Al è cun grant plasê che o puarti, a ducj i amîs de Societât Filologjiche Furlane, ai studiôs e ai cultôrs dal Friûl, il plui cordiâl salût di benvignût tal sît internet dal nestri Istitût. Al è un sît che si presente rignuvît di plante fûr, te grafiche e tai contignûts, par favorî comunicazion e interazion cui utents, un strument di informazion su la realtât culturâl furlane tal so complès e, in mût particolâr, su lis ativitâts dal nestri Sodalizi. La gnove impostazion e je pensade no dome par facilitâ la ricercje di informazions, ma ancje par stiçâ la curiositât di cui che si coleghe al sît, parcè che al è impuartant cjatâ, magari, plui di chel che si cîr.
Il sît al presente la storie, la struture, l’organizazion, lis ativitâts de Societât Filologjiche Furlane, la produzion editoriâl, cu lis rivistis periodichis e lis altris publicazions, la fuarte rêt di relazions e di colaborazions cun altris sogjets istituzionâi, furlans e no furlans. Atenzion particolâr e je dediade ai nestris events, ai nestris incuintris, ai cors di lenghe e culture furlane su dut il teritori regjonâl, ai cors di formazion pai insegnants, ai progjets di ricercje e di divulgazion, ae presentazion de ultime produzion su cjarte e multimediâl. Jentrant tal sît al è pussibil ancje fâ une visite virtuâl di Palaç Mantiche e dai siei tesaurs di art, la vere “Cjase de culture furlane”, consultâ il catalic in rêt de Biblioteche, l’archivi fotografic di Ugo Pellis e chel des cartulinis storichis, domandâ e dâ informazions su la realtât culturâl e sociâl dal nestri Friûl.
Il sît de Societât Filologjiche al è duncje simpri di plui vitrine dal Friûl e al servizi dal Friûl, ocasion par cognossi miôr la nestre Tiere e par cognossi miôr ancje ducj chei ch’a lavorin pal sô ben. Buine navigazion!
Il President Federico Vicario