La passion pai esercizis fisics, l’interès pai spetacui agonistics, l’entusiasim par lis competizions sportivis no son un fenomen tipic dome de nestre ete, ma a son un cjapitul sugjestîf de storie de civiltât, tant che manifestazion di costum che come aspiet particolâr di une concezion de vite.
I Zûcs olimpics a cjatin, in cheste suaze, un puest impuartanton. Inte celebrazion rituâl de antichitât a àn clamât dongje fulugnis di int par passe un mileni. Te ricercje simpri plui continue e spetacolâr dai limits des fuarcis umanis e tal perfezionament des pussibilitâts tecnichis e organizativis dal sport, i sports olimpics a àn marcât tancj progrès tal ultin secul.
Daûr de leiende, al fo Ercole (o Eracle), l’eroi des dodis fadiis e de fuarce straordenarie, a meti sù i zûcs. Si conte che al fondà i zûcs dopo de setime fadie: dopo di vê netât lis stalis dal re Augie, che no i de ce che a jerin dacuardi, al fiscà il teritori copant Augie cun ducj i siei fîs. Par ringrazià Zeus al convocà lis garis a Olimpie che a parteciparin ancje Apol e Marte.
Dopo cualchi secul di dismentie, al fo Ifit, re di Elide, che al tornà a meti in pîts la manifestazion e le clamà Olimpiade. Daûr di cierts calcui e daûr di ce ch’al conte Pausanie (storic e gjeograf dal II secul p.d.C.), si prossume che al sedi stât il 776 p.d.C.
Si à di rivâ ai 5 di Avrîl dal 1896, cuant che i zûcs a tornarin te storie par merit dal baron Pierre de Coubertin. Quantum mutatum ab illo. Ancje tai vieris zûcs si à praticât la coruzion, l’ingjan e si à vût paiât i atletis. In dì di vuê a son deventâts i zûcs mediatics, i zûcs dai sponsors, dai vincidôrs che, sì si vuadagnin la medae olimpiche, ma ancje un assegn cun cinc zeros par une vitorie.
Nus plasarès pensâ al zûc, ae gare viodude tant che moment ultin di une preparazion fisiche, mentâl e culturâl (sì, ancje culturâl) intun confront cun altris, no cuintri altris. Nus plâs viodi chê biele zoventût di dutis lis bandis dal mont cu lis lôr musis e la lôr piel ch’a son espressions maraveosis de diviersitât, de bielece dal Creât. E nus torne tai voi l’imagjin dal zovin gjamaican intant ch’al cor: une maravee, un cuadri, une sinfonie, di une armonie e di une bielece che nus revochin une vite fisiocratiche, pensade ma magaricussinò mai metude in vore, dai Ilumiscj.
Nus plâs viodi i zûcs tant che un spetacul grandonon di cheste zoventût di dutis lis razis, di dutis lis religjons, di dutis lis culturis. Jodi chei zovins biel ch’a saltin, ch’a corin, ch’a tirin, ch’a si pochin par butâ un balon in puarte. Viodiju cui lôr cjavei (bionts, tant che l’aur dal soreli ch’al va amont tes tieris scandinavis), cu lis lôr piels (cul colôr de tiere dai zovins andins, di une incontaminazion di salustri dal mont), cui voi mandulâts dai asiatics ch’a pandin sorprese, maravee par sei li! Ce spetacul il mût culturâl di metisi te competizion: l’albasie, il zuiâ onest (fair play) dai nordics, la furbetât e l’ingjan dai latins, la sudizion dai africans, la estemporanitât e l’estetisim dai brasilians, la solaritât e spontanitât di zûc dai asiatics, la poltronarie dai balcanics.
Ma vignint a la Piçule Patrie, a son tancj i atlets furlans ch’a àn fat i Zûcs Olimpics: si son fats simpri onôr e i plui braos a àn vinçude ancje une medae. Al fo Alessandro Pirzio Biroli il prin, a Londre dal 1908, che al cjapâ ancje la medae d’arint ta la siabule a scuadris. O podìn ricuardâ achì i campions olimpics tal fobal di Berlin dal 1936 cun Alfredo Foni di Udin e Annibale Frossi di Muzane; Virginio Pizzali, campion di inseguiment di ciclisim a scuadris tal 1956 a Melbourne. A Tokyo al jere stât medae d’arint Giorgio Ursi, di Gurize, tal inseguiment individuâl. Tal ciclisim, ancje Gino Pancino si jere cjapade la medae di bronç. Franco Bertoli, di Dedeà, al vincè ta la bale al svol la medae di bronç dal 1984 a Los Angeles.
Tai Zûcs di Atene dal 2004, Gianmarco Pozzecco, ta la bale tal zei, al veve vinçût la medae d’arint. No vin di dismenteâ il zei (miôr, la cosse) di medais puartadis a cjase ta lis Olimpiadis d’Unvier tal ski di font e la saghe da la famee Di Centa di Paluce (Manuela e so fradi Giorgio), di Gabriella Paruzzi di Tarvis e cui atlets Pietro Piller Cottrer e Silvio Fauner, dal Cjadovri. Si po calcolâ vincidôr di tantis medais ancje l’alenadôr da la scuadre di scherme Andrea Magro. E je stade chê di un’altre fantate, Chiara Cainero, di Cjavalì tal skeet (tîr al platut) la prime medae d’aur al feminîl.
Tai Zûcs ultins, chei di Londre, Daniele Molmenti al à vinçût la medae d’aur te canoe K1. Ta lis Paraolimpiadis di Londre al à vint une medae di bronç Michele Pittaccolo, di Vil di Var, tal ciclisim. E cumò ch’a son in partence, trops furlans àno preparade la valîs par Rio? O vin di dî tropis, tratant ch’o vin dome fantatis: Alessia Trost di Pordenon tal salt in alt, Alice Mizzau di Bean ta la nadazion e ancjemò Chiara Cainero tal tîr al platut. Però o vin di zontâ ancje, par lis Paraolimpiadis, Gaia Rossi e Giuseppe Vella de scuadre di ping-pong di Borc San Roc di Udin. Fintremai tal ultin e veve sperât di jentrâ, come a Londre 2012, ancje la bravissime spadiste di Cjarlins Mara Navarria: coragjo Mara, al sarà par la prossime volte.