Sabide ai 8 di Avrîl e torne Marilenghe & Mariscuele, la zornade de scuele furlane rivade, chest an, ae cuarte edizion. Si cjatisi a Codroip, come simpri, par confrontâsi su argoments centrâi e fondamentâi tal percors di introduzion de lenghe tal curriculum scuelastic. Inmaneâ chest moment di incuintri e di riflession pe scuele di chenti e je une biele idee nassude dal 2014 par iniziative dal Sportel di lenghe furlane dal Comun di Codroip, de Societât Filologjiche e dal Istitût comprensîf di Codroip, une iniziative che fin dal prin moment e à cjatât la poie de Provincie di Udin, dal Ufici Scuelastic Regjonâl e de Agjenzie Regjonâl pe Lenghe Furlane. Di plui, inmaneâ chest apontament tal cors de Fieste de Patrie dal Friûl e je ancje un’ocasion par memoreâ la glorie passade dal Patriarcjât di Aquilee, come ch’al è di just, ma soredut par formâ i nestris zovins, ch’a frecuentin lis scuelis, ai valôrs de identitât lenghistiche e culturâl de nestre Tiere. Ve duncje che, in chestis cuatri edizions, Marilenghe & Mariscuele e je cressude parcè ch’e je partide di une prioritât clare: scoltâ la vôs de scuele, la vôs des mestris che ogni dì, cun tante passion e dedizion a continuin a scombati la bataie dal ricognossiment e dal inseriment, a plen titul, de lenghe furlane tal curriculum scuelastic.
La prime part de matinade e je dedicade a dibati l’argoment “Furlan, lenghe veicolâr”, cu la partecipazion di Carmel Coonan, professoresse di glotodidatiche de Universitât Ca’ Foscari di Vignesie, ch’e presente une relazion su la metodologjie CLIL, valadî sul ûs de lenghe (ancje regjonâl), par veicolâ i contignûts didatics. Tes edizions passadis o vin scoltât i intervents di Pierino Donada, za Sindic di Codroip e Dirigjent scuelastic, su “Insegnâ il furlan: oblic o oportunitât”, l’an dopo di Mario Dutto, za Diretôr gjenerâl pai ordenaments dal MIUR, su “La buine scuele e lis minorancis lenghistichis”, e l’an passât di Daniela Marrocchi, referent pes lenghis minoritariis dal MIUR, su “Il ricognossiment des competencis lenghistichis dai arlêfs”. Si segnalin sabide, dopo di chel di Carmel Coonan, i contribûts di Gloria Aita sul Premi Chino Ermacora e di Walter Tomada sui programs dal Docuscuele, il nestri Centri di Documentazion e sperimentazion didatiche. Te seconde part de matinade a tachin i lavôrs laboratoriâi, une part plui pratiche, duncje, là che i docents, in piçui grups, a àn l’ocasion di misurâsi cun progjets za sperimentâts e di discuti i risultâts dal insegnament dal furlan a scuele. Ancje tal dopomisdì a van indenant i moments di incuintri e i laboratoris pratics di sperimentazion didatiche, su plui tematichis e in plui sedis: si presentin publicazions pe infanzie, progjets di educazion sanitarie, gnûfs percors musicâi, il jutori de informatiche pe comunicazion creative, materiâi pe didatiche multidissiplinâr, l’ûs dai telefonins e dai media.
Par une zornade o podìn vivi une Codroip pardabon capitâl de Scuele furlane, pont di riferiment di buinis pratichis di educazion plurilengâl e lûc di elaborazion di gnûfs modei di formazion. Une gnove edizion di Marilenghe & Mariscuele: ancje cheste e je une juste maniere di ricuardâ e di onorâ la Fieste de Patrie dal Friûl, lavorant pal doman dai nestris fîs, confermant une identitât salde tai siei valôrs. La cussience fuarte dal nestri jessi furlans.
Federico Vicario
«Messaggero Veneto», 04.04.2017