daûr di une domande scrite e mutivade di almancul un decim dai socis e, par bogns mutîfs di caratar contabil, dal Colegjo dai Revisôrs dai conts. La convocazion e scuen jessi fate dentri di un mês de decision dal Comitât Diretîf o ben dal Consei Gjenerâl o pûr de notifiche de domande dai socis o ancjemò di chê dal Colegjo dai Revisôrs.
Chest statût al pues jessi gambiât de Assemblee Gjenerâl dai Socis pûr che la propueste e sedi metude tal ordin dal dì de convocazion, che al à di jessi mandât vie ai socis doprant cualsisei mieç bon, ancje telematic, almancul cuindis dîs prime de semblee; lis propuestis di gambiament dal statût a puedin jessi fatis di almancul cincuante socis e metudis tal ordin dal dì de Semblee gjenerâl.
I gambiaments dal statût a scuegnin jessi decidûts de maiorance assolude dai socis presints inte semblee.
Dut câs, l’associazion si adatarà a cualsisei norme di leç o regolament, ancje che a vedin di jentrâ in vigôr un doman, sevi statâl sevi locâl, che si integnin sui ents no comerciâls.
I verbâi des decisions de semblee a son tignûts da cont in libris apueste e picjâts par dîs dîs intal sît sociâl.

Consei Gjenerâl

ART. 9 - Il Consei Gjenerâl al è il prin rapresentant di consultazion de Societât Filologjiche Furlane, al è fat di setante components e al ven dât adun almancul dôs voltis intun an dal President; al pues jessi dât adun ancje daûr di une domande scrite e mutivade fate di un tierç dai conseîrs.
Il Consei Gjenerâl al ven tignût tant che metût adun come cu va in prime convocazion cuant che e risulte presint la maiorance assolude dai components e in seconde convocazion cualsisei al sedi il numar dai components.
No si acetin deleghis.
Il Consei, te prime cunvigne, che e à di jessi convocade dentri di un mês de elezion par cure dal component plui intipât, al nomene il President e, tal so sen, i components dal Comitât Diretîf.
Il Consei Gjenerâl al à il compit di proponi al Comitât diretîf lis iniziativis e lis ativitâts de Societât Filologjiche Furlane; al sostente la nassite di comissions particolârs di studi che si interessin di problemis specifics in relazion aes finalitâts sociâls o dut câs che a dan une man par intivâlis; al nomene i Socis meritevui.
Il Consei Gjenerâl al pues decidi, su la fonde de maiorance dai vôts, di domandâ la convocazion de Semblee gjenerâl, pûr che al sedi presint almancul un tierç dai siei components.
A cjâf dal Consei Gjenerâl al è il President de Societât Filologjiche Furlane o ben un so delegât.

Comitât Diretîf

ART. 10 - A fasin part dal Comitât Diretîf vincjecuatri components nomenâts su la fonde dal art. 9 di chest statût, in plui dal President che a ‘ndi fâs part par dirit.
Il Comitât Diretîf al è il rapresentant ministratîf de Societât Filologjiche Furlane, indi cure ju interès, al procure di progjetâ, promovi, coordenâ lis ativitâts de Societât Filologjiche Furlane, al da ai socis incarghis paricolârs pes publicazions, pes diviersis ativitâts, pai rapuarts cun altris sodalizis e par dutis lis cuestions che si integnin su la vite de Societât filologjiche furlane.
Al Comitât Diretîf di fat a son stâts dâts ducj i podès che i coventin pe ministrazion ordenarie e straordenarie de societât cence ecezions di nissune fate, si che al pues fâ dut ce che i somee plui just o ben necessari par sodisfâ il miôr pussibil i fins sociâi, fûr che a rivuart dai ats risiervâts de leç o ben dal statût a altris rapresentants.

ART. 11 - Il Comitât Diretîf al ven dât adun pe prime volte dal President dentri di un mês de elezion e al nomene, cun vôt segret, tra i siei components, chei dal Ufici di Presidence. In particolâr:
  • il Vicepresident pal Friûl di mieç;
  • il Vicepresident pal Friûl di soreli a mont;
  • il Vicepresident pal Friûl di soreli jevât;
  • il Vicepresident pe Cjargne;
  • il Tesorîr;
  • il Segretari.
Par resons storichis, lassant in bande lis divisions pulitichis-ministrativis, e tignint cont che, dut câs, a puedin slargjâ la lôr ativitât e rapresentance ancje in chei teritoris là che e je presint une component storiche e lenghistiche furlane, i cuatri Vicepresidents a rapresentin:
  • il Friûl di mieç, vâl a dî la part che in dì di vuê e je Provincie di Udin no di competence di chês altris vicepresidencis;
  • il Friûl di soreli a mont, ven a stâi l’atuâl Provincie di Pordenon, Puart e i teritoris cunfinants;
  • il Friûl di soreli jevât, ven a stâi l’atuâl Provincie di Gurize cui teritoris cunfinants;
  • la Cjargne, mari dal Friûl, cun Sapade, il Cjanâl dal Fier, la Valcjanâl e il Friûl di tramontane.
Lis votazions si àlis cun vôt public; tal câs di paritât, al vâl il vôt dal President de Societât Filologjiche Furlane o ben di un so delegât.
Tal câs che lu vuelin doi tierçs dai siei components, il Comitât Diretîf al pues domandâ che l’Ufici di Presidence, midiant dal President o di un so delegât, al riferissi su ciertis iniziativis de societât.

Ufici di Presidence

ART. 12 - L’Ufici di Presidence, cun a cjâf il President de Societât Filologjiche Furlane o ben un so delegât, tal moment de elezion, pûr simpri dentri dai limits dal institût de deleghe, al ven cjamât di ducj i podès dal Comitât Diretîf, fûr che tal câs di specifichis e mutivadis ecezions relativis a ciertis ativitâts che, pe lôr impuartance, si crôt miôr che a vegnin decidudis dal Comitât Diretîf.
Al Ufici di Presidence duncje a vegnin delegâts di norme ducj i podès dal Comitât Diretîf.
L’Ufici di Presidence al ven dât adun dal President ogni volte che i somei necessari cuntun avîs scrit, di spedî ai components, ancje par vie telematiche o ben doprant cualsisei mieç adat, almancul vot dîs prime o pûr trê se e je presse.
L’Ufici di Presidence al pues da ciertis particolârs incarghis a un o plui Conseîrs o ben Vicepresidents, al definìs lis funzions dal Tesorîr e al nomene ancje, tal rispiet de disponibilitât di bêçs, un Diretôr che al pues vê la deleghe su dutis o ciertis funzions ministrativis dal Comitât Diretîf.Il Diretôr al opare dentri dai limits dal mandât vût e l’incarghe i pues jessi gjavade in cualsisei moment tal rispiet des normis in vigôr.
L’Ufici di Presidence al scuen riferî al Comitât Diretîf su la ministrazion de Societât Filologjiche Furlane o ben su specifichis cuestions metudis in evidence dai Conseîrs e relativis ae ministrazion de societât.

Il President

ART. 13 - Il President de Societât Filologjiche Furlane al è il legâl rapresentant de societât ancje in judizi cun facoltât di promovi azions e instancis judiziariis e ministrativis par ogni grât di jurisdizion e ancje par judizis di cassazion e revocazion, nomenant co al è il câs avocats e procuradôrs ad lites.
Se il President nol è o ben al è intrigât, la Societât Filologjiche Furlane e ven rapresentade dal Vicepresident pal Friûl di mieç o pûr di un altri Vicepresident o Conseîr delegât dal President.
Ai Vicepresidents e je cun di plui dade in man diretamentri l’organizazion e la ministrazion dai sîts tal teritori e des delegazions se dal câs creadis tai lûcs di competence, simpri parie cul Ufici di Presidence. Colegjo dai Revisôrs

Colegjo dai Revisôrs

ART. 14 - A fasin part dal Colegjo dai Revisôrs dai conts trê components di dirit e doi suplents, nomenâts de Assemblee Gjenerâl, che a sigurin l’andament pulît de contabilitât de associazion e dai libris relatîfs, parferint un parê sui belançs.
Il colegjo al nomene tal so sen il President. Par bogns mutîfs di caratar contabil, al pues domandâ la convocazion de Assemblee Gjenerâl.

Colegjo dai Probivîrs

ART. 15 - A fasin part dal Colegjo dai Probivîrs cinc components, nomenâts tra i socis de Semblee gjenerâl. Il Colegjo dai Probivîrs al decît cence apel daûr ricors scrit dal interessât sul slontanament dal soci deliberât dal Comitât diretîf. Al da il so parê daûr ricors di almancul un decim dai socis rivuart eventuâls strapaçs dal statût fats dai rapresentants diretîfs.
Al è dât adun e guidât dal component plui intipât. Il component plui zovin al fâs di segretari e al scrîf i verbâi des sedudis.

Comissions particolârs

ART. 16  - A fasin part des Comissions particolârs un numar di components che al va di trê fin siet, nomenâts dal Consei Gjenerâl e sielzûts ancje tra int che no je socie; lis comissions a son istituidis dal Ufici di Presidence o ben dal Comitât Diretîf, di bessôl o pûr daûr propueste dal Consei Gjenerâl.
I components de comission a scuegnin cjatâsi dentri di trente dîs dopo de lôr elezion par nomenâ tra di lôr il President che al à di jessi par fuarce un component dal Consei Gjenerâl.
Al President i spiete di coordenâ i lavôrs de comission, riferint, ogni volte che int sedi fate domande, al Ufici di Presidence, al Comitât Diretîf e al Consei Gjenerâl, su lis ativitâts che la comission e à inmaneât e e crôt di inmaneâ ancjemò. Dutis chestis incarghis a durin massime par trê agns.

Titul IV: ALTRIS SÎTS

Art. 17 - Cun delibare dal Comitât Diretîf, a puedin jessi creâts altris sîts de Societât Filologjiche Furlane. Chescj sîts a son ministrâts in plene autonomie dal Vicepresident competent sul teritori che al pues ancje delegânt in dut o par une part la ministrazion. A ognidun dai sîts e sarà dade ogni an une risierve di bêçs che e vignarà ministrade in plene autonomie, ma cul oblic di rese di cont periodiche, inte unitât di belanç cul sît centrâl.
Legâts, contribûts, finanziaments o ben jentradis di ogni fate, vudis a cualsisei titul di un altri sît, a saran ministradis di chel stes, cence possibilitât di doprâlis par ativitâts logadis in altrò, pûr simpri inte unitât di belanç e cul oblic di rese di cont periodiche.
Par iniziative di ognidun di chei altris sîts, fasint stât sul precedent parê dal Ufici di Presidence, a puedin jessi creadis delegazions tignudis e ministradis diretamentri di un altri sît che si ‘nt cjape sù dut il pês.

Titul V: PATRIMONI

ART. 18  - A fasin part dal patrimoni de Societât Filologjiche Furlane:
bens di podê movi e stabii che a rivin dongje ae associazion a cualsisei titul;
distribuzions, contribûts, donazions e legâts di ents sevi publics sevi privâts o ben di personis fisichis;
beçs di soreplui te ministrazion.
A fasin part des jentradis de associazion:
1.  lis cuotis sociâls e eventuâls contribûts volontaris;
2.  chel che si gjave fûr de organizazion di manifestazions, iniziativis o ben ativitâts sostentadis de associazion;
3.  cualsisei altre jentrade vuadagnade cul davuelzisi de ativitât dal ent.
L’esercizi finanziari al è dutun cul an solâr. Il belanç di esercizi de Societât Filologjiche Furlane al è unic e unitari.
Tai cuindis dîs prime de semblee convocade pe lôr aprovazion, i belançs a àn di jessi tignûts cja dal sît de associazion a disposizion di ducj chei che a vedin un bon mutîf par leiju.

ART. 19 - Il funzionament interni de Societât Filologjiche Furlane al è dissiplinât da regolaments apueste, che a àn di jessi burîts fûr dal Comitât Diretîf.

ART. 20 - La fin de associazion e je decidude de semblee, che e provioderà ae nomine di un o plui licuidadôrs. In câs di fin de associazion il patrimoni restât al à di jessi destinât a altris associazions cun finalitâts compagnis o ben cun fins di publiche utilitât, dopo di vê sintût l’organisim di control che si fevele tal art. 3 Co. 190 L. 23.12.1996 n. 662, a mancul di une divierse destinazion metude par leç.

Agns Vincj:
primis tessaris d'associazion.

Francesco Spessot, Fare;
Settimio Pauluzzi, Orsarie;
Ugo Franzotti, Gurize.

    • Tessare di Francesco Spessot
    • Tessare di Settimo Pauluzzi
    • Tessare di Ugo Franzotti

REGOLAMENT de SOCIETÂt FILOLOGJICHE FURLANE
Fat bon dal Comitât Diretîf  tal incuintri dai 23 di Zenâr dal 2004


ART. 1 – Chest regolament al à il fin di coordenâ la ativitât dai orghins sociâi tal rispiet des normis dal statût.
 
Assemblee Gjenerâl dai Socis

ART. 2 – Il President de Societât Filologjiche Furlane al è da cjâf de Assemblee dai Socis.
A la Assemblee dai Socis a puedin cjapâ part cun dirit di votâ ducj i socis che a si cjatin in regule cul paiament de cuote sociâl. L’orghin che al met adun la assemblee al po decidi di invidâ altris sogjets, ancje no socis, che a podaran intervignî dome daûr de decision dal President de assemblee ma no podaran in nissun câs partecipâ a eventuâls votazions.
Te Assemblee ogni soci al po delegâ un altri soci a votâ par so cont. Si ametin dôs deleghis scritis par ogni soci.
Prime che e comenci la adunance il President al nomene la comission di control dai podês, componude di almancul trê e massime cinc sogjets, par fuarce socis de societât; cheste comission e à il fin di controlâ che lis personis che a partecipin a vedin pardabon dirit di partecipâ e di votâ. Se lis votazions a son a scrutini segret, la comission che e verifiche i podês e fasarà ancje di comission eletorâl: e davuelzarà lis operazions di scrutini e dut ce che al coventarà. La comission e nomene tal so sen il so President.

Consei Gjenerâl

ART. 3 – Il President de Societât Filologjiche Furlane al è da cjâf dal Consei Gjenerâl. Lu assist il segretari de societât o ben un altri sogjet nomenât dal President.
Par elei i components, il Comitât Diretîf al propon 70 nons che, se al è pussibil, a rapresentin ogni zone dal Friûl. La Presidence a pronte une liste par ordin alfabetic dai nons indicâts.
Se grops di almancul 50 socis a presentin altris candidâts fin a un massim di setante nons, chescj nons si ju zonte, simpri par ordin alfabetic, tai prins setante formant une sole liste.
I socis a àn di presentâ e di firmâ lis listis, e di depositâlis tai uficis dal Sît de Societât almancul dîs dîs prin de date fissade pe Assemblee gjenerâl.
Lis modalitâts di elezion si lis cjate scritis te schede eletorâl che la Societât e da fûr. Lis schedis cun plui di setante nons votâts a vignaran anuladis. A figuraran elets chei cun plui votazions. A paritât di votazion si elei il plui anzian di etât. Se al rinuncie, al subentre il prin de liste di chei che no son stâts elets.
Cheste disposizion no prejudiche l'eletorât passîf dai altris socis che no son in nissune liste.
Se il consei gjenerâl al ves di assumi delibaris cun scrutini segret, si varà di nomenâ une comission eletorâl cun funzions di scrutini, metude adun cun membris cjapâts dai components dal consei. Chescj membris a nomenaran un lôr president. La comission si ocuparà di dutis lis operazions di scrutini e di dut ce che al covente.

Comitât Diretîf

ART. 4 – Il President de Societât Filologjiche Furlane al è da cjâf dal Comitât Diretîf.
La elezion dai components dal Comitât Diretîf si fasile su presentazion de liste dai membris dal Consei Gjenerâl fate de Presidence. Ogni conseîr al podarà votâ fin a un massim di vincjecuatri nons.
A son elets chei che a àn vudis plui votazions. A paritât di votazions si elei il plui anzian di etât. Se chest al ves di rinunciâ, al jentre il prin dai no elets.
Lis riunions dal Comitât Diretîf a son fatis buinis cuant che si presentin almancul metât dai siei components. Lis deliberazions a vegnin fatis buinis de maiorance assolude dai presints.
Tal câs che il comitât diretîf al assumi delibaris cun scrutini segret, si varà di nomenâ une comission eletorâl che e vedi funzions di scrutini, metude adun di membris cjapâts di components dal consei, che a varan di nomenâ un lôr president. La comission si ocuparà di dutis lis operazions di scrutini e di dut ce che al covente.
 
Ufici di Presidence

ART. 5 – A cjâf dal Ufici di Presidence al è il President, che lu clame dongje mediant di un avîs scrit, di inviâ ai components ancje par vie telematiche o cun cualsisei mieç util, almancul vot dîs prime, o trê dîs prime tal câs di une urgjence.

Coleç dai revisôrs dai conts

ART. 6 – La elezion dal Coleç dai Revisôrs dai conts si fasile daûr dal art. 3 di chest Regolament. Tes listis presentadis a àn di segnâsi almancul cinc socis. Par ogni liste no àn di figurâ plui di trê membris efetîfs e plui di doi suplents. A son elets chei che a cjapin plui vôts. A paritât di vôts al ven elet il plui anzian di etât. Se al rinuncie, al jentre il prin di chei no elets.

Coleç dai probivîrs

ART. 7 – La elezion dal Coleç dai Probivîrs si fasile daûr dal art. 3 di chest Regolament. Tes listis presentadis a àn di segnâsi almancul cinc socis. Ogni liste no podarà vê plui di cinc nons. A vignaran elets chei che a cjaparan plui vôts. A paritât di vôts al ven elet il plui anzian di etât. Se al rinuncie, al jentre il prin di chei no elets.

Comissions

ART. 8 – I components de comission a àn di cjatâsi dentri di trente dîs de lôr elezion par elei tra i lôr components il President, che al scuen jessi un membri dal Consei Gjenerâl.
Il President al à il compit di coordenâ i lavôrs de comission, fasint rapuart ogni volte che i ven domandât, al Ufici di Presidence, al Comitât Diretîf e al Consei Gjenerâl, su lis ativitâts che la Comission e à davuelt e e vûl davuelzi. Dutis lis incarghis che o vin nomenadis a durin al plui trê agns e dut câs l'orghin che lis da al po ancje gjavâlis in cualsisei moment.
 
Discussion tai orghins di Assemblee e di Coleç

ART. 9 – Come che si sigure che al è il numar legâl, il President al vierç la riunion. Il President al dirêç e al modere la discussion, al fâs rispietâ chest Regolament, al permet di fevelâ un a la volte. Par regule ogni soci nol podarà vê la peraule su chel stes argoment plui di dôs voltis.
Come che al à la peraule, il soci al à di fevelâ dome de propueste che si è daûr a esaminâ, in curt, e la Assemblee e po fissâ un limit di timp pai intervents.
Se nissun soci al domande di fevelâ su chel argoment che si è daûr a esaminâ, il President al siere la discussion gjenerâl. A chest pont nissun al po vê la peraule se no par fâ semplicis declarazions di vôt, che no àn di cjapâ plui timp dai trê minûts.

Votazions

ART. 10 – Lis votazions a puedin jessi palesis o segretis. La votazion palese si fasile par solit par alçade di man. La votazion par apel nominâl si fasile daûr di une domande palesade. Pe votazion par apel nominâl e covente la domande di almancul un tierç dai socis presints. Il vôt par alçade di man al à di passâ par une cuintriprove, se le domande cualchidun prime de proclamazion. La votazion segrete si fasile par schedis e cuant che si à di elei personis a cjariis o par cuestions di nature personâl.
Fâs cognossi
Leams