Il patriarcje al jere Marquart di Randeck, un cleric todesc (vescul di Auguste) espert di dirit e di politiche che al rivà a otignî la sede di Aquilee ai 24 di Març dal 1365 tant che cjapitani gjenerâl e lûctignint par man dal Imperadôr; il pape lu fasè patriarcje ai 23 di Avost dal an stes. Marquart al jentrà a Cividât ai 6 di Lui dal 1366 e al scugnì scombati cuintri une part dai cjastelans che no lu volevin. Passât cualchi mês, al clamà dongje il Parlament de Patrie dal Friûl par discuti une vore di argoments de massime impuartance e ancje par meti adun il lavôr che une comission e puartave indenant di timp: il lavôr politic e juridic par rivâ a vê un cuarp legjislatîf di riferiment par dut il teritori. Intune prime sentade, la assemblee e fasè buinis dôs sezions e la tierce e fo votade dal Parlament dât dongje a Sacîl ai 8 di Novembar dal 1366. Di chel moment lis “Constitutiones Patriae Foriiulii” a deventarin l’imprest normatîf plui impuartant di ducj i teritoris che si ricognossevin inte Patrie e a forin mantignudis fintremai al 1797 (cun riformis e integrazions). A scriverin il test par latin, ma passât cualchi an lu voltarin ancje par todesc, par jessi capît miôr dai sudits de bande gurizane, slovene e carintiane; sot dai Venezians, passât un secul, lis Costituzions revisionadis a forin voltadis par talian, un talian une vore dialetâl. O vin di lei lis deliberazions dal 1366 tant che un fat politic e juridic, scomençât intal 1336 cuntune deliberazion dal Parlament, dulà che il patriarcje Bertrant al veve otignût une deleghe par lui e par un consei ristret, par meti adun e par scrit il dirit furlan (ius Foriiulii). Altris decisions parelis lis vevin cjapadis intal 1352, 1355, 1361 cence rivâ a nissun fat concret. Si jere intune fase storiche impuartante, inte colme di un procès di stabilizazion des istituzions publichis furlanis e di un podê centrâl ricognussût a nivel gjenerâl: par rivâ insom, a coventavin leçs, normis, disposizions fondamentâls e valevulis par ducj. Cuasi ogni citât, comunitât, jurisdizion, diocesi e badie a veve i siei Statûts e cualchi entitât za di 150-170 agns (cussì, par esempli, Cividât e Sacîl). Cun di plui, une part dal dirit e rivave dai custums, des tradizions, di decrets, ordenancis e sentencis dal Parlament, dai papis, dai imperadôrs, dai patriarcjis, cence un alc di organic e cence ciertecis juridichis. Lis Costituzions a jentrarin intai cantins de justizie civîl e criminâl, de economie, dai rapuarts jenfri autoritâts e sudits, de vite sociâl.
Ancje di altris bandis de Europe i sovrans a vevin tacât adore a meti ordin intal dirit; i prins a àn di jessi stâts chei di Navare e Aragon, cul Fuero general de Navarra dal 1238 e chel aragonês dal 1247 (Compilatio minor o Fueros de Aragón, Código de Huesca e Compilatio maior o Fori antiqui, Liber in excelsis, Vidal Mayor), che a mantignivin lis disposizions locâls, ma chestis a jerin armonizadis dentri de normative plui gjenerâl dal ream. Cussì al è stât ancje in Friûl e cualchi Statût des comunitâts al è stât gambiât: une operazion no simpri pacifiche, par vie che a son stadis localitâts (come Vençon) che no volevin propit mudâ i articui che no risultavin in regule. Dut câs, lis azions dai patriarcjis di Bertrant a Marquart si movevin intune direzion clare e salde: puartâ il Patriarcjât civîl dentri dai confins de Glesie catoliche, dentri de politiche dal Papât e simpri di plui fûr de influence dal Imperi. Chest nol significhe – come che si sint a dî – che il Friûl al passà di une politiche “gjermaniche” a une politiche “taliane” o di une partignince “ghibeline” a une “vuelfe”. E jere une tindince che si svilupà ator de metât dal secul XIII, propit cuant che l’ultin grant imperadôr, Fidrì II, al jere in disgrazie e al murì. In efiets, il progjet legjislatîf di Bertrant e di chei altris patriarcjis al nassè intune fase di rinfuarciment de dominance temporâl dai pontefiçs: 1303 e 1317, Costituzions de Marche di Ancone; 1336, Costituzions dal Ducât di Spolêt; 1340-1342, Costituzions de Provincie de Romagne e dal Patrimoni di San Pieri; 1357, Costituzions clamadis “de Sante Mari Glesie” par ducj i teritoris di paronance e sovranitât de Sede Apostoliche. Cun di plui, cul at di mandâ fûr no dome un Statût di une comunitât, ma une Costituzion di un teritori grant, il patriarcje si compuartave tant che titolâr di une siorie libare, cence dipendi di nissun. A sameavin lontanons i timps di cuant che il patriarcje al jere leât al imperadôr e plui di cualchi volte nomenât di lui.
Pier Carlo Begotti
«Messaggero Veneto», 08.11.2016