Cjârs Cunfradis, Autoritâts e Amîs,
al è cun grant plasê che us puarti, a non de nestre Societât Filologjiche, il plui cordiâl benvignût al Congrès di Mueç, ta cheste biele curnîs di int rivade di dut il Friûl, dal Venit e di Triest. Al è di cualchi an ch’o rivìn a lâ in localitâts che no vevin fat il Congrès e ancje culì a Mueç e je une prime volte, une prime volte intune comunitât che si nudrìs pardabon dal spetacul di chestis monts, di cheste nature ancjemò inviolade, di chest aiar fresc e net, ma ancje di fede e di storie, di art e di tradizions, di culture e di lavôr. Une comunitât, chê di Mueç, di int dinamiche e laboriose, une comunitât ch’e rapresente al miôr il spirt de nestre int, ta cheste tiere in contat cul mont todesc e slâf; une tiere di convivence e di rispiet; une tiere di int che nissun no i à mai regalât nuie; une tiere di bon acet par chei ch’a vegnin di fûr, ma ancje salde tal so jessi e te sô identitât furlane; une tiere di cunfin, là che i cunfins – i “cjermins”, come che nus insegne Leonardo Zanier – no esistin plui e a lassin, di lôr, dome il ricuart, simpri plui smamît. E je propit cussì. Cuant che si passe in Carintie o in Slovenie, cu la machine, nancje no si inacuarzisi che si passe un cunfin: cheste e je une grande concuiste di civiltât dai ultins trente agns e cui cunfins fisics, materiâi, a colin ancje i cunfins mentâi, imateriâi, ch’a separin, par furtune simpri di mancul, popui fradis come i nestris, ta cheste Europe che no vûl plui savênt di divisions e di conflits.
Cun chest di Mueç dal 2017 o sin rivâts a cuote novantecuatri pai Congrès – ancje se la Societât di agns a’nd à di plui, esatamentri novantevot e o sin simpri plui sot cul Centenari di fondazion. Une biele sodisfazion rivâ a chest moment dal Congrès, dopo lis manifestazions di cheste ultime setemane, in preparazion de zornade di vuê, e cun altris manifestazions che nus spietin setemane cu ven e tal mês di Otubar. Un salût, inalore, ae comunitât di Mueç, al paron di cjase, il Sindic Giorgio Filaferro, e al President de Proloco, Renato Valent, che nus àn dât il benvignût cumò denant, ai rapresentants di ents e istituzions, in particolâr dal Ent Friûl tal Mont ch’al è nassût di une cueste de Societât Filologjiche, cuant che il Senadôr Tiziano Tessitori, Pari de Regjon autonome, al jere President de Filologjiche e ancje dal Ent Friûl. Al è fondamentâl cjatâ simpri gnûfs moments di colaborazion tra i nestris doi ents, che si ocupin di promovi l’identitât furlane e l’unitât de comunitât furlane, chenti e pal mont.
E propri pensant ae unitât de comunitât furlane us dîs, prime di dut: biade l’ore! Sì, biade l’ore che il Senât al à votât la norme par fâ tornâ Sapade te sô regjon storiche e naturâl, valadî il Friûl – no sai se al è il câs di comentâ il fat che l’unic vôt cuintri a cheste risoluzion (rispiet ai 187 a pro e ai siet o vot astignûts, se mi visi ben) al è stât chel di un senadôr elet in Friûl (no dîs ch’al è “furlan”, parcè che no sal merte). I sapadins no son mancul furlans di nô: anzit a son ancje plui furlans di nô, parcè ch’a àn scombatût une bataie lungje, dure e pesant par rivâ al risultât di viodi rispietade la lôr volontât di tornâ tal grim dal Friûl. E cussì o domandi formalmentri e cun fuarce a gjornâi e televisions di no fevelâ plui di une “localitât belunês” ch’e passe in Friûl, parcè che no je vere, no je cussì, ma de comunitât furlane di Sapade ch’e torne a cjase. Chest dal Senât al è un prin pas, impuartant, ch’al à di jessi ratificât ancje de Cjamare dai Deputâts, ma almancul al è un prin pas. Però, scusait, mi domandi: isal pussibil che intune democrazie, intun Paîs che si dîs democratic (ch’al vûl dî che il podê al è dal popul), par scomençâ a rispietâ la volontât popolâr e democratiche di une comunitât locâl ch’e vote al 95% par tornâ te sô Regjon naturâl, si vedial di spietâ dibot dîs agns? E no je ancjemò finide. No je finide no dome par Sapade, ma parcè ch’a son ancje altris i comuns ch’a domandin di tornâ in Friûl, comuns de Diocesi di Concuardie-Pordenon, dal vecjo Mandament di Puart, là che magari si fevele ancje furlan. Al è un teritori, chest, che cuant ch’e comandave Vignesie al jere te “Patrie dal Friûl” e cumò che Vignesie no comande plui nuie al è in Venit. Propit curiôs. Mi fermi chi.
O saludi ancje altris rapresentants di istituzions furlanis ch’a son chi cun nô, il President des Prolocos, Valter Pezzarini, il Delegât pe lenghe furlane de nestre Universitât, l’amì Enrico Peterlunger, il President dal ARLeF, Lorenzo Fabbro, il President de Assemblee de Comunitât lenghistiche furlane, Diego Navarria, dutis istituzions simpri dongje al nestri Istitût par ativâ colaborazions e inviâ progjets a pro de comunitât.
Il discors de colaborazion cu la Fondazion Friûl al è impuartant, fondamentâl par nô. Us conti dome chest fat. Joibe e vinars – îr l’altri – o jeri jù a Triest pe cunvigne anuâl de Associazion dai Istitûts di culture d’Italie, l’AICI, la cunvigne “Italia è Cultura. La cultura e l’identità europea” inmaneade cu la poie dal Ministeri pai Bens culturâi e cul jutori de nestre Regjon – e chi o vin di ringraziâ l’Assessôr ae Culture Gianni Torrenti, che lu saludi ancje lui. In ocasion de Assemblee di cheste Associazion, ch’e conte passe cent istitûts e fondazions di culture in dute Italie, mi àn invidât a tignî une relazion di salût, par dâ il benvignût te nestre Regjon tant che President dal unic istitût associât, apont, a cheste organizazion. E cussì o ai podût presentâ la storie e l’ativitât de Filologjiche ai ospits di fûr e invidâju a tornâ chenti tal 2019, cuant ch’o varìn lis celebrazions dal Centenari di fondazion. Ma nol è chest il pont. Il pont al è che, propit prime di me, al à fevelât Aldo Accardo, President de Fondazion di ricercje “Giuseppe Siotto” di Cagliari, un professôr di storie contemporanie, un amì, ch’al è stât ancje reladôr a Udin, in Filologjiche, ai nestris incuintris su la Grande Vuere. Poben, Aldo Accardo al è presentât il progjet di rêt tra lis istituzions culturâls de Sardegne, un progjet inviât di un an, plui o mancul, cu la poie de Fondazion Sardegne, la locâl Casse di Sparagn, un percors di federazion ch’al è duncje esatamentri ce ch’o vin fat chi di nô, cun sucès, cu la nestre Fondazion Friûl – e chi no pues no tornâ a dî, cun agrât, cetant che si è impegnât Lionello D’Agostini, par rivâ a chel risultât, Lionello D’Agostini che de Fondazion Friûl al è stât President, come ch’o savês, prime di Giuseppe Morandini. Si trate dal grant progjet “Identitât Culturâl dal Friûl”, un progjet di prospetive che nus viôt lavorâ dutun cu la Deputazion di storie patrie, l’Academie di Udin, l’Academie San Marc di Pordenon, l’Universitât popolâr di Udin e l’Istitût Pio Paschini pe storie de Glesie, une rêt di istituzions culturâls che si cunfide di podê slargjâ ancje a altris sogjets, par esempli la Societât furlane di archeologjie, il Museo Gortani di Tumieç o la Societât alpine furlane. Chest par dîus che lis buinis ideis no vegnin dome che a nô, ma ancje a chei altris: i sardegnûi, come nô, a àn pensât ben di federâsi, par contâ di plui, par fâ sintî plui alte la lôr vôs cu la Regjon autonome, par rispuindi a une domande di ricognossiment de identitât culturâl e dai valôrs ch’a rapresentin no dome l’anime, ma ancje la vision dal doman de lôr tiere. E chest lu vin fat ancje nô. No sai se cheste domande di ricognossiment di identitât e vedi une relazion particolâr cu lis condizions lenghistichis di chê regjon, che come la nestre e vîf intune condizion di plurilenghisim “normâl” – tal sens ch’e je la norme: e chi, a Mueç, e je une norme ancjemò plui vere –, ma dal sigûr e je une strade ch’o vin di percori cun buine volontât e decision, chê di creâ rêts di colaborazion tra i sogjets de culture, parcè ch’e je pardabon l’uniche strade par frontâ la pierdite di cussience de nestre comunitât furlane, che si dismentee masse dispès de sô storie e dai siei valôrs.
E jo o soi cunvint, profondamentri cunvint, che il compit di tiessi cheste rêt de culture furlane al spieti ancje, se no soredut, ae Societât Filologjiche. Chest o cirìn di fâ di agns cu la massime determinazion, crodeitmi, promovint par esempli la rassegne de Setemane de culture furlane, che in Mai di chest an – cu la colaborazion di desenis di associazions, prolocos, comuns – e à contât ben 121 aveniments e iniziativis di studi e di valorizazion dal nestri patrimoni storic, artistic e ambientâl, un’ocasion par cognossisi miôr tra di nô e par fâ cognossi ancje a chei altris i tesaurs de nestre tiere, un’ocasion di promozion culturâl e turistiche a livel regjonâl, su dut il teritori furlan e ancje in Venit. O vin vude l’atenzion e la colaborazion di Promoturismo FVG e di chest o ringrazii l’Assessôr Sergio Bolzonello, sperant che cheste forme di colaborazion e di integrazion tra public e privât, tra la Regjon e un istitût culturâl come il nestri, e cjati une forme di stabilitât e di continuitât, e rivi a une convenzion, a un protocol d’intese, che nus permeti di consolidâ i risultâts di partecipazion e di adesion, a livel popolâr, ch’o vin rivât a vê ta chei agns achì. La Societât Filologjiche e je l’uniche istituzion culturâl struturade e presint su dut il teritori furlan, ricognossude a livel ministeriâl e ative cun altris istituzions culturâls talianis e forestis, impegnade in progjets di interès regjonâl, ma ancje di interès european – o vin vude la conferme, propit il mês passât de aprovazion dal gnûf progjet “Eduka” di educazion ae pluralitât lenghistiche, che di agns o puartìn indenant cui amîs dal Istitût sloven di ricercjis (SLORI) di Triest. E je rivade l’ore di resonâ par consolidâ cheste prospetive: la Regjon no pues rivâ pardut e no à nancje di rivâ pardut, o vin di pontâ su chei ch’a san fâ e ch’a àn voie di fâ, o vin di ricognossi la cualitât e la continuitât dai risultâts, la serietât, la dimension e lis capacitâts operativis dai sogjets interessâts, o vin di valutâ seriamentri ce che si fâs e promovi, come che si dîs, lis buinis pratichis. E chest no dome parcè ch’al è just premiâ chei ch’a lavorin ben e no chei ch’a stracin lis risorsis publichis (chest al è un principi di moralitât e di ecuitât, o disarès, no dome di legalitât), ma ancje parcè che no vin, in veretât, altris pussibilitâts: il mont al va di corse, la competizion nus oblee a sieltis di cualitât, no podìn plui permetisi di no doprâ pal miôr ce ch’o vin, se no chei altris nus lassin par strade, nus fasin a tocs. Se no rivìn a fâ chestis sieltis, no stin a lamentâsi, dopo, che si dismenteìn de nestre identitât, che no sin (e che no son) plui furlans e che nus puartin vie l’autonomie.
O ai tacât il gno intervent cuntune buine gnove, la cuistion di Sapade, e lu sieri cuntun altri event positîf. Come ch’o savês, o vin inviât in Fevrâr, in convenzion cun ARLeF e Regjon, il DocuScuele, il Centri di documentazion, ricercje e sperimentazion didatiche pe Scuele furlane, ch’o vin in vie Manin, un altri esempli di buine pratiche di colaborazion tra istituzions par rispuindi a une dibisugne reâl e fuarte de nestre comunitât, valadî la trasmission de lenghe e de culture furlane a scuele. O vin vude un’altre prove di cetant ch’e je fuarte cheste dibisugne inmaneant un cors di formazion e di inzornament par insegnants in servizi – no duncje di formazion iniziâl, ch’al è un compit esclusîf dal cors di Formazion primarie, in Universitât. Chest al jere un cors intensîf di trê dîs (tra lezions e laboratoris), ch’o vin clamât “Scuele d’Avost” e ch’o vin pensât di tignî a Aplis di Davâr, in Cjargne. Sul imprin o vevin decidût, dal moment ch’al jere l’an di scree dal cors, di pontâ a sessante iscrits, un biel numar, ma lis domandis a son stadis passe cent e vincj: o vin scugnût limitâ a cent il numar dai corsiscj, par vie des normis di sigurece de struture che nus à dât acet. Duncje un sucès pardabon impuartant, un’iniziative di formazion e di informazion pe scuele furlane, ch’o varìn assolutamentri di ripeti, parcè che l’atenzion e l’interès par chest argoment al è fuart, no dome chel dai gjenitôrs, ch’a continuin a domandâ l’insegnament dal furlan in misure che nancje no si spietisi (chest nusal comuniche l’Ufici scuelastic regjonâl, ch’al tire dongje i numars di chestis adesions), ma ancje chel dai insegnants. Nô o sin clamâts a cjatâ formis simpri gnovis par permeti ae scuele furlane di esprimisi, par formâ e preparâ i zovins di doman: se no rivìn a cjatâ chestis formis, chestis soluzions, al è miôr ch’o lassìn il puest a int plui preparade di nô. E chest al vâl par ducj, a ogni livel. Propit in ocasion dal Congrès di Mueç o vin pensât, tra l’altri, di presentâ il gnûf sît internet dal DocuScuele, un sît internet flessibil e plen di contignûts: l’apontament al è pai cuatri di Otubar, un miercus, chi ta cheste sale polifunzionâl.
O passi a concludi cui ringraziaments a chei ch’a àn lavorât pal bon pro dal nestri Congrès di Mueç. Prime di dut lu ringrazii lui, siôr Sindic, e cun lui dute la zonte, il consei comunâl e lis struturis dal comun; o ringrazii i amîs de Proloco di Mueç, e in particolâr il President Renato Valent, pe condivision dal progjet editoriâl dal Numar Unic, un Numar Unic che si insede te golaine di chestis grandis publicazions, ma ch’al nas di une biele tradizion di studis locâi sul teritori; dute la popolazion di Mueç pal bon acet che nus à dât, pe colaborazion te redazion dal Numar Unic, pe disponibilitât a condividi programs e iniziativis ch’a compagnin la nestre fieste. Un ringraziament, no formâl, a Bons. Guido Genero, ch’al à celebrât la Sante Messe, ae corâl di Sante Marie Maiôr di Spilimberc e ae sô diretore Ilvia Mulloni, ai reladôrs di cheste zornade dal Congrès, par no dî naturalmentri dal personâl de nestre Societât, il Diretôr Feliciano Medeot, cun Marilena, Daniela, Katia, Alessandra, Elena, Antonella e Cristina, ma ancje i volontaris dal servizi civîl nazionâl, che nus judin cun tante buine volontât e passion. E compliments, naturalmentri, ai studiôs premiâts dal Ciceri, che ju cognossarìn ca di pôc, pai impuartants contribûts di studi su la realtât furlane.
Il nestri agrât speciâl, pardabon speciâl, al è però pai doi curadôrs dal Numar Unic, Giuliana Pugnetti e Bruno Lucci, ch’a àn rivât a intepretâ cussì ben il spirt di chest teritori, come ancje par ducj i colaboradôrs di cheste monografie, un tesaur pal Friûl.
Un’ultime robe. L’an cu ven, pal Congrès numar novantecinc, o sin a Colorêt, un’altre biele localitât dal nestri Friûl, une localitât che nus spiete par dânus un acet di gale, come chel ch’o vin vût chi a Mueç. A son ancje altris lis localitâts che nus spietin e che magari no sin ancjemò stâts, cul Congrès: ma, come ch’o dîs simpri, la Societât Filologjiche Furlane e à buine memorie e o rivarìn par dut.