Il prin colegament diret e regolâr di diligjence di Udin cu lis citâts di Mestre e di Triest al rimonte al an 1773, e al somee che une buine ativitât diplomatiche par fâlu partî e sedi merit di Giacomo Casanova, stant a chel che lui stes al scrîf tal cjapitul XXXIV des sôs memoriis jessudis in francês cul titul Histoire de ma vie.
Rivât di Ancone a Triest, citât dal Imperi d’Austrie, ai 15 di Novembar dal 1772, Casanova si jere subit movût par tignî buinis relazions, a scomençâ dal baron Pittoni, capo de polizie, che lu veve metût in contat cul avogadôr Zaguri e, traviers di lui, cul consul di Vignesie a Triest Marco Monti. Chest ultin i veve prometût di poiâ la sô domande di gracie par tornâ in patrie, intervignint di persone viers i gnûfs Incuisidôrs di Stât. Di fat, Casanova al jere in esili di disesiet agns, dopo de sô fuide de preson dai Plomps, e al veve une grande nostalgjie di Vignesie.
Ma nuie nol cole a gratis. Une dì il consul Monti al informe Casanova che di cuatri agns si doprave cence sucès par otignî dal guvier di Triest che la diligjence che ogni setemane e partive di Mestre viers Triest e slungjàs il percors di «une poste», ven a stâi di doi dîs, passant par Udin, capitâl dal Friûl venit. Il passaç par Udin al sarès stât cetant util, secont il consul, pal cumierç jenfri i doi Stâts, ma il Consei di Triest si jere simpri declarât cuintri. Il resonament dai conseîrs triestins al jere sempliç: se la Republiche di Vignesie e veve tant a cûr chest afâr, al jere clâr il disavantaç par Triest!
Giacomo Casanova si impegne e al presente la cuistion al cont di Wagensberg, gnûf governadôr de citât a pene rivât di Viene. Chest i sclarìs che la decision no dipent di lui ma dal Consei dal Cumierç di Triest. Dut câs, i da informazions preziosis e un sugjeriment. Il plui ustinât dal Consei al jere un ciert Pasquale Rizzi, che al veve tirât de sô bande ducj chei altris. Ma Casanova al varès podût presentâ al governadôr un memoriâl cjapant in esam dute la cuistion, fasint viodi che, passant par Udin, la diligjence e varès puartât un vantaç a Triest, che e jere un “puart franc”, tant di plui che a Udin, che e veve un cumierç di pôc e nuie.
Une volte pront il memoriâl, il cont di Wagensberg lu varès presentât al Consei disint che chê e jere la sô opinion. A chel pont, se il Consei nol saveve ribati cun argoments sigûrs e no si disberdeave la cuistion, lui al varès inviât dut a Viene cuntune sô note.
Casanova, sigûr dal fat so, al scrîf une memorie ben documentade e dut al file slis come previodût. Il Consei al decrete che la diligjence di Mestre a Triest e veve di passâ par Udin, lant e tornant. A pene che il cont di Wagensberg i consegne copie dal decret, Casanova lu puarte al consul di Vignesie. Tal stes timp, al scrîf une letare al segretari dal Tribunâl declarantsi content di vê dât une prove par jessi util al so Paîs e cussì al spere di meretâ la gracie par podê tornâ a Vignesie.
A traviers de sveltece di Casanova e dal consul che al informe subit il Tribunâl di Vignesie, Udin e ven a savê la gnove prin di Triest, stant che il governadôr al publiche il gnûf regolament de diligjence dome vot dîs dopo. O sin tal Istât dal 1773.
Il segretari dal Tribunâl di Vignesie nol rispuint a Casanova su la domande di gracie, ma a mieç dal consul i mande une gratifiche di cent ducâts di arint tant che prime ricompense cuntune altre propueste: Casanova al varès podût sperâ te clemence dal Tribunâl se al fos stât bon di disberdeâ une altre cuistion, leade ai fraris armens che a vevin bandonât il convent di San Lazar te Lagune par trasferîsi a Triest!
Cussì Giacomo Casanova, che intant si jere fat buine la fie dal cont di Wagensberg, si bute intune gnove aventure diplomatiche, ma al podarà viodi la so citât dome un an dopo. Intant la diligjence e continuave a fâ il so servizi colegant Udin cu la citât imperiâl.