Il non di Michele Gortani al riclame, soredut tal ambient de Filologjiche, val a dî parmìs miârs di furlaniscj, l'etnografie e il Museu des Arts e Tradizions Popolârs di Tumieç: al bastarès chest monument, che Lui al creà pe sô e nestre Cjargne, par dî ch'al fo un grant studiôs, par dâ un sens al racont de sô vite e justificâ la fame ch'al meretà te sience etnografiche in Italie e in Europe. Ma Lui al fo un diamant ch'al brilave di tantis lûs: al fo soredut gjeolic e naturalist, pulitic e cooperativist, e ancje storic, come tal volum Il martirio della Carnia. Dal 14 marzo 1944 al 6 maggio 1945.
Fi di Luigi (1850-1908), inzegnîr, naturalist e studiôs di tradizions popolârs, al nassè a Lugo, in Spagne, ai 16 di Zenâr dal 1883. Dal pari al veve ereditât l'amôr pe tiere e pe int de Cjargne e cul pari al scrivè La flora friulana con speciale riguardo alla Carnia (Udin, 1905). Ma il professôr dai claps, come che lu clamavin in Cjargne, al fo soredut un grant gjeolic, ch'al insegnà gjeologjie in siet Universitâts, prime di meti lidrîs par trente trê agns ta chê di Bologne. E co i ufririn la consulence pe dighe dal Vajont, al rispuindè che nol voleve vê a ce fâ cuntune montagne che si clame “Toc”. (No savìn se la rispueste e risulte ai ats, ma, come ch'al diseve Montanelli, se no je vere e je verosimil, parcè che dal sigûr la SADE e pensà al plui grant gjeolic di chel timp, e dome un Om di chel nivel, ch'al cognosseve ancje la lenghe furlane e la toponomastiche alpine, al podeve dâ chê rispueste). I risultâts des sôs ricercjis a son scrits in plui di tresinte oparis a stampe, e par dî l'impuartance dai siei studis, al bastarà ricuardâ che une famee di fossii e fo clamade, in so onôr, Gortanella, e che Gortania al è il non di une riviste sientifiche.
Par sierâ su chest pont o disarìn che al fo il diretôr dal Giornale di Geologia dal 1912 al 1955, fondadôr dal Istituto Italiano di Speleologia e President de Società Alpina Friulana dal 1945 al 1947.
No mancul interessante e je la vite pulitiche di Gortani. Elet deputât liberâl-democratic a Tumieç tal 1913, al sintì dute la responsabilitât di rapresentant dal so popul. Tal '15 al le in guere cui Alpins e al doprà i podês ch'al veve come parlamentâr dome par sparagnâ dams e sanc al so popul e a la nazion taliane. Tal timp de profugance, 1917-1918-1919, ben judât de sô femine, Maria Gentile, al fasè meracui par tignî unîts e judâ ducj i cjargnei e i furlans sparniçâts vie pe Italie, tra il Piemont e la Sicilie. (Cui ch'al ves voie di savênt di plui, al pues lei cun profit Michele Gortani e l'attività assistenziale a favore dei profughi carnici 1917/1919 di Anna Paola Peratoner, un biel e util libri publicât dal Museu di Tumieç tal 2004).
Dal 1945 al 1948 al fo President de Societât Filologjiche Furlane, che sot la sô presidence e tignì i prins impuartants congrès dopo de vuere, a San Denêl (1945), a Spilimberc (1946) e a Tarcint (1947). Il so non al figure ancje tal Comitât incargât de Filologjiche di meti adun un libri su la nestre piçule patrie, intitulât La regione del Friuli, publicât de Cjamare di Cumierç ai prins di dicembar 1946 par sustignî la buine cause de nestre autonomie a Rome. Ai 2 di Jugn dal 1946 al fo elet a la Costituent come democristian, e dal 1948 al 1953, al fo confermât come senadôr. Tal 1959 al fo nomenât professôr emerit.
O finìn scrivint ch'al jere Academic dai Lincei e che stradis cul so non si cjatin a Rome, Bologne, Vile Santine, Codroip, Cuar di Rosacis, Tumieç e Udin.
La nestre, lu savìn, e je une curnîs masse piçule par un Om cussì grant (e modest), ma noaltris de Filologjiche si contentìn di vêLu ricuardât, cun tant rispiet e nostalgjie, tal inovâl de sô muart (1966).