O sin braurôs di fâus savê che la prossime edizion de Europeada, il campionât european di balon des minorancis linguistichis e nazionâls, si davuelzarà in Friûl Vignesie Julie tal 2028.
Daspò dal sucès de scuadre dal Friûl te edizion 2024 dal torneu masculin, la organizazion e sarà une gnove disfide che e metarà insiemit dutis lis minorancis de nestre regjon!
I delegâts al Congrès de Fuen che si è tignût a Husum, in Frisie dal Nord in Gjermanie dai 19 ai 22 di Setembar, a àn fate buine la candidature de nestre regjon presentade in cunvigne tra slovens e furlans di bande de Confederazion des organizazions slovenis (Svet slovenskih organizacij - SSO), de Union Economiche Culturâl Slovene (Slovenska kulturno-gospodarska zveza - SKGZ) e de Societât Filologjiche Furlane cu la colaborazion de Union des Associazions Sportivis Slovenis in Italie (Združenje slovenskih športnih društev v Italiji - ZSŠDI) e de Associazion Sportive Furlane.
Il Friûl Vignesie Julie al sarà duncje la sede, dai 25 di Jugn al 2 di Lui dal 2028, dal campionât european di balon des minorancis: la inaugurazion si le fasarà a Triest, la zornade culturâl a Udin e la finâl a Gurize.