Bisugne dâ sigurece ai progjets pal insegnament dal furlan

Di pôc plui di un mês si son vierts une altre volte i portons des scuelis e come ogni an o vin sintût lis solitis denunziis pe mancjance di aulis, docents, imprescj didatics. A jessi sincîrs, un pôc mancul di chei altris, chi in Friûl, pes aulis e scuelis, in gracie de ricostruzion dal dopo taramot dal 1976, ma i problemis tal complès a restin parcè che a son il risultât de “distrazion” di une societât interie viers il mont de scuele. La stesse pocje atenzion si le viôt tal insegnament de lenghe furlane che a nô de Societât Filologjiche Furlane, ma no dome a nô, nus sta a cûr.
Inte suaze dal seminari Marilenghe & Mariscuele, inmaneât a Codroip ai 9 di Avrîl stât, aromai pal tierç an di file,  i docents presints a àn elaborât dute une schirie di considerazions e propuestis su chest argoment che o volìn meti ae atenzion di ducj i orghins decisionâi e scuelastics cul intent di marcâ i gredeis e lis soluzions pussibilis intune otiche dal dut propositive. Chescj i ponts principâi:

1. Par prime robe la Regjon e à di decidi se cjamâsi, tant che Regjon autonome, la competence de scuele. Chest al permetarès di lâ sore lis tantis inciertecis lassadis de aplicazion de Leç 482/1999, gjavant vie subit l’opzion pes lenghis minoritariis, che e da dome problemis didatics e organizatîfs aes istituzions scuelastichis cence garantî un risultât vêr ai students.
2. La Regjon e à di meti in rie i timps di erogazion des risorsis cul calendari e cui timps di programazion dal an scuelastic, dant sigurecis che a àn di jessi operativis fin dal prin dì di scuele, se no i progjets destinâts ae lenghe furlane e a chês altris lenghis di minorance dal Friûl Vignesie Julie a muraran!
3. La formazion previodude cumò no rispuint aes dibisugnis reâls: une robe e je la formazion iniziâl, dulà che i master inmaneâts de Universitât a son masse luncs e dispès a mancjin de part pratiche, e une altre robe e je la formazion ricorinte che e à di jessi fate, pretindude e ricognossude ai docents cun cadencis almancul ogni trê agns, cui insegnants plui cualificâts, cu la presentazion des miôr esperiencis didatichis e de evoluzion des siencis neurologjichis, psicologjichis e pedagogjichis des lenghis.
4. Aes scuelis si domande di progjetâ la didatiche e la organizazion dal insegnament lenghistic in gjenerâl (che al cjapi dentri la lenghe taliane, lis lenghis forestis e la lenghe furlane) intune otiche interdissiplinâr che e ricognossi la stesse dignitât a ognidune des lenghis imparadis/insegnadis, cun timps juscj, risorsis umanis e didatichis buinis pai risultâts cirûts. In chest cuadri a son valevui i percors di insegnament de lenghe furlane condividûts dentri de scuele e cu la comunitât locâl par fâ cognossi al teritori obietîfs, valôrs e ce che si fâs.
5. Bisugne prudelâ in dutis lis manieris i moments di incuintri tra insegnants par scambis di esperiencis, ancje midiant materiâi multimediâi, formazion a distance o acessibilitât a ducj i repertoris in/di lenghe furlane.
6. Bisugne rindisi cont che e je une diference di valutazion tra i difarents Istitûts par ce che al rivuarde la competence in lenghe furlane par colpe de mancjance di materiâi e imprescj adats. La cuistion formative dai docents midiant l’iscrizion ae liste regjonâl no garantìs une competence lenghistiche serie. Al è un probleme dificil che al va frontât dal mont politic, scuelastic e sindacâl dal pont di viste dal servizi reâl rindût ai arlêfs e ae comunitât scuelastiche, cuntun mût di viodi viert e no cun soluzions cuantitativis o corporativis.
7. Un bon investiment al va fat di bande de Regjon par fâ vê aes scuelis i materiâi plui adats pal insegnament des lenghis di minorance e, massime, par formâ i docents su chescj materiâi.
8. Par finî, la metodologjie C.L.I.L. (Content and language integrated learning), e somee la plui adate ancje pal insegnament des lenghis minoritariis, parcè che e je par ducj i nivei e sogjets.

Par chestis esigjencis, vignudis fûr dal confront tra docents des scuelis pe infanzie, primarie e secondarie di prin grât, la Societât Filologjiche e je pronte e juste par dâ rispuestis concretis e di nivel alt!

Pierino Donada
«Messaggero Veneto», 25.10.2016