Domenie ai 17 di Otubar dal 2021, a Vençon, si è davuelt il XCVIII Congrès de Societât Filologjiche. La prime volte a Vençon e jere stade 50 agns prin, tal 1971, e anime di chê cunvigne al jere Vigji Ciceri, che di Vicedean dal Sodalizi al à vût lavorât cence padin a pro de valorizazion e de promozion dal patrimoni culturâl, storic e tradizionâl dal Friûl. La figure di Ciceri e je stade ricuardade di bande di Gianfranco Ellero, intant che Enos Costantini al à fevelât dai cogoçs e dal lôr leam cun Vençon.
In colaborazion cu la Aministrazion comunâl, la Plêf di Sant Andree apuestul e la Pro Loco Pro Vençon - e tal rispiet des normis cuintri dal Covid-19 - il Congrès si è davuelt cun sucès tal domo di Sant Andree, tacant cu la Messe par furlan e po dopo lant indevant cu lis voris. Dongje dal Sindic Amedeo Pascolo, che al à dât il benvignût di bande de comunitât, a àn puartât il salût cetancj sorestants istituzionâi e rapresentants des associazions che a lavorin a pro de identitât furlane.
In Congrès al è stât presentât il
Numar Unic Vençon rincurât di Aldo Di Bernardo, Paola Fontanini e Fausto Stefanutti, che in 898 pagjinis al cjape dentri cetancj contribûts sul teritori, la storie, lis tradizions, la lenghe, l'art, la int e lis associazions dal puest. A son stâts ancje premiâts i vincidôrs de
XX edizion dal Premi "Andreina e Luigi Ciceri" intitulât propit ai doi grancj studiôs, om e femine, des tradizions popolârs di cjase nestre e che ogni doi agns al premie studis su apiets de culture e dal teritori dal Friûl.
Te sezion download in cheste pagjine si pues discjamâ e lei il discors dal President de Societât Filologjiche Furlane Federico Vicario.