Ai 5 di Novembar dal 2007 nus lassave masse adore Giorgio Ferigo, miedi, musicist e om di grande culture che tal moment dal so cumiât al jere ancje vicedean de Societât Filologjiche Furlane pe Cjargne, dopo che al veve cjapât sù il testemoni di Lucio Zanier.
Al jere nassût a Comelians tal 1949 e al lavorare tant che miedi dal lavôr e igjienist a Tumieç, un lavôr che i crodeve e i tignive une vore. Sot dal aspiet culturâl o ricuardìn, tra ducj, i doi numars unics che al à vût rincurât pe nestre Societât in ocasion di doi congrès fats in Cjargne (Tumieç tal 1998 e Enemonç Preon Raviei Soclêf tal 2005).
Inte musiche al è stât promotôr e anime dal grop dai Povolâr Ensemble, ma ancje ricercjadôr e sperimentadôr; al jere une vôs libare che e à lassât un grant vueit tai tancj setôrs de sô ativitât.
Vuê lu ricuardìn cuntun percors bibliografic di siei scrits vignûts fûr intes publicazions de Societât Filologjiche. I tescj si puedin lei e discjamâ in maniere libare in formât PDF. Par jentrâ tal percors al baste fracâ sul leam in cheste pagjine, che al cjape il titul di une sô cjançon, La cjasa a è cidina.