Sul maçalizi dai 27 di fevrâr dal 1511 a Udin, la Crudel Joibe Grasse, al è stât scrit o par sotliniâ la regjie dai çambarlans Savorgnans o par svantâ la partecipazion dai rustics. La realtât e je stade pardabon chest e chel.
In fats, di agns e agns il mont contadin al jere in ribulidure: fiscât di debits, scorsadis dai Turcs e devastazions di vueris jenfri Imperi Asburgjic e Venezians e cun robariis di personis, bestiis, vin, blavis, distruzions di cjamps e vignâi. Cun di plui, i proprietaris des tieris a pratindivin simpri di plui une incressite de produzion fasint coltâ lis comugnis là che i vilans a seavin e a puartavin vacjis e pioris a passonâ, fasint suiâ palûts e surtums dopradis par pescjâ o par racuei stiernum, stramudant i contrats a nivel fers di secui in contrats di afit cun scjadincis di pôcs agns. I nobii a vevin tastât plui di une volte il malstâ plen di asse e ancje intal Parlament de Patrie si fevelà di cunvignis di contadins che a declaravin di fâ dute une copadice di predis, feudataris, citadins; dal 1509 une schirie di contadins e assaltà il cjastiel di Sterp e lu brusà; l’an dopo, stant che i governants no vevin fat nuie par intervignî e une delegazion di cjastelans e jere lade a Vignesie a domandâ justizie, tornant indaûr e patì une vuate a Çupicje.
Sul rabioseç gjenerâl a soflavin i Savorgnans, famee cjastelane a cjâf di une fazion (i Çambarlans) leade ai dominants venezians; Antoni Savorgnan al jere il comandant des cernidis e al veve cetant podê a Udin e intune vore di jurisdizions. Cul control des cernidis e il benvolê dai popolans de citât graziis ai contentins che ur concedeve, si compuartave tant che paron dal Friûl: a sintî i siei aversaris, ven a stâi i cjastelans Strumîrs aleâts de famee Toriane che no paravin jù la sotanance a Vignesie, il Savorgnan al veve la pretension di inmaneâ une sô signorie personâl. Dal sigûr, al jere seneôs di disdrumâ i nimîs, e no si contavin barufis, dispiets, pestadicis jenfri Çambarlans e Strumîrs, nobii, fameis, bravaçs.
Il moment bon par finîle al capità intant de vuere cui Imperiâi. Lis cernidis a stavin in vuaite fûr di Udin e in citât e vignive dongje putrope int pal Carnevâl. Intun clime solfarôs, i Çambarlans a spampanarin ator che i Strumîrs a vevin clamadis lis armadis arburgjichis: scuadris di fameis e caporions dai Savorgnans a assaltarin i palaçs di Torians e amîs, a faserin a tocs nobii e servidôrs, feminis e oms profanant i cadavars, a botinarin lis cjasis e lis brusarin, si mascararin cui vistîts de nobiltât. Cheste fieste e l indenant par cualchi dì, cuant che i Venezians a deciderin di intervignî par puartâ ordin.
Ma intant il fûc al svampà par dut il Friûl. I contadins a atacarin i cjastiei e, cuant che a rivavin a lâi dentri, ju brusarin intun cu lis cjartis che a testificavin debits e dovês dai coltivadôrs. No si copà come a Udin: ca e là si fasè violence cuintri lis feminis de aristocrazie. La nobiltât e scomençà a organizâsi dentri dal cjastiel di Purcie e a mandâ soldâts, cavalîrs e ancje int di campagne a combati i rivoltôs: l’intervent dal esercit de Serenissime al fermà altris becjariis e il stes Antoni Savorgnan, pierdude la poie dai siei protetôrs venezians, al passà cui Imperiâi e al fo copât par svindic.
Passât cualchi an, a fuarce di mandâ delegazions a Vignesie, e nassè la Contadinance, ven a stâi une rapresentance istituzionâl di 8 sindics (cuatri pe diestre, cuatri pe çampe dal Tiliment) des comunitâts campagnulis, che però cul timp i Venezians a stramudarin intun orghin di contrôl sociâl e di ricuelte fiscâl. Purpûr, chê dai contadins e fo une disfate politiche, par vie che no vevin un program precîs ni a domandavin di savoltâ la societât: a volevin dome tornâ aes condizions tradizionâls di contrat e di sfrutament des tieris comunâls. Cheste e je une difarence fondamentâl cu la vuere dai contadins dal 1524-1526, che a rivarin a sumiâ une republiche dal popul (Trentin e Tirol).
Cualchidun al à sgarfât intes cjartis par cirî un leam jenfri il riviel dai contadins furlans e chel todesc (par esempli Giorgio Politi intul libri dal 1995), ma cence sucès. Une curiositât: par solit, cui che al tradûs dal todesc il Deutsche Bauernkrieg di Friedrich Engels, vâl a dî la Vuere dai contadins in Gjermanie, cuant che al cjate lis peraulis Kärnten, Krain und Steiermark lis volte cun Carintie, Cjargne e Stirie e cussì si crôt che Engles al vebi fevelât dai contadins furlans. Ma Krain al è il Cragn, che vuê o disaressin Slovenie.
Pier Carlo Begotti