Tal mês di Dicembar i fruts dal Friûl di une volte – disìn fin al taramont - si preparavin al Nadâl lavorant pal presepi. Di matine, a scuele, lu disegnavin su cjartis di picjâ sui mûrs e a imparavin cualchi puisie nadaline; tal dopomisdì a lavin a racuei muscli e lens par “fâlu” in cjase; sot sere, in glesie, a cjantavin il Missus, un rest dal rît aquileiês. Tai ultins dîs, tor dal 20, a disvuluçavin lis statuutis di zes, un tesaur di famee, e in ogni cjase al comparive il presepi: grops di morâr e cualchi clap par “movi” il paisaç, farine di flôr par segnâ i trois e lis stradis sul muscli, cjarte indarintade par imitâ lis aghis, e naturalmentri une grote o une capane cun dentri il Frut, la Madone, San Josef, il mus, il bo. A la fin i pastôrs cu lis pioris e, parsorevie, une stele cu la code e un agnul ch’al tindeve un feston cu la scrite Gloria in excelsis Deo a completavin la vore.
Il creatôr dal presepi al fo Francesc, il sant poete di Assisi ch’al saveve fâsi capî dal lôf e dai uciei (al veve cualchi dificultât di comunicazion dome cul pape e cui oms in gjenerâl).
Al fo lui che te gnot di Nadâl dal 1223 a Greccio, in Umbrie, al presentà al popul il prin presepi. Stant al non di chê prime “instalazion”, tirât fûr dal latin praesepium (grepie), al è probabil che Francesc al ves metût dome une statue dal Frut su la paie di une grepie tra lis statuis de Madone e di San Josef. A forin ju apocrifs a “inventâ” la grote, il mus e il bo. I pastôrs, i agnui e i re magjos, invezit, a son presints tai Vanzelis ricognossûts de Glesie.
Il sucès di chê prime rapresentazion plastiche de Nativitât al fo cussì grant che si pues considerâ il presepi come un dai fatôrs di unificazion estetiche de Europe cristiane. Il presepi al inspirà i plui grancj pitôrs, a partî di Giotto (par savênt di plui cirît “Natale nell’arte” su internet). Ma nol covente lâ lontan: di Cocau a Cividât, di Soclêf a Valerian, i nestris pitôrs dai secui stâts a àn lassât oparis ch’a gjavin i voi!
La crisi dal presepi, clamìnle cussì, e scomençà dopo l’ultime vuere, co al pareve biel e bon dut ce ch’al partignive ai Merecans: dal chewing- gum al boogie- woogie, da la lenghe inglese al Christmas tree (il plevan dal miò paîs, racomandant di continuâ «la pia usanza del presepio», nol saveve che chel arbul al sarès rivât fin a Rome, in place San Pieri). Cul timp il presepi al fo fat simpri in mancul cjasis, parcè ch’a nassevin simpri mancul fruts e ancje parcè ch’al dave masse lavôr.
La tradizion, paraltri, no je muarte: cjalantsi ator o podìn dî che – par principâl merit des Pro Loco, che par favorî il “turisim presepiâl” a publichin un album anuâl intitulât “Giropresepi” – e je lade fûr des cjasis (no dutis) par rinassi tes placis dai nestris paîs.
Cussì il presepi, par un mês a cjaval des fiestis, al è deventât un element dal nestri paisaç, e la tradizion, di privade ch’e jere, un pôc a la volte e je deventade publiche, e e pâr destinade a durâ, almancul fin cuant che la maiorance de int si sintarà cristiane o e varà tolerance pai simbui cristians. Cussì scrivint no pensìn a ju imigrâts, ma a chei puars (inteletualmentri puars) talians che, par no disturbâ ju imigrâts, a vuelin butâ fûr il presepi des nestris scuelis: a varessin di jessi licenziâts, al à scrite il diretôr di Vite Catoliche, «per manifesto deficit culturale». Di fat no san o no àn capît lis peraulis di Vittorio Sgarbi, che inte trasmission televisive di Giovanni Floris (ai 8 di Dicembar dal 2015, Canale 7) al à vût dit che tra cristianisim e art e esist une “simbiosi inscindibile” parcè che noaltris o adorìn un Om che al è ancje Diu, e un om al nas, al vîf e al mûr. Noaltris catolics o vin alore la bisugne di rapresentâlu tant che une persone, ven a stâi in figure umane.
Al reste dome di domandâsi parcè che i talians a vegnin fûr analfabets in fat di art di une scuele cristiane dopo mieç secul di guvier democristian!
Par memoreâ il “spostament” dal presepi, Riccardo Viola al fo inviât a fotografâ lis placis dai nestris paîs tal passaç tra il 1999 e il 2000: vuê, ancje par ricuardâlu, o metìn man al so archivi.
Gianfranco Ellero
«Messaggero Veneto», 20.12.2016