Domenie ai 2 di Otubar dal 2022 si è davuelt il XCIX Congrès
de Societât Filologjiche, che e je tornade a Spilimberc pe cuarte volte inte sô storie, dopo des cunvignis dal 1926, 1946 e 1984.
La zornade si è vierte cu la Messe par furlan in domo e lis voris si son tignudis tal teatri Miotto, cul benvignût dal Sindic e i salûts dal president de Scuele Mosaiciscj dal Friûl (che chest àn e ricuarde i cent agns di fondazion) e di tancj altris sorestants che a àn volût jessi presints in cheste impuartante ocasion. Des bielecis storichis e artistichis di Spilimberc al à fevelât Federico Lovison, intant che Angelo Bertani al à presentât la figure e la opare dai artiscj Italo Zannier e Nane Zavagno.
Al è stât ancje presentât il Numar Unic "Spilimberc", par cure di Gianni Colledani e Marco Salvadori, e a son stadis lis premiazions dai miôr progjets didatics sul Friûl e par furlan che a àn partecipât ae VI edizion dal Premi "Chino Ermacora" - Scuele e marilenghe.