Ai 5 di Dicembar dal 2019 nus à lassâts bonsignôr Pietro Brollo, Arcivescul emerit di Udin. Al jere nassût a Tumieç al prin di Dicembar dal 1933.
La Societât Filologjiche Furlane lu ricuarde cun cheste fotografie di cuant che, ai 28 di Setembar dal 2014, al veve dit Messe par furlan in ocasion dal XCI Congrès sociâl a Lignan.
«Lis Sôs peraulis - al scriveve il President Lorenzo Pelizzo inte letare di ringraziament - nus àn jemplât il cûr di sperance, ta chest moment di dificoltât pal nestri Friûl, nus judin a impegnâsi simpri di plui a vivi cun spirt cristian lis resons dal nestri dâsi adun par promovi i valôrs plui profonts e il patrimoni storic e culturâl de nestre comunitât regjonâl».
La nestre Societât e cjape part cun dolôr al corot de famee e di dute la comunitât dai Furlans.