Cjârs Cunfradis, Autoritâts e Amîs,
al è cun grant plasê che us puarti ancje jo, a non de Societât Filologjiche, il plui cordiâl benvignût ae nestre tradizionâl Fraie de Vierte, la fieste di primevere, culì a Cjarlins, ta cheste biele curnîs di int rivade di dut il Friûl, di Triest e ancje dal Venit.
Cheste Fraie de Vierte dal 2015 e je pardabon une Fraie "speciâl". Si trate di une Fraie ch’e vîf i moments di simpri, lis relazions, lis premiazions, il gustâ in compagnie, lis visitis par man, ma no je dome chest. La Fraie chi a Cjarlins – prime volte che le fasìn ta cheste localitât – al è ancje il moment che si siere un percors di grande ativitât sul teritori, di “mobilitazion”, si podarès dî, a pro de culture furlane. Come ch’o savês o vin vivût a partî dai 7 di Mai lis manifestazions de Setemane de culture furlane, manifestazions che si concludin vuê cu la Fraie, apont, e cul conciert “Cent agns di pre Albin” a San Denêl, cul ricuart in musiche di bons. Albino Perosa. Viodìn, alore, cemût ch’e je lade la Setemane de culture furlane, almancul fin cumò.
Il Friûl e la sô storie, lis sôs tradizions, il so teritori, la sô art, la sô musiche, soredut lis personis e lis associazions ch’a cognossin, vivin e trasmetin i valôrs de nestre culture. Ta cheste edizion de Setemane de culture furlane si vin impegnâts a promovi passe cent iniziativis par rapresentâ la vitalitât di espressions che la nestre tiere nus ufrìs, par ricuardânus, a nô e a chei altris, ch’o vin un grant patrimoni di cognossi e di valorizâ, par proponi un moment là che ducj cuancj, cu lis lôr esperiencis e competencis, a vedin l’ocasion di presentâsi e di confrontâsi. Chest al è un dai compits plui impuartants des istituzions culturâls de nestre comunitât, o pensi, propit chel de condivision e de colaborazion, parcè che pardabon fondamentâl, par podê cressi, al è cognossisi, resonâ insiemit, savê ce ch’a fasin chei altris, par miorâsi e par puartâ une tessare, simpri gnove, al mosaic des espressions de nestre culture. Il discors de condivision e de colaborazion nusal domandin ducj, nusal domandin i nestris socios, nusal domandin i amîs di altris istituzions, nusal domande ancje la Regjon, che plui voltis e à dimostrât di preseâ e di tignî cont di azions ch’a pontin a unî e no a dividi, a creâ une polifonie di vôs, plui che a cjantâ di bessôi. E je fondamentâl, in altris peraulis, l’ativitât dai sogjets impegnâts ta chest setôr, chel de culture, la cualitât e la continuitât dai intervents, e reste fondamentâl, simpri di plui, la prospetive di fâ scuadre, di lâ in cunvigne, di colaborâ tra di nô. Cussì e je nassude l’idee di presentâ la Setemane de culture furlane, un’ocasion par afermâ une volte di plui che cheste tiere e à une sô clare e precise identitât, une sô storie, une sô tradizion, une tiere ch’e à savût esprimi valôrs, savês, abilitâts e talents; un’ocasion, come ch’o ai za dit, par dimostrâ che cheste tiere, la nestre tiere, e à un’anime.
Ce che si pues dî di cheste Setemane de culture furlane. La Setemane di chest an nus à confermade une grande voie di colaborazion e di partecipazion dal mont culturâl furlan, une plene disponibilitât di ducj a cundividi cheste idee di une rêt culturâl largje e inclusive, vierte a istituzions e operadôrs culturâi. Si trate di une rêt nassude dal bas par promovi il teritori e il nestri patrimoni culturâl ta lis sôs variis declinazions. I numars, o pensi, a fevelin clâr. A son passe cent lis iniziativis inmaneadis, come ch’o disevi, considerant lis presentazions dal diari bilengâl Olmis tes scuelis, la scree di mostris e rassegnis, i laboratoris pes scuelis, la maratone di leture in lenghe furlane Nassûts par lei, in plui localitâts, e dopo cunvignis, conferencis, presentazions di volums, visitis sul teritori, spetacui teatrâi e musicâi. Propit in ocasion de Setemane de culture o vin vût presentât plui di une publicazion, nestre, a concludi percors di ricercje e di valorizazion dal teritori: o domandi scuse, ma i ten in maniere particolâr a chestis publicazions, a son volums ch’a restin “a capitâl” di culture pe nestre tiere. Si trate dai doi volums su Lignan, in todesc e in inglês (Zwischen Himmel und Meer, al è il titul Tra cîl e mâr), par promovi la localitât cui ospits ch’a vegnin di fûr; e dopo la publicazion dal secont inventari dai archivis Degrazia di Gurize, par cure di Lucia Pillon; e dopo l’edizion da l’opare di Marc’Antonio Gattinon di Tisane, par cure di Gabriele Zanello, di chest autôr di comediis pluridialetâls dal Cinccent; e dopo, che lu presentìn ca di cualchi moment a Cjarlins, il biel volum cu la racuelte dai Ats de Setemane de culture furlane dal an passât, duncje dal 2014 (e ancje chest an, si capìs, o fasarìn compagn cuntune gnove racuelte). A son dutis publicazions di cualitât: us invidi di cûr a comprâlis, par dânus ancje une man ta chest moment che di sigûr nol è facil par nô e pal mont de culture. O vin lavorât une vore par creâ e consolidâ cheste rêt de culture furlane al servizi dal nestri teritori (e no par interès personâl: chi al è dut volontariât, nissun al met un franc in sachete, par jessi clârs): cumò si spietìn il ricognossiment di chest grant lavôr, si spietìn di vê la juste valutazion di ce ch’o vin fat, si spietìn che i sorestants – come che si dîs – a judichin cun favôr cheste grande operazion di unitât e di condivision dai valôrs de storie, de tradizion e de identitât dal Friûl. No dîs ce che si spietìn, in tiermins “materiâi”, ma lu vin capît.
Il cûr de Setemane, però, a restin simpri lis personis. Il nestri agrât ur va a ducj chei che si son spindûts par pensâ e par stâ daûr a lis manifestazions, a chei ch’a àn partecipât tant che reladôrs, atôrs, coriscj, letôrs, vuidis, moderadôrs, tecnics, ai colaboradôrs e ai dipendents de Societât Filologjiche Furlane; ai ents publics e privâts (dusinte, un numar straordenari), duncje lis associazions e lis prolocos, i comuns, lis Provinciis, la Regjon, lis Fondazions (la CRUP e la CARIGO) e lis Bancjis di Credit Cooperatîf), ducj chei ch’a àn decidût di dâ une man, in formis diviersis, al bon pro di cheste manifestazion.
Cul conciert di usgnot par pre Albin, un grant furlan, o sierìn cheste Setemane de culture e o varìn di resonâ sul complès e i risultâts di cheste operazion. O sai dome che la Setemane de culture e je lade benon, cun sodisfazion di chei ch’a àn lavorât par metile sù e di chei ch’a àn partecipât. Naturalmentri al sarà cualchi aspiet di miorâ e di lavorâi parsore, ma la mê impression e je che le vin imbrocade, ch’o vin cjapade la strade juste. Nestre intenzion, duncje, e je chê di dâ continuitât ae Setemane de culture furlane, pal an cu ven, lant a frontâ altris argoments e a interessâ altris localitâts: par preparâ une gnove Setemane de culture furlane o pensìn di promovi une riflession comun, “coletive”, e su cheste riflession o domandarìn la colaborazion de Regjon, par valorizâ la Setemane ancjemò di plui pai siei aspiets culturâi, ma ancje pe promozion dal teritori, di dut il teritori, ancje dal pont di viste economic e turistic.
O sieri il gno intervent di salût, ricuardant un apontament une vore impuartant par nô. Si trate dal congrès sociâl di Sopula, pe prime volte ta chê localitât, l’ultime domenie di Setembar. Un ringraziament a ducj i nestris colaboradôrs, ducj volontaris, ai mestris dai cors pratics di lenghe e culture furlane, ai docents dai cors di formazion par insegnants, ai amîs di Cjarlins pal invît a tignî chi la Fraie de Vierte e a ducj voaltris pe vuestre partecipazion.
Federico Vicario
President de Societât Filologjiche Furlane