A son 666 agns di cuant che ai 6 di Jugn dal 1350 il beât Bertrant al fo sassinât intes planis de Richinvelde; daûr di une tradizion lungje e antighe, al vignarà memoreât cun messis e cerimoniis intal puest, ma di cualchi timp ancje inte sô patrie, la ocitane Montcuc (Montcuq par francês), stant che intal 2008 e je nassude di chês bandis une fradaie, Les amis de Bertrand de Saint-Géniès e il Comun al è zimulât cun chel di Sant Zorç (de Richinvelde).
Al è stât om di glesie, om de politiche, om des vueris, om che al cirive la pâs, om dal dirit, om de diplomazie: o vin di jessi grâts al professôr Giordano Brunettin di Pordenon par vê editât, tal 2004 pal cont dal Centri Internazionâl di Studi sore la Alte Ete di Mieç di Spoleto, un libri di ricercjis scrupolosis e critichis sul beât Bertrant patriarcje di Aquilee (agns 1334-1350). Une vore di studis a son burîts fûr prime e dopo ancje intes rivistis de Filologjiche (par esempli Andrea Tilatti e Erica Martin intal "Ce fastu?"), ma la vore di Brunettin e reste fondamentâl e magari o podìn sperâ suntune continuazion. Ma cui jerial pardabon Bertrant? Dai nobii di Sent Geniés (francês Saint-Géniès) al nassè intal cjastiel di Montcuc inte regjon dal Carcin (Quercy): la leiende agjografiche e dîs tal 1258-1260, ma al samee che la datazion juste e sedi no prime dal 1280, come che al calcolà Pier Silverio Leicht.
Il prin at che lu menzone al è dal 1311 e di chê volte al è simpri nomenât tant che professôr universitari di dirit canonic e civîl: e par podê mantignî la sô vite di studiôs al metè dongje une biele filze di beneficis eclesiastics. Leât al pape, che al jere ancje lui ocitan, si stabilì a Avignon, là che si veve trasferide la cort pontificie e al deventà predi. Propit par chestis relazions, par jessi ben considerât e pai siei merits, ai 4 di Lui dal 1334 al deventà patriarcje di Aquilee. Stant che la situazion in Friûl e in chês altris tieris dal patriarcjât e jere un grum ingherdeade, il pape i tribuì podês speciâi e ancje une dotazion finanziarie straordenarie. La Glesie di Aquilee e jere plene di debits, disseparade di dentri, menaçade di potencis di fûr: ducj berdeis e dificultâts, ma tal stes timp l’ufici dal patriarcjât al jere prestigjôs e impuartant par un om ambiziôs e vivarôs.
Bertrant al guviernà il patriarcjât par sedis agns e o podìn rimarcâ – dentri di un disen e di un impegn unitaris – cuatri aspiets: la politiche internazionâl, la politiche interne, la politiche eclesiastiche diocesane, la politiche eclesiastiche provinciâl. Pai prins doi cantins, Bertrant al doprà doi imprescj: di une bande la vuere, di chê altre la diplomazie. Conts di Gurize, duchis di Austrie, Caminês, republiche di Vignesie a forin i aversaris, intun cun fameis cjastelanis, comunitâts, sociis di feudataris. Bertrant al scugnì ancje mantignî un ecuilibri jenfri i interès dal pape e chei dal imperadôr, jenfri vuelfs e ghibilins, stant che no simpri lis sieltis de Glesie universâl a jerin chês de Glesie aquileiês.
Dentri dal Friûl, il patriarcje al poià simpri di plui Udin e i Savorgnan che le paronavin, cussì la citât si trasmudà inte capitâl de Patrie, gjavant cheste funzion a Cividât. Ma nol bandonà Cividât, cirint di svilupândi la vocazion universitarie, regalant libris al Studium che al jere stât viert dal patriarcje Otobon. Però no vin di dismenteâ che Bertrant al jere vescul de sô diocesi, la plui grande de Europe: a traviers di riformis, statûts, sinodis al jentrà inte vite religjose di predis, fraris, muiniis, fedêi par puartâ ordin, par dissiplinâ lis struturis, par stiçâ la devozion e la caritât. Intai afrescs esaltatîfs piturâts daspò de sô muart, lu viodìn amì dai puars.
Al jere no dome vescul, ma ancje patriarcje, vâl a dî vescul parsore di altris vescui, a cjâf di une provincie che e partive de Lombardie e e rivave in Slovenie, de Istrie al Venit e ae Austrie: Bertrant al à pretindût rispiet e sotanance de bande dai oms de glesie che a partignivin ae sô metropoli. Dut chest sfuarç, che al staronzave podês e interès, lu condanà: une schirie di cjastelans furlans e conzurà cuintri di lui, lu spietarin ae Richinvelde e lu coparin. E ancje se altris patriarcjis a ciririn di puartâ ordin inte Patrie, il destin dal patriarcjât politic di Aquilee al jere aromai segnât.