La presince a Lignan di personaçs famôs, chei che o clamìn star, no rivuarde dome i esemplis plui cognossûts tant che Ernest Hemingway (che par altri al restà culì dome pocjis oris par visitâ Lignan Pinede pene nassude) o di Alberto Sordi, che invezit a Lignan al à fate sù une vile che e puarte il so non. La liste e je biele lungje e e cjape dentri figuris dal spetacul e dal sport, gjornaliscj, scritôrs, artiscj. Dal campion di Formula 1 Manuel Fangio fin a la Valanga azzurra di Thoeni e Gross; di Eddy Merckx fin a Raimondo d’Inzeo, di Mario Corso fin a Vittorio Gassman, di Mario Del Monaco fin a Alghiero Noschese, dal Mago Zurlì fin a Mike Buongiorno. Dome par fâ cualchi non.
Une grande presince, par vie des manifestazions, di gjenars diferents, promovudis di bande di chê che in chê volte e jere la Aziende di Turisim. Ma in cierts câs a ’nd è di altris resons: par esempli Edy Campagnoli, la frutate di Lascia o Raddoppia cun Mike Buongiorno, e passave buine part dal Istât inte Pensione Ines insieme cul morôs furlan Lorenzo Buffon, zuiadôr dal Milan, che po e maridà. Se si va a lei Stralignano, la storiche riviste di vite balneâr, si cjatin piçui articui o fotografiis a testemoneance di chestis presincis “impuartantis”.
O cjatìn cussì Virna Lisi, sentade suntune sdraie su la splaze intant che e cjacare cul inmò zovin gjornalist Enea Fabris. O sin ai 29 di Jugn dal 1966, ae vilie dai Mondiâi di balon in Inghiltere (chei de disgraciade sconfite cu la Coree dal Nord). La splaze e je chê di Pinede, che si pues ricognossi daurman par vie des tarondis e de Tor Astra sul font, a pene finide di fâ sù. La presince di une gru une vore alte nus ricuarde chel moment che si viveve a Lignan, agns straordenaris di incressite edilizie. In chei dîs Virna Lisi e jere daûr a lavorâ pes ripresis dal film La ragazza e il generale, direzût di Pasquale Festa Campanile. La atore e stave in albierc a Udin, al Ambassador, ma, intai moments di polse, e vignive jù a Lignan in compagnie dal so frutut, Riccardo.
Dai Mondiâi di balon a la Olimpiade, chê di Monaco. Vie pal Istât dal 1972 la cjantante Mia Martini e rive a Lignan par zirâ cun TeleCapodistria il videoclip dal so 45 zîrs Piccolo Uomo. Il puest al è Place del Sole a Pinede. Finide la cjançon, la Martini e ven intervistade di bande di Luciano Minghetti. Ducj i doi a son sentâts su dôs poltronutis di vencs metudis tal mieç de strade, jenfri lis machinis, come par someâ a la famose publicitât dal Cynar (chê cun Ernesto Calindri). Ma un vigjil une vore atent, che al passe par li, nol capìs (no je finzion, al è un vigjil pardabon!) e i fâs al gjornalist la multe par impediment al trafic (a vuê la sene si pues viodile su Youtube). L’edifici puint di D’Olivo dilunc dal biscione di Pinede al fâs invezit di suaze pal clip de bande B dal disc, cu la cjançon Madre.
Tal an dopo une buteghe di vistîts di lusso, simpri in Place del Sole a Pinede, e je il lûc dal prin ciak dal film La ragazzina, cun protagoniste une zovine Gloria Guida (di a pene disevot agns), che e interprete Monica, una studente inmagante e misteriose. Lis ripresis dal film a vegnin fatis pe plui part a Pinede, ancje se su la gnove Terrazza a mare di Sabbiadoro (che e jere stade screade intal 1971) e ven zirade la famose secuence li che la atore, suntune moto guidade dal atôr spagnûl Andrés Resino, dopo vê traviersât la splaze dilunc dal mâr e finìs la sô corse sul pontîl cuviert e traforât. Pe fieste di complean de protagoniste si sielç invezit la biele vile dal comendatôr Riccardo Riva, l’imprenditôr che di cualchi an al à inviât la realizazion di Lignan Riviere.
Ancjemò une vile, chê dal za president de regjon Alfredo Berzanti, pôc distante dal Kursaal, e fâs di suaze tal 1993 al film Estasi, direzût di doi regjiscj esordients: Maria Carmela Cincinnati e Peter Exaocostos. La protagoniste e je Ornella Muti, in chei agns za une vore innomenade. Tal cors des ripresis la Muti e ven ospitade tal Hotel Marina Uno di Riviere.
In tai dîs de sô permanence a Lignan, la stampe locâl i cor daûr fis, ma jê e refude dutis lis intervistis e e à fintremai ce dî cuntun fotografo.
Gian Paolo Polesini al rivarà dut câs a intervistâle, su la splaze come Virna Lisi. Par dovê di croniche o ricuardìn che il film, par resons che no si cognossin, nol è mai vignût fûr.