Cjârs Cunfradis e Amîs,
la maravee di chest Cjistiel nus dà il bon acet al Congrès de nestre Societât Filologjiche Furlane, un Congrès che tal so passâ di citât in citât, di paîs in paîs, pe prime volte si ferme culì a Colorêt. E je un’ocasion, cheste, par cognossi e preseâ ancjemò di plui chest teritori, cul incjant de sô nature, tra culinis, rivis e aghis, cul revoc di memoriis antighis e gloriosis, memoriis che une part cussì impuartant a àn vût par dute la Furlanie. O podìn ben figurâsi i innomenâts cantôrs de nestre Patrie, Ermes di Colorêt e Ippolito Nievo su ducj, cuant che, intune serene matine di primevere, cul rigôr dal unvier che planc a planc si mude tal clip de biele stagjon, des toratis dal Cjistiel a cjalin lis monts e la plane dal Friûl, a scoltin lis vôs di cheste tiere e di cheste tiere a supin lis emozions par scrivi lis pagjinis ch’a àn segnât la sô storie. O sin a Colorêt pal Congrès de Filologjiche, ta cheste scune di culture e di art, o sin chi ta chel straordenari lûc ch’al à inspirade la definizion di piccolo compendio dell’universo, un “piçul compendi dal univiers” dut nestri, une sintesi che nus samee cussì perfete pal nestri Friûl, a rindi il sens e l’armonie de nestre comunitât, il rapuart tra di nô e cul nestri ambient. Poetis e leterâts nus àn inmagâts contant di vueris e di amôrs, nô o sin chi a trasmeti i valôrs dal nestri mont e l’identitât de nestre culture, o sin chi a fâ tesaur di chel tic e toc dal orloi grant che, cu lis peraulis di Ermes, al bat il timp e lis stagjons dal Friûl di vuê e di doman.
Il Numar Unic al è l’agrât e la ricognossince che il nestri Istitût i puarte ae comunitât locâl, l’agrât a chest paîs par jessi ce ch’al è e la ricognossince par vêlu scompartît, chest so jessi, cun nô. Il Numar Unic al cîr, come simpri, di meti adun e di presentâ storie e culture, personis e lûcs, ambient e nature di chest blec di Friûl. Il compit, cheste volte, i à tocjât a Carlo Venuti, nestri Vicepresident, che cun grande passion e competence al è rivât a vê lis colaborazions justis dai cultôrs locâi e dai studiôs di robis furlanis par piturâ un gnûf maraveôs cuadri, lui che di storie de art al è un espert, cun ducj i colôrs di chest teritori.
Il nestri Colorêt si zonte, cumò, ae lungje tradizion dai Numars Unics de Societât Filologjiche, in spiete di un altri cjapitul di une storie, la nestre, simpri gnove.