Cjârs Cunfradis e Amîs de Societât Filologjiche Furlane,
si cjatìn, come ogni an, a resonâ su lis ativitâts dal nestri Sodalizi e sui risultâts dal nestri lavôr, a presentâ un cuadri di ce ch’o vin fat e di ce che si proponìn di fâ. Il moment al è impuartant par nô, o sin rivâts ta chest 2019 al Centenari di fondazion, il moment ancje “simbolic”, se si vûl, di frontâ une riflession di prospetive par une Istituzion, la nestre, di simpri centrâl tal contest culturâl furlan. E cumò, par plui di une reson, ancjemò plui centrâl.
Nol covente pensâ a cent agns di une storie o di une vite, par domandâsi cemût mai o cetant ch’al è gambiât il Friûl e la nestre int cun lui. Nol covente pensâ a cent agns par contâ un mont, là che nuie al è restât ce ch’al jere prime, a partî dai cunfins tra i stâts, des istituzions pulitichis e gleseastichis, des condizions economichis de popolazion, des comunicazions e dal ambient, de istruzion e dal lavôr, dai valôrs e de identitât di un popul. Nol covente pensâ a cent agns par figurâsi che la Societât Filologjiche e sedi gambiade, par interpretâ cuistions gnovis e gnovis sensibilitâts, par scoltâ, par capî e par rispuindi a domandis che une volte no si fasevisi, par onorâ la mission morâl che ai 23 di Novembar dal 1919, a Gurize, i nestris paris a àn decidût di dâsi a pro di chê realtât, storiche, umane e spirituâl, ch’al è il Friûl.
Il mont, lis personis e lis robis a gambìin par lôr nature, nol covente e nol à nancje sens domandâsi il parcè. Platone si veve fat sù un altri mont, paralêl e personâl, là che il timp nol esisteve e che lis robis a jerin simpri compagnis; lu veve clamât il “mont des ideis”. Ma nô no vivìn ta chel mont là, ideâl, ma ta chel mont achì, ch’al è une vore reâl. Us fâs un esempli. No dome al gambie il mont, ma e gambie ancje la maniere di rapresentâlu, di nomenâlu, di clamâlu, di comunicâlu: e gambie la lenghe. Il furlan nol è plui chel di une volte, ise vere? Nol è plui chel dal secul passât e, tant mancul, chel dal Sîscent o dal Dusinte. Nissune sorprese, però, che nol sedi plui chel: parcè varessio di cognossi lis peraulis par nomenâ plantis e bestiis che no ai mai viodût, imprescj che no ai mai doprât o situazions che no mi soi mai cjatât? Il studi dal lessic di une lenghe al è une vore interessant, par vie ch’al palese ancje l’evoluzion di une culture e di une civiltât, tal so complès, ma la selezion dai concets e duncje des peraulis ch’o lin a imparâ, tal cors di une vite, e à une finalitât soredut pratiche, concrete. La lenghe e rapresente la maniere che nô si metìn in relazion cun chei altris, che nô o rivìn a trasmeti informazions e pinsîrs. La domande juste, cuant che si interoghìn su l’evoluzion di une lenghe, ma ancje di cualsisei altre manifestazion umane, no je “parcè”, ma “cemût”. Il parcè al è za te nature des robis; il cemût al è un altri discors e su chest cemût o podìn esercitâ il nestri judizi.
Ma, o disevi prime, ancje cent agns a son un timp masse lunc, se si metìn a misurâ le nestre esperience personâl su la vite aromai “secolâr” de Societât Filologjiche. La Societât Filologjiche e je gambiade cussì tant, ancje dome tai ultins cuindis o vincj agns, che si fâs fature, cumò, a metile dongje di chê di Ugo Pellis e dal so atlant lenghistic; di chê di Arturo Zardini e dal so ; di chê di Tiziano Tessitori e de sô bataie pe autonomie regjonâl; di chê di Luigi Ciceri, di Risultive e dai studiôs di culture popolâr dal secont Nûfcent; di chê di pre Josef Marchet e dai prins cors di formazion pai insegnants; di chê di Chino Ermacora e de istituzion dal Ent Friûl tal Mont; di chê di Silvano Pagani, ch’al vignive ogni an in Assemblee a votâ cuintri dal rindicont di gjestion par vie che i bêçs – al diseve – a jerin simpri masse pôcs; di chê di Novella Cantarutti, di Dino Virgili e di Lelo Cjanton, di Renato Appi, di Gaetano Perusini, di Giorgio Ferigo, di Otello Silvestri, di Manlio Michelutti, di Eraldo Sgubin e di ducj chei ch’a àn testemoneât, cu la lôr passion e il lôr lavôr, che il nestri Sodalizi al rapresente une part dal sigûr no secondarie, salacor primarie, di chel sentiment di identitât e di adesion ai valôrs morâi e ideâi che nô o ricognossìn tal nestri jessi furlans.
Jo o soi iscrit ae Filologjiche dal 1983, ch’o vevi disevot agns – duncje a son trentesîs agns, ch’o pai la cuote. Il Professôr Frau al à pensât ben ch’o vevi di impegnâmi ancje pe Societât e mi à presentât, dal 1994, al President Michelutti, ch’al voleve cognossimi prime di deventâ Segretari e di jentrâ, cussì, in Ufici di Presidence. Cul President Michelutti a jerin ancje Lucio Peressi, Vice par Udin, Dani Pagnucco, Vice par Pordenon, Lucio Zanier, Vice pe Cjargne, Eraldo Sgubin, Vice par Gurize, e Lorenzo Pelizzo, Tesorîr. E jo, apont, Segretari. Ta chei agns la Filologjiche no jere cussì complicade come vuê: lis rivistis sociâls (pal “Ce fastu?” o vevin Giovanni Frau e Gianpaolo Gri; pal “Sot la Nape” al jere Gianfranco Ellero; pal “Strolic furlan” a jerin Pier Carlo Begotti e Ovidio Colussi), il Congrès e il Numar Unic, la Fraie de Vierte, i cors pratics di lenghe e culture furlane e cualchi publicazion. La struture e podeve contâ dome su Marilena e Daniela, in segretarie, cun Romeo Piva, il pari di Daniela, a dânus une man pe contabilitât. Il contribût regjonâl, in chê volte, al jere di cinccent milions e no dome al bastave pe ativitât sociâl ordenarie, ma lu dopravin ancje par judâ altris associazions e adiriture i ents locâi, che nus domandavin un aiût par une publicazion o par une manifestazion.
Cun Lorenzo Pelizzo, ch’al è deventât President dal 2001, cuant che Manlio Michelutti nus à lassâts, cussì a colp, i timps a jerin gambiâts e o vin propit cjapade la corse. O vin decidût di fâ sù la struture, di cjoli un Diretôr, di pontâ su la biblioteche e sul archivi (a partî di chel fotografic di Ugo Pellis e di chel des cartulinis storichis), su la comunicazion e su internet, di domandâ l’acreditament al Ministeri pai Bens culturâi (che, vêlu, nol è stât par nuie facil), di impegnâsi par dâ plui servizis al teritori, ancje cun progjets e convenzions, di incressi lis ativitâts e lis colaborazions. Adiriture o vin rivât a fâ la certificazion di cualitât ISO9000, une rivoluzion pe gjestion aministrative dal ent, prin Istitût culturâl in Italie a fâle. La Societât Filologjiche dai ultins agns le cognossìn: numars simpri plui impuartants, il ricognossiment di interès regjonâl pe nestre biblioteche, vot dipendents, ativitâts ogni moment dal an, une rêt simpri plui fuarte di istituzions culturâls ch’a lavorin in cunvigne cun nô, manifestazions su dut il teritori cu lis rassegnis regjonâls de Setemane de culture furlane, di Identitât e autonomie, de Fieste de Patrie, il ricognossiment dal DocuScuele, struture fondamentâl pe promozion dal furlan tes nestris scuelis. Mi fermi chi: o varai timp, dopo, di stufâus cu la liste des robis fatis e di fâ.
La Societât Filologjiche, lu vin dit, e je gambiade une vore. Al è ancjemò cualchidun, pôc o par nuie informât, ch’al pense che la Filologjiche e sedi chê di une volte, ch’al à une vision vecje e superade de nestre Associazion, une vision magari invelegnade dal prejudizi e da l’invidie. Us domandi, duncje: se no vessin fat ce ch’o vin fat tai ultins vincj agns, simpri cun sens di responsabilitât e spirt di volontariât, ce saressie, vuê, la Societât Filologjiche? Jo o soi cunvint che, se no fos gambiade e cressude, la Filologjiche no le varessin plui. A son stâts i timps a puartâ chest cambiament, e je vere, ma dome la buine volontât, la dedizion e la colaborazion di tancj di nô – e tancj o sin, par furtune, a dâ une man pal ben dal Istitût – a àn rivât a guviernâ chest moment, lunc, di trasformazion. E je stade une bataie, pardabon une bataie. No dîs ch’o sin stâts propit obleâts a gambiâ, cirint soluzions simpri gnovis par frontâ lis dificoltâts, ma dal sigûr o vin scugnût fâ i conts cun cheste realtât in moviment e o vin interpretât miôr ch’o podevin la funzion di pont di riferiment pe culture furlane, che la nestre storie e la nestre tradizion nus à infidât.
Sino a puest, cumò, vino fat avonde, vino finût di penâ? Naturalmentri no, il moment di polsâ e di gjoldi dai risultâts ch’o vin otignût nol è ancjemò rivât. Anzit, propit nol rive mai. No podìn permetisi di clucî soreli, come che si dîs, e nancje di tirâ flât. A part la cuistion de ativitât ordenarie, che ogni dì nus impegne sul teritori, chest an o vin di puartâ fûr il discors dal Centenari, che si proponìn tant che moment di riflession pe Filologjiche di doman, e soredut, in prospetive, o vin di risolvi la situazion di dutis lis sedis sociâls. Chi a Udin no vin plui spazi: cu la biblioteche ch’e cres di un miâr di volums ad an – tra l’altri o vin di sistemâ dutis lis publicazions de Academie di Udin, un patrimoni straordenari pe storie furlane – o vin un DocuScuele, ch’al è simpri plui frecuentât, cu la sô rêt di passe 1.500 insegnants. L’idee e jere chê di provâ a comprâ un apartament, chi dongje, ma no vin cjatât ancjemò la soluzion finanziarie plui juste. A Gurize e je rivade, dal Comun, la Cjase Ascoli in comodât, une sede grande e biele pal nestri Istitût, ma ch’e domande un investiment par metile a puest; e la sede di cumò, in vie Bellini, o vin di cjatâi un’altre destinazion. A Pordenon o vin di tornâ a inviâ lis ativitâts de sede in Palazzo Cristallo, là che une pierdite di aghe e i lavôrs par sistemâ l’apartament, nus àn blocâts aromai di mês e mês. A Tumieç o sin daûr a resonâ cul Comun e cul Museu Gortani par une gnove sistemazion, ancje chi in comodât, par risolvi la situazion di Cjase Gortani, che di agns, aromai, no rivìn a doprâ. No dîs nuie su la riforme dal Statût, in relazion a lis gnovis normativis in materie di associazions culturâls, ma o varìn di cjatâsi in curt in Assemblee straordenarie par resonâ, ducj insieme, sul doman dal nestri Istitût.
Par sierâ cheste mê Relazion morâl, prime di passâ a ilustrâ, plui tal detai, l’ativitât dal an passât e dal an in cors, il gno plui sintût agrât ur va a ducj chei, personis e istituzions, ch’a àn metût a disposizion timp e risorsis economichis par dânus une man tal 2018. La Regjon autonome, prime di dut, ch’o vin vude la conferme dal ordenari dal an passât e une cuote di finanziament in plui pe struture dal DocuScuele – e di chest o vin di ringraziâ l’Assessore ae Istruzion Alessia Rosolen. Cuntune gnove convenzion cu l’ARLeF, ch’o cunfidi di stabilî in curt, o rivarìn a puartâ indenant, o soi sigûr, progjets e programs impuartants pe scuele e pe promozion de lenghe; cul gnûf President, Eros Cisilino, si sintìn dispès, lis ocasions di cundividi azions e ativitâts no mancjin e no mancjaran.
Cu la Regjon o vin di ringraziâ, dutcâs, ancje il Ministeri pai Bens culturâi, il MIBAC, che nus à ricognossûts ancjemò une volte tant che unic istitût culturâl, di riferiment, pal Friûl. No si fermìn chi a gloriâsi par chest risultât, però, ma o cjalìn indenant: o varìn di scombati, e no pôc, par un secont ricognossiment, chel dal Ministeri de Istruzion Universitât e Ricercje, il MIUR, un ricognossiment no dome par continuâ a fâ ativitât di formazion certificade pai insegnants, che za le fasìn, ma ancje par jentrâ in progjets sientifics di cooperazion internazionâl.
Une peraule, plui di une peraule, o ai di spindi pe Fondazion Friûl, benemerite istituzion ch’e interprete te maniere plui ecuilibrade la sô funzion di promozion de comunitât furlane in ducj i siei aspiets. Une vore impuartant al è stât rivâ a une convenzion, confermade chest an cul President Giuseppe Morandini, par programâ lis nestris ativitâts par timp e in cunvigne cun chês altris istituzions culturâls furlanis.
Nus judin, par iniziativis, publicazions e progjets sul teritori, ancje la Fondazion CARIGO, di Gurize, la Bancje popolâr di Cividât e la rêt dai istitûts dal Credit cooperatîf regjonâl, ch’a colaborin ae Setemane de culture furlane o par altris iniziativis. O ringrazii di cûr i mestris dai cors pratics di furlan, ch’a stan sot cun passion al rapuart cul teritori e che no ju ringraziarìn mai avonde. O ringrazii ducj chei che nus àn puartât un soci gnûf, un amì, un fi, un nevôt, par fâ cressi la nestre Societât. Ducj a àn di dâ une man.
O ai lassât par ultins chei ch’a àn lavorât di plui: i nestris Vicepresidents par Udin, Carlo Venuti, pe Cjargne e pal Friûl de Alte, Giuliana Pugnetti, par Pordenon, Pier Carlo Begotti, e par Gurize, Renzo Medeossi; il Tesorîr, Carlo del Torre, che nus judarà a capî il rindicont de anade e il stât patrimoniâl dal Istitût, e il Segretari, Pier Giorgio Sclippa, simpri atent a lis cuistions de biblioteche, dal archivi e dai bens culturâi. Cun lôr, cui diretôrs e i redatôrs des rivistis, cui autôrs e i curadôrs des publicazions, cui components dal Consei gjenerâl, dal Comitât diretîf, cui nestris dipendents e cui altris colaboradôrs, o vin cirût di fâ pal miôr. O votìn, cumò, la gnove liste pal Consei gjenerâl: o speri ch’al sedi un gnûf trienât di risultâts impuartants, come l’ultin, e di sodisfazion par ducj nô.
O sieri cun chestis considerazions, alore, la mê Relazion morâl, cu la braùre di puartâ ae vuestre atenzion, ca di un moment, numars pardabon impuartants di ativitâts, di progjets, di publicazions e di prospetivis pal nestri Sodalizi.
Graziis a ducj e bon lavôr pal Centenari!
Il President de Societât
Federico Vicario
Udin, ai 10 di Març dal 2019