Disìn la veretât. Il Friûl nol à tratât masse ben Pier Paolo Pasolini cuant che al jere chi di cjase. Al di fûr dai vêrs amîs che cun lui a condividevin lis ideis e lis seradis cuntune fete di salam e un tai di vin, e dai arlêfs che lu adoravin, par ducj chei altris e je stade une liberazion viodilu scjampâ vie.
La cause e jere sclopade par vie di une denunzie par atti osceni che no vevin puartât nissune violence, cuant che tal stes timp altris câs plui grâfs di pedofilie cun int di glesie a vignivin platâts. Al jere bastât chel par gjavâi il puest di professôr di scuele e la tessare dal Pci par «indegnitât morâl». Une volte lassât bessôl dai comuniscj, a finivin cu la sô fughe ancje i scuintris cui democristians, che lui al acusave di no seguî l’insegnament dal Vanzeli, e i contrascj cui stes autonomiscj furlans, come che cun onestât al à scrit D’Aronco tal libri Pasolini veduto e corretto. Juste la Filologjiche, par merit soredut di Luigi Ciceri, e veve tignût cun lui cualchi râr contat.
Par capî la disperazion ma ancje la nostalgjie viers la tiere che lu veve bandonât, al baste lei la poesie Conzeit, scrite cualchi an dopo a Rome: «Romai essi lontans a val, / Friùl, essi scunussùs. A par / il timp dal nustri amòur un mar / lustri e muart. / In ta la lus la to part / a è finida, no ài scur tal sen / par tignì la to ombrena».
A distance di cuarante agns de sô muart, o vin un altri pericul: che i erêts di chê gjenerazion furlane che e veve condanât Pier Paolo Pasolini cence apel si metin vuê a santificâlu tes manieris plui strambis, par fâsi publicitât e profitant ancje di cualchi franc des istituzions publichis.
Alore, al è ben ricuardâlu come che lui stes si definìs intune altre poesie, Tornant al paìs: «Un Fì nassut lontan / tal mond dai borgheis / cun in man la bandiera / da li Novitàs, scolàr / dal Scandul, erèit da la Rivolussion / al è muart di amòur / par un mond di fuèis / bagnadis da la ploja (…)». In efiet, la cariche trasgressive di Pasolini e je partide dal Friûl, dulà che al à fat scandul, prin di dut savoltant tantis sigurecis di une culture lontane dal popul. Propit la sielte di stâ de bande dal popul e no dai sorestants lu à svicinât al mût di esprimisi dai fantats di Cjasarse e dintors, a chel fevelâ furlan tirât fûr di bocje e dai cjamps e metût pe prime volte par scrit tai Stroliguts. Un furlan plui vîf di une leteradure taliane nassude a taulin. Cul timp, l’afiet pai zovins contadins e zornalîrs, puars, sclets e gjenerôs, che si batevin cence rancûrs e cuasi legris cuintri lis inicuitâts, lu sburte su posizions politichis marxistis, ferbintis ma no dogmatichis. Plui indevant tai agns, al ricuarde al gjornalist Jon Halliday: «mi soi svicinât al marxisim stant cu lis lotis dai contadins furlans. Se si fos tratât di comuniscj de classe operarie citadine, al varès stât masse fuart pai miei guscj».
Di fat, la sô propagande le fâs cun parabulis di stamp evangjelic, metudis fûr de Loze di San Zuan, che a mostrin un Crist dongje de puare int e no dal aur de Glesie. A ’nd ere a vonde par tirâsi cuintri gran part de societât furlane, che no spietave nuie altri che viodilu colâ suntune cuistion morâl.
La sô vite a Rome tes barachis di periferie, e dopo vie pal mont, cu la machine di prese in paîs dismenteâts di Asie e Afriche, e coreve daûr di un sium çoncjât in Friûl: l’inocence de zoventût, la purece che no fos corote dal podê e dai bêçs. Cussì tai films Accattone, Mamma Roma, La ricotta, Dove sono le nuvole? e vie indenant. Un sium simpri plui dificil di cjatâ, che i stiçave la provocazion, come abolî la television e la scuele dal oblic, fin a fevelâ di un gjenocidi culturâl, par colpe di une persuasion oculte che e creave une pierdite dai valôrs, la «omologazion».
Vuê, il Friûl si ten il so cuarp martoriât, e tal cimitieri di Cjasarse e rive int di dut il mont a rindii onôr. A Pier Paolo Pasolini e va ricognossude une vôs profetiche, no par vie che al ves dotis sorenaturâls, ma la capacitât di capî come che si trasformave la societât, cul riscli di pierdi autonomie e identitât. E alore, nuie di miôr che ricuardâlu rispietant e tignint vivis dutis lis diferencis, linguistichis, etnichis, religjosis, sessuâls, batintsi pai valôrs sclets e no pai «mil francs» in pi che a tentin di comprâti.