Ai 12 di Zenâr dal 1947, juste setante agns indaûr, al nasseve il “Movimento Popolare Friulano per l’Autonomia Regionale” (Mpf). Lu veve metût sù un grop di zovins inteletuâi che al sburtave pal ricognossiment di une Regjon Furlane che e cjapàs dentri dut il teritori de provincie di Udin (cu la Diestre Tiliment che i faseve part), chel che al restave de vecje provincie di Gurize e il Mandament di Puart. Compit dal Moviment al jere chel di unî, parsore dai partîts politics, dutis lis fuarcis, fin a chel moment sparniçadis, che a viodevin te autonomie regjonâl la uniche garanzie par lis libertâts democratichis.
Il prin a tirâ fûr la cuistion de autonomie, come che si sa, al jere stât, subit dopo la Liberazion, Tiziano Tessitori, elet ancje a la Assemblee Costituente tes filis de Democrazie cristiane. I firmataris dal Moviment a volevin puartâ il discors no dome jenfri lis stanziis de politiche, ma ancje framieç la int. O ricuardìn che a jerin Gianfranco D’Aronco (nomenât segretari gjenerâl), Luigi Ciceri, Chino Ermacora, Alessandro Vigevani di Udin, Pier Paolo Pasolini e Zefferino Tomé di Cjasarse, Luigi Pettarin di Gurize e Attilio Venudo di Puart.
Il moment al jere just, stant che ai 18 di Dicembar dal 1946 la seconde Sot-comission dai “75” de Costituente e veve discutût su la sudivision in Regjons, aprovant la “Regione Friulana” che e varès tignût dentri – cussì si veve votât – il teritori dal Friûl plui lis tieris de Vignesie Julie che cul Tratât di Pâs a saressin restadis tal Stât talian, cun esclusion dal Distret di Puart. Triest e jere pal moment fûr dal discors, par vie dal proviodût Teritori Libar. In chê volte i partîts no jerin ducj dacuardi (massime il Partît comunist) e nancje i Comuns che a varessin vût di dâ un parê. Di fat, te part ocidentâl dal Friûl diviers Comuns, scomençant di Pordenon, a volevin stâ cu la “Regione Veneto” ma ancje a Gurize nol mancjave il suspiet di vignî supâts de fuarce di Udin.
Il Moviment al rivà a movi lis aghis fin dal prin comizi al Cine Puccini, ai 19 di Zenâr. In Fevrâr al jere bielzà jessût il librut La Regione friulana e tal zîr di pôc timp nons lustrissims a vevin dât l’adesion: oltri a Tessitori, il poete Biagio Marin, il storic Pier Silverio Leicht, bons. Ivan Trinko da lis Valadis dal Nadison (o Benecjia) e il president de Cjamare di Cumierç Gaetano Pietra. Intant, si jerin formadis fintremai 53 Sezions teritoriâls, de zone di Pordenon a Gurize, di Sapade a la Basse, de Val Cjanâl ai migrants tal forest.
Tal Moviment Popolâr Furlan si cjatavin variis animis dal front autonomist. Al è interessant viodi che lis motivazions par la autonomie a jerin soredut culturâls e economichis, mancul di caratar lenghistic. Dut câs, La Patrie dal Friûl di pre Josef Marchet e ospitave un alegât in marilenghe dal Moviment.
Lis robis si imberdearin dopo che i comuniscj a cambiarin parê, poiant une Regjon a statût speciâl, stant che le consideravin un teritori “mistilingue” par la presince dai slovens. Il front si crevà par pôre dal bilenghisim e des rivendicazions de Jugoslavie. Il Mpf, cussì come la Filologjiche, a puartarin indenant la linie che l’impuartant al jere di difindi l’autonomie intune Regjon Furlane, nol impuartave se ordenarie o speciâl.
Dopo che l’Assemblee Costituente tal Jugn dal 1947 e veve votât a pro de Regjon Friul-Vignesie Julie a statût speciâl, lis polemichis a continuarin par mês. A vignivin atacâts no dome i partîts di çampe e la minorance slovene, ma ancje il Mpf e il stes Tessitori; in mancjance di un acuardi, in Otubar la atuazion de Regjon e fo rinviade cuntune “Norma transitoria”. Il fat al lassà il marum in bocje ai autonomiscj. Patrie dal Friûl e protestave cuintri i furlans che no savevin fâsi valê a Rome e il Moviment Popolâr Furlan al tentave un ricors cuintri la decision dal rinviament, ma cence sucès.
Intant, i timps a mudavin e la “Vuere frede” e cjapave dentri fuarcis politichis e culturâls. Pasolini tal Fevrâr dal 1948 si gjavave par lis “involuzions” dal Moviment, che par altri nol veve une linie precise, pûr se dongje dai candidâts autonomiscj di aree democristiane e centriste. Ma ancje i democristians si tirarin vie cuant che il Mpf al decidè, dal 1949, di partecipâ diretamentri a lis elezions. Si vierzè une crisi cun dimissions di masse, tant che cuant che il Moviment si presentà a lis elezions aministrativis dal 1951 al cjapà dome un conseîr in Provincie e nissun tal Comun di Udin. Tal 1953 il Moviment al discomparì.