Cjârs Cunfradis, Autoritâts e Amîs,
al è cun grant plasê che us puarti ancje jo, a non de nestre Societât Filologjiche, il plui cordiâl benvignût a chest Congrès di Colorêt, dopo di vê scoltât lis peraulis di salût dal Sindic e dai sorestants ch’a son chi cun nô. Un salût particolâr a chei ch’a vegnin di plui lontan, dal Venit e di Triest, ai rapresentants di altris associazions dal teritori, ai reladôrs ch’o vin scoltât cumò denant e ai colaboradôrs dal Numar Unic, ch’o presentìn ca di pôc.
Al è di cualchi timp aromai che, cuntune programazion plui “lungje”, plurienâl, des manifestazions sociâls, o rivìn a lâ in localitâts che ancjemò no vevin fat il Congrès: ancje culì a Colorêt e je une prime volte. E je une prime volte intune comunitât, ch’e onore il Friûl cu la memorie e il spirt dai siei vons, no mancul che, in dì di vuê, cu la dedizion, cul lavôr e cul impegn dai siei citadins, une localitât là che si sint a fuart il revoc di chê definizion cussì biele, par nô, di Friûl “piccolo compendio dell’universo”, une definizion che cun braùre o fasìn nestre e o puartìn tant che bandiere dal nestri jessi furlans. Sì, parcè che propit chi a Colorêt, scune di leteradure e di art, Ippolito Nievo e prime di lui il grant Ermes di Colorêt, pari de puisie furlane dal Sîscent, a scoltavin e a capivin la vôs de nestre Tiere, a vivevin lis emozions di cheste nature, tra aghis e culinis, a scrivevin pagjinis ch’a son restadis patrimoni de nestre int. Ancje nô o sin clamâts a scoltâ cheste vôs e a vivi cheste nature, o sin clamât a capî il sens profont di cheste armonie e a trasmetilu ai furlans di doman.
Cun chest di Colorêt dal 2018 o sin rivâts a cuote novantecinc pai Congrès – ancje se la Societât di agns a’nd à di plui, esatamentri novantenûf, e o sin simpri plui sot cul Centenari di fondazion, che nus capite l’an cu ven. Ma prime di cjalâ indenant e frontâ il discors dal Centenari, o ai miôr di dâ un cuc indaûr, al an di ativitât ch’o vin a pene passât.
Chest an par nô al è stât un an impegnatîf, une vore impegnatîf. A partî de scuele. O savês ch’o vin inviât di doi agns, in convenzion cu la Regjon e l’ARLeF, il DocuScuele, il Centri di documentazion ricercje e sperimentazion didatiche pe scuele furlane, une struture ch’o vin di fâle cressi e di metile in condizions di operâ simpri di plui e simpri miôr: pe formazion e informazion dai insegnants, pe produzion dai materiâi e pe inovazion de didatiche, massime te scuele de infanzie e te primarie. E i numars, o domandi scuse se ju doi, a son impuartants. O vin 856 docents iscrits al DocuScuele, o rivìn plui o mancul a 400 progjets e materiâi didatics cjamâts sul sît (il patrimoni librari al è ancjemò plui grant: a son passe mil i volums su la scuele furlane e la leteradure pai fruts logâts in biblioteche), o vin inviât colaborazions e contats cun passe 700 sogjets – o ripet, passe 700 sogjets – tra ents publics e istituzions scuelastichis, insegnants, ents privâts e specialiscj de formazion e de didatiche. Lis manifestazions plui impuartantis a viodin simpri une partecipazion une vore alte di docents: la tradizionâl Zornade de scuele furlane (“Marilenghe e Mariscuele”), che si ten a Codroip in ocasion de Fieste de Patrie, e à contât chest an 127 iscrits a ’seminaris e laboratoris; il cors intensîf di scriture di trente oris, in Lui, al à vût 47 iscrits, ducj insegnants in servizi; i trê dîs de furtunade Scuele d’Avost, a Aplis di Davâr, e à contât 89 iscrits. No dîs nuie de gnove edizion di Olmis, la numar vincjecinc, ch’o vin dât fûr in 24.000 copiis ai fruts de scuele primarie; no dîs nuie dal boletin Scuele furlane, ch’al informe su lis novitâts di chest setôr, disponibil su cjarte e in formât eletronic; no dîs nuie nancje dal progjet InterReg Eduka, di colaborazion transfrontaliere tra Friûl e Slovenie, cu la partecipazion di scuelis, Universitâts e altris Istitûts culturâi; e no dîs nuie, alore, nancje dai laboratoris e dai materiâi dal progjet par cognossi la Vuere dal ’14-’18 in Friûl, un progjet che nus à dât bielis sodisfazions di partecipazion di insegnants, studiôs e public. La scuele regjonâl, duncje, nus domande atenzion e cheste atenzion le vin rapresentade ae gnove Assessore ae Istruzion, Alessia Rosolen, prime di dut par dâ continuitât al DocuScuele, ma ancje par viodi di cjapâ sù diretamentri nô, in Filologjiche, chês funzions di servizi ae comunitât furlane ch’o sin in stât di garantî, cu la formazion dai docents in servizi e la produzion dai materiâi didatics.
Ma il secont discors, fondamentâl, al è chel de promozion de lenghe e de culture furlane, parcè che ancje su chest cantin o vin di dâ continuitât a lis iniziativis in cors. A partî de Setemane de culture furlane, la rassegne regjonâl plui impuartant che si ocupe di promovi lenghe, culture e identitât di chenti. I numars de Setemane de culture, chest an dai 10 ai 20 di Mai (l’an cu ven e je dai 9 ai 19 di Mai), a son simpri plui interessants: i comuns di Gurize, di Pordenon e di Udin e altris 59 comuns; 80 associazions, prolocos, parochiis, grups corâi e teatrâi; 130 apontaments, cun 21 conferencis e cunvignis, 32 incuintris e presentazions, 16 visitis sul teritori e mostris, 20 spetacui teatrâi e concierts, passe 40 iniziativis pai fruts. Ma no dome Setemane de culture, naturalmentri. Altris iniziativis, dilunc dal an, nus àn viodûts organizâ, su dut il teritori regjonâl, passe 60 iniziativis e manifestazions, incuintris e presentazions editoriâls, mostris e cunvignis, ancje tal ambit des rassegnis de Fieste de Patrie dal Friûl, di Friuli DOC a Udin, di èStoria a Gurize, di Identitât e autonomie, dal Premi San Simon a Codroip.
O lavorìn ancje sui bens culturâi, pe valorizazion dal nestri patrimoni materiâl e imateriâl, là ch’o sin, come ch’o savês, l’unic Istitût culturâl che il MIBAC (il Ministeri pai bens culturâi) al à acreditât in Regjon. Propit doman, par esempli, o presentìn in Fondazion Friûl – e no ringraziai mai avonde il President Morandini, ch’al è chi cun nô, pal aiût che la Fondazion nus dà, di chest an cuntune convenzion di colaborazion organiche – il portâl des rivistis furlanis e dai Numars Unics. Ma o sin impegnâts ancje te rêt dai istitûts culturâi ch’a promovin l’identitât dal Friûl (Deputazion di Storie Patrie, Academie di Udin, Academie San Marc di Pordenon, Istitût Pio Paschini pe Storie de Glesie, Universitât popolâr di Udin), tai progjets di cooperazion internazionâl, tes relazions cui istitûts ladins e cui istitûts di culture talians. Par no dî, naturalmentri, di dute l’azion di promozion de lenghe e de culture furlane puartade indenant, ogni dì, sul teritori regjonâl (chest an o vin inmaneât 24 cors pratics di lenghe e culture furlane cun 526 iscrits ch’a àn frecuentât almancul il 70% des 24 oris di lezion, in 12 incuintris) o cu la nestre Cjase de culture furlane, valadî la sede di Udin di vie Manin, ch’e je rivade a dâ acet chest an a 122 events, 44 nestris e 78 tra Academie di Udin, Deputazion di Storie, Amici dei Musei, Amici della Musica, Associazion teatrâl furlane, Societât furlane di archeologjie, Ordin dai gjornaliscj, Ducât dai vins e variis altris associazions. E dopo o vin dut il discors des publicazions, tra rivistis e monografiis, dai servizis al teritori, de fondamentâl ativitât de biblioteche sociâl, ricognossude di interès regjonâl pe comunitât furlane.
Ce vuelial dî dut chest? Dut chest al vûl dî, seont di me, che la Societât Filologjiche Furlane e je centrâl, simpri di plui, tal contest culturâl dal Friûl, e ch’o vin aromai plen titul par ocupâsi, cul just ricognossiment, des funzions ch’o ai dit cumò denant. O domandi, par concludi, une forme di integrazion plui “fative” e plui fuarte tra public e privât, o domandi che la Regjon e ricognossi ad implen il lavôr dal nestri Istitût e chest lu domandi no parcè ch’al sedi just o parcè ch’al è un secul ch’o lavorìn a pro de nestre culture – ancje se just al sarès pardabon e propit par cheste reson – ma parcè che chest ricognossiment al conven a dute la comunitât regjonâl, parcè che la Societât Filologjiche e je l’uniche struture ch’o vin e ch’e funzione cun cualitât e continuitât tal setôr de promozion de culture e de identitât dal Friûl. O sintìn ogni moment la peraule “sussidiarietât”, une biele peraule ch’e spiete di jessi aplicade ancje chi di nô, parcè ch’e je il risultât di une buine pratiche, si disarès, parcè ch’e rive a produsi, la sussidiarietât e l’integrazion des competencis, lis rispuestis che la nestre comunitât nus domande. E je rivade l’ore di resonâ par consolidâ cheste prospetive: la Regjon no pues rivâ pardut e no à nancje di rivâ pardut, o vin di pontâ su chei ch’a san fâ e ch’a àn voie di fâ, o vin di ricognossi la cualitât e la continuitât dai risultâts, la serietât, la moralitât e lis capacitâts operativis dai sogjets interessâts.
Cu la serenitât di vê fat dut ce che si podeve fâ e cu la ferme volontât di continuâ a fâlu, o lin a preparâ, pal an cu ven, lis manifestazions dal Centenari di fondazion, une fieste par dute la Furlanie. Cheste fieste le fasarìn a Udin, la capitâl dal Friûl, e a Gurize, la citât là ch’o sin nassûts ai 23 di Novembar dal 1919, une fieste ch’e sarà soredut un impuartant moment di riflession, critic e no agiografic, suntune istituzion, la Societât Filologjiche, che dilunc dal ultin secul e à segnât lis vicendis plui decisivis de nestre storie culturâl e civîl. Il Numar Unic al à za in lavorazion, naturalmentri, par cure di Andrea Tilatti, i progjets a son tancj e o cirarìn di fâ dut pal miôr.
O passi a concludi cui ringraziaments a chei ch’a àn lavorât pal bon pro dal nestri Congrès di Colorêt. Prime di dut lu ringrazii lui, siôr Sindic, e cun lui dute la zonte, il consei comunâl e lis struturis dal comun; o ringrazii la popolazion di Colorêt pal bon acet che nus à dât, pe colaborazion te redazion dal Numar Unic, pe disponibilitât a condividi programs e iniziativis ch’a compagnin la nestre fieste. Un ringraziament, no formâl, ai reladôrs ch’o vin scoltât prime, a lis associazions ch’a àn colaborât a cheste zornade di fieste, cul conciert ch’o varìn prime di gustâ, a lis vuidis che nus permetin la visite al Cjastiel, a pre Daniele Calligaris pe Sante Messe ae fin di cheste zornade e a lis corâls ch’a compagnaran la funzion.
L’agrât plui grant di ducj, pardabon speciâl, al è però pal curadôr dal Numar Unic, Carlo Venuti, il nestri Vicepresident, ch’al à rivât a intepretâ cussì ben il spirt di chest teritori, come ancje par ducj i colaboradôrs di cheste monografie, un grant tesaur pal Friûl. Par nô dî, naturalmentri, dal personâl de nestre Societât, il Diretôr Feliciano Medeot, cun Marilena, Daniela, Katia, Alessandra, Elena, Antonella e Cristina, ma ancje i volontaris dal servizi civîl nazionâl, che nus judin cun tante buine volontât e passion.
Pal an cu ven, l’an dal Centenari, o sarìn a Udin. A son ancje altris lis localitâts che nus spietin e che magari no sin ancjemò stâts, cul Congrès: ma, come ch’o dîs simpri, la Societât Filologjiche Furlane e à buine memorie e o rivarìn par dut.
Buine fieste a ducj nô!
Federico Vicario
Dean de Societât Filologjiche Furlane