Inte suaze de sfide cruciâl di
play-off tra la UEB Gesteco Cividale e il Rieti, il teritori furlan al segne un pont decisîf no dome sul parquet ma ancje sul front de identitât.
Domenie ai 10 di Mai, intal pre partide de gare 2 in program pes 17:00 li dal PalaGesteco di Cividât, e vignarà presentade in mût uficiâl la colaborazion jenfri la Societât Filologjche Furlane, la ASF (Associazion Sportive Furlane) e la United Eagles Basketball Cividale.
Obietîf? Valorizâ la lenghe dal teritori cun contignûts mirâts dentri dal dinamic contest digjitâl, insiorant la esperience di utents e utentis in gracie de valorizazion linguistiche e de braùre di apartignince.
La iniziative e nas de volontât di meti adun il lengaç universâl dal sport cu la lenghe proprie dal teritori. In gracie de consulence linguistiche de Societât Filologjche Furlane e dal coordenament de ASF, i canâi sociâi des Eagles a daran acet a contignûts par furlan, sigurant une comunicazion corete e dinamiche.
La UEB Cividale no je dome une scuadre di bale tal zei, e je la espression di un popul – a declarin i rapresentants dai partners coinvolzûts – e puartâ il furlan sui social al vûl dî fevelâ la lenghe dai nestris tifôs e des nestris tifosis, e proietâ la nestre identitât tal futûr digjitâl.