Domenie ai 2 di Otubar la Societât Filologjiche Furlane e clamarà adun i siei socis pal 93n Congrès a Martignà, cuasi perifarie di Udin, un centri che intai ultins agns al à vût un fuart disvilup demografic (al è rivât a 7000 abitants; 20-25 agns indaûr indi veve pôc plui di 5000), sociâl e urbanistic, cussì che a vuê al à cuistât une identitât a mieç jenfri paîs e piçule citât.
Une volte si diseve di Martignà ch’al jere un comun “cence storie”, cence un passât interessant, cence particolârs cualitâts jurisdizionâls e aministrativis, sedi inte ete patriarcjâl sedi in chê veneziane. Al jere un “comun rustic” gjestît come chei altris de vicinìe cun a cjâf un dean e doi zurâts che a tratavin des cuistions ordenariis su la fonde dai statûts publics e dal bon sens. Par dut il rest, al dipendeve di magjistraturis esternis, come il gastalt di Feagne, garant di normis e regolaments, cun podê di jurisdizion suntun comprensori une vore larc li ch’al aministrave la justizie fin al ius sanguinis.
Lis stessis cundizions a jerin a Faugnà, Nearêt, Sarsêt e Torean, frazions di Martignà dopo lis riformis napoleonichis. Lis glesiis locâls a jerin sot de antighe plêf di Sante Margarite, che i spietave la buine part dai lôr beneficis. A la int di Martignà e di chei altris “paesetti del piano e dei dossi” ur restavin i terens no tignûts a culture, lis comugnis, i prâts par fâ passonâ i nemâi e dulà barufâ pai cunfins e pai dirits di spazis vitâi, che no jerin mai avonde. La tiere buine e jere dai nobii “forescj”, dai ordins religjôs, dal cjapitul e des glesiis di Aquilee e di Cividât.
I del Torso-Mantica, i Deciani, i Antonini, i Manin, i Della Giusta, i Savorgnan, i di Prampero e altris a faserin sù lis lôr bielis vilis, afidant ai colonos i lavôrs dai cjamps. Glesiis e vilis a custodissin tesaurs vêrs e propris: palaç del Torso-Mantica di Faugnà al è stât afrescât sul principi dal Sîscent dai artiscj dal zîr di Francesco Montemezzano, arlêf dal Veronese; la gleseute di S. Nicolau (o di S. Stiefin) di un pitôr de metât dal secul XIV; vile Della Giusta-Desia-Sello-Susmel di Carlo Gorgarini, un estrôs artesan dal colôr, che tor dal 1860 le jemplà di afrescs une vore vivarôs, cun sogjets orientâi e nostrans, bielis figuris di zovins blancjis, neris e rossis (a ’nd è ancje neruts e indians cu lis plumis), uciei di ducj i colôrs, maraveôs paisaçs di tiere e di mâr, citâts viodudis di adalt, cun tors e spicis; di flanc e je la gleseute di San Carli Borromeo cun oparis dal Sietcent.
A Torean o vin la vile di Prampero, di stîl classic, e la gleseute de Madone di Loreto, un bombon architetonic ma soredut artistic, cun oparis di Giulio Quaglio clamât di un cont Milliana tal 1735: culì l’artist no si esprim cu la sô solite potence espressive, ma al rapresente cualchi moment de vite de Vergjine cuasi cun umiltât, par lassâ un piçul segn di fuarce e determinazion aes figuris di profetis e evanzeliscj.
Art ancje intes glesiis parochiâls: il Domo al custodìs l’altâr maiôr e il batisteri baroc, ch’a vegnin de antighe glesie di Sante Marie Maiôr su la strade dai cuei, li che di resint a son vignûts a la lûs tocs di afrescs medievâi; a Nearêt e a Faugnà o vin oparis dal secul XVI e dal Sietcent; Sarsêt e Torean, tes lôr glesiis parochiâls, a custodissin dôs oparis di Lorenzo Rizzi, nassût li dongje, a Colugne: tal 1863 il pitôr al lassà a Sarsêt une dilicade “Madone cul Bambinut”; in chel stes timp, al piturà par Torean la pale cu la “Presentazion di Marie al templi”.
Martignà e lis sôs frazions a son lûcs bogns di dâ emozion, siôrs di storie e di culture, patrie di Dino Virgili e “Risultive”, lûc di polse e riflession par Bonaldo Stringher, “pari” de Bancje d’Italie che si ritirave culì cuant ch’al tornave des fadiis di palaç Koch a Rome. S’al fos culì vuê, forsit propit intal cidinôr dal so cuei, tal mieç dai boscs viers Murùs, al cjatarès la maniere di fânus vignî fûr de infinide precarietât li ch’o sin colâts dentri in dì di vuê.