La Associazion Sportive Furlane e il Comun di Manzan a presentin il program uficiâl des iniziativis che a compagnin l'incuintri storic di balon cuintri la selezion de Groenlande, che si zuie domenie ai 31 di Mai aes 6 sot sere tal Stadi comunâl di Manzan.
E sarà une fin di setemane tal non dal sport, de culture e de identitât che e metarà dongje in maniere ideâl il Friûl e l'Artic.
La conference stampe di presentazion si le fâs sabide ai 30 di Mai aes 3 daspò misdì tal salon di Palaç Mantica, sede de Societât Filologjiche Furlane in vie Manin 18 a Udin.
L'incuintri uficiâl cui media al sarà in presince dai rapresentants des dôs delegazions e des autoritâts.
INCREDITS STAMPE
Si informin i gjornaliscj, i fotografs e i operadôrs di comunicazion che lis domandis di incredit pal incuintri a varan di jessi mandadis pat e-mail ae direzion associazionsportivefurlane@gmail.com specificant non, cognon e cjâf gjornalistic di riferiment.