La Setemane Sante e la Sante Pasche nus viodin, chest an, tes nestris cjasis, cu lis nestris fameis, a frontâ une situazion che mai si varessin spietât. Un’epidemie cussì violente e pericolose che si domandìn cuant che si podarà tornâ a une vite normâl.
E je ancje un’ocasion però, te preocupazion dal moment, par rifleti sui valôrs fondamentâi de nestre culture e dal nestri jessi comunitât, su lis relazions ch’o vin cun chei altris. Un’ocasion preziose che no vin di pierdi.
La storie e à insegnât al nestri popul a cjatâ la juste misure dal vivi, a judicâ lis prioritâts des nestris azions, a savê decidi ce ch’al è impuartant e ce che nol covente, a deventâ plui fuarts ogni volte ch’o vin di superâ une prove.
Chei chi a son i regâi che il Signôr nus puarte cu la Sô Pasche di Resurezion.
E buine Pasche, di cûr, a ducj i Furlans.
Federico Vicario
Dean de Societât Filologjiche Furlane