Pôcs a san che Carlo Godoni, il grant scritôr di comediis, tes sôs Memoriis, butadis jù a Parigji in lenghe francese (Mémoires pour servir à l’histoire de sa vie et à celle de son théâtre), tal svicinâsi dai siei otante agns, al fevele tant ben dal Friûl, li che al à vût studiât cun bon profit e no i son mancjadis piçulis aventuris.
Goldoni al conte che a disevot agns al frecuentave jurisprudence te Universitât di Pavie e al viveve tal coleç Ghisleri, ma al jere stât parât fûr di li par vie che lu vevin incolpât di une satire cuintri lis fantatis di buine famee de citât. So pari alore lu veve menât cun lui a Udin, dulà che al faseve il miedi.
Goldoni al descrîf il viaç, rivant prime a «Porto-Gruero, piçule citât tal ôr dal Friûl» li che sô mari e veve cualchi rendite tal palaç de Comunitât, po traviersant a vât il Tiliment par vie che no ’nd jere puints, e alfin rivant a Udin, capitâl dal Friûl venit. A chest pont al fâs une digression par maraveâsi che i viazadôrs par solit no segnalin cheste largje e biele provincie, logade de Marche trevisane fintremai ae Carinzie, che e merete in puest onorevul. Al precise ancje che il Friûl al è dividût dal Lisonce (cussì al clame il flum par francês) jenfri la Republiche di Vignesie e i Stâts austriacs, cun Gurize capitâl di cheste seconde part.
Dopo di vê ricuardât che la provincie e à tante nobiltât e che a Udin al esist un privileç unic in dute Italie, vâl a dî un Parlament de Patrie là che si riunissin i stâts (classis sociâls, tal sens francês de peraule), Goldoni al fâs presint che il Friûl al à furnît grancj oms aes dôs nazions, sedi ae Cort di Viene che al Senât venezian. Nol dismentee l’impuartance storiche dal Patriarcjât di Aquilee, scancelât pôcs agns prime cu la formazion di doi Arcivescovâts di Udin e Gurize.
Simpri des sôs memoriis, si ven a savê che i cjamps a son avonde curâts, cun forment e vin di otime cualitât e cun prodots bondants, tant che i vignâi furlans di Picolit «che a imitin tant ben il Tokay» a furnissin la gran part des necessitâts di Vignesie.
Goldoni al fâs un lunc e curiôs discors sul lengaç furlan, «speciâl e dificil di capî, come il gjenovês, ancje pai Talians», cu lis peraulis al feminîl che no finissin in a come par talian ma in e come par francês, e cussì i plurâi in s, e cuntune cuantitât di no crodi di peraulis francesis jentradis dentri, forsit par vie di Giulio Cesare. Altri fat singolâr, par lui, al è che i furlans a clamin sere la gnot e gnot la sere. Ma al conclût che lis letaris a Udin a son coltivadis, e esist une academie leterarie, a son artiscj di gran merit e la societât e je une vore amabil. La citât e je biele, cun glesiis ben ornadis di oparis, borcs d’incjant e dintors deliziôs come Passarean dai conts Manin.
A Udin, Carlo Goldoni al conte di jessi tornât a cjapâ i studis, cuntun cors di Dirit civîl e canonic tignût dal innomenât jureconsul Movelli, tant che al à vût «gjavât plui profit ta chei sîs mês che tai trê agns di Pavie».
Ta chel timp, però, il zovin Goldoni si imbarcje in dôs aventuris sentimentâls che i dan plui problemis che no sodisfazions. Sul imprin, al bute il voli suntune biele fantate che al viôt in glesie e a spassizâ; jê no si inacuarç di lui, ma la massarie si vise des sôs atenzions e si ufrìs di judâlu par fâ di mediazion cu la sô parone. Lui al mande letaris e regâi di valôr cence otignî risultâts, fin che si rint cont di jessi stât imbroiât de massarie che si veve tignût dut. La seconde volte al riscje ancjemò di plui, cu la fie di un ostîr, che i da un apontament in cjamare, di gnot e disint di jessi bessole. Al contrari, al moment just e salte fûr la mari che e fâs un grant scandul se lui nol promet di riparâ cul matrimoni.
Al moment Goldoni al promet, ma il dì dopo al scjampe di corse a Gurize, là che il pari al jere a curâ la salût dal cont Lantieri, lûctignint dai esercits dal imperadôr Carli VI. Si ferme te citât imperiâl e te residence dai Lantieri a Vippach par cuatri mês, fintremai che il cont al vuarìs, e intant al visite Lubiane, Graz, Triest, Aquilee e Gardiscje. Dopo, al torne in Venit par Chiozza, preant so pari di cjapâ la strade di Palme, par stâ a la largje di Udin e dal pericul dal matrimoni.
Giuseppe Mariuz