“Zuane da Udene”: si firmave cussì Zuan, nassût a Udin ai 27 di Otubar dal 1487, fi di Eline e di Francesc, ch’al jere a stâ in borc Glemone, di lavôr al faseve il mestri ricamadôr e al jere bielzà laudât intai manuâi su l’art dal Cinccent tant che un dai promotôrs dal Rinassiment. Artist ecletic e studiât, Zuan al è stât ancje un pitôr di grafits ante litteram, stant che la sô firme sui mûrs de Domus aurea di Neron no ricuarde sigûr il brut compuartament di un turist, ma la volontât di fâ proprie la antighe art pompeiane de decorazion clamade “a grottesca” par vie dai antîcs ambients intierâts scuvierts tor dal 1480 su lis cuestis dal cuel Esquilino. Di fat la sô vere formazion e fo culì, a tu a tu cul repertori di afrescs e stucs che al realizà tai grancj cantîrs architetonics e decoratîfs di Rome sot la regjie di Raffaello (che in chel moment al jere impegnât a lavorâ pai papis Leon X e Clement VII), tant di vuadagnâsi une nomee cussì grande di mertâ la sapulture tal Pantheon, propit dongje dal so Mestri. Dopo jessi lât a buteghe a Udin li di Zuan Martini, Zuan si môf a Vignesie là che, daûr des fonts, al jentre inte buteghe di Giorgione e al frecuente il ricercjât ambient anticuari dai Grimani. Propit pal tramit di cheste famee al devente tal secont deceni dal Cinccent un dai principâi colaboradôrs di Raffaello a Rome, cjapant part a grandis oparis: lis cussì clamadis “stufetta” e “loggetta” dal cardinâl Bibbiena, a la “Farnesina”, lis Lozis Vaticanis, la grande loze di Vile Madama. Raffaello i da in man di elaborâ a afresc la “grottesca” e di modelâ il stuc, arts li che Zuan al devente un vêr specialist: in particolâr al riscuvierç lis tecnichis dal stuc blanc miscliçant cu la cjalcine polvar finissim di marmul, e inte tecniche dal afresc al mostre lis sôs straordenariis capacitâts inventivis metint adun, secont l’estri, diviers repertoris naturalistics, nemâi, mascaris, pomis e rosis, ducj rifinîts come miniaturis. Propit cui afrescs pe loze de vile fate fâ sù dal bancjîr di Siene Agostino Chigi (clamade “la Farnesina” cuant che e deventà di proprietât dai Farnese ae fin dal XVI secul), Zuan al vierç la strade ae mode, di recupar classic, de piergule finte insiorade, come che al scrîf il Vasari, «stagione per istagione di tutte le sorti frutte, fiori e foglie con tanto artifizio lavorate, che ogni cosa vi si vede viva e staccata dal muro». Vile Farnesina e fo progjetade di Baldassarre Peruzzi e decorade di bande di artiscj di grande nomee tant che Raffaello, Sebastiano del Piombo, Sodoma. A vuê e je gjestide de Academie Nazionâl dai Lincei e vierte al public come museu. Culì fin ai 20 di Lui si pues viodi la mostre “I colori della prosperità: frutti del vecchio e nuovo mondo”, che e met in lûs propit il leam gjeniâl tra l’art di Raffaello e l’estri inventîf di Zuan di Udin. Straordenari esempli di dialic tra architeture e afresc, la loze e la sô decorazion a son stadis pensadis insiemi cul zardin ch’al è devant: un puest tant biel che Raffaello al à piturât la storie di Amôr e Psiche gjavade di Apuleio, li che lis figuris a son impuartantis come i festons di rosis e pomis che lis insuazin, piturâts invezit di Zuan. Oltri ae vivarose invenzion, insiorade dai colôrs vîfs, la piergule finte e je straordenarie par vie des plantis rapresentadis, fintremai 170 varietâts ancje raris e esotichis, de blave aes cocis (o sin dome 20 agns dopo de scuvierte de Americhe). La mostre, par cure di Antonio Sgamellotti e Giulia Caneva, e met la atenzion propit su chest aspiet, zontant ancje i risultâts di une campagne di analisis no-invasivis di imaging realizadis in situ pe caraterizazion di materiâi e tecnichis, che a àn permetût di scuvierzi particolârs inedits dal cantîr dal Raffaello. Cundiplui, oltri a une sezion documentarie cun raris edizions dal Cinccent, al è stât studiât di pueste un sisteme interatîf che ur permet ai visitadôrs di jentrâ e zirâ cun libertât inte “loze digjitâl” e di cjalâ la piergule di dongje (di norme si le viôt di une distance minime di 8 metros), cun ancje informazions botanichis, iconografichis e i risultâts otignûts des analisis di imaging. Il sisteme si pues consultâlu a mieç di un touchscreen inte sede de mostre o par internet al link http://vcg.isti.cnr.it/farnesina/.
Pe contâle dute, dopo vê otignude une grande nomee e vê tant lavorât, tal 1534 Zuan al à volût meti sù cjase inte citât ch’al amave, Udin, che i ricognossè i tancj merits nomenantlu proto e architet public tal 1552, e plui di resint, intitulantji il gnûf teatri. Ma mai une mostre: no saressial duncje il moment just puartâ cheste mostre (itinerante e a caratar didatic) a Udin? Dal sigûr e sarès di bon auguri par screâ une gnove stagjon di fervôr culturâl pe nestre citât.
Isabella Reale
«Messaggero Veneto», 06.06.2017