Cjârs Cunfradis e Amîs de Societât Filologjiche Furlane,
la situazion che si cjatìn a vivi ore presint e propon, ma chest al è naturâl, cualchi mutîf di sodisfazion e cualchi mutîf di preocupazion. No dîs nuie dal cuadri economic gjenerâl: l’an passât o vin vût un moment di riprese, ancje in Friûl, ma o sin ancjemò cetant lontans dai nivei dal 2007-2008. No podìn che sperâ che lis robis a ledin in miôr tal 2016, lavorant e impegnantsi come simpri, e plui di simpri, cun sens di responsabilitât e cun solidarietât par chei ch’a son in dificoltât, che no son pôcs ancje chi di nô.
Se la situazion economiche e à fat dutcâs un passut indenant, dal sigûr un’altre cuistion, tai ultins timps, e je deventade centrâl tal dibatit public, une cuistion che si podarès definî, pe sô complessitât, une urgjence civîl e istituzionâl. O fâs riferiment, naturalmentri, ae “cuistion furlane”. No sai se si rive a ridusi il nestri probleme tai tiermins di autonomie e specialitât, che ogni dì i gjornâi a tirin in bal, no sai se l’autonomie e la specialitât a sedin ancjemò la clâf par frontâ il probleme o no sedin, magari, te interpretazion che ur din, part dal probleme. Ce ch’al è clâr, al è che si puedin meti in vore politichis e azions ch’a fasin il ben dal Friûl, ch’a sostegnin l’idee di Friûl, lis istituzions dal Friûl, la culture e l’identitât dal Friûl, la sô economie e il so teritori, e altri politichis e azions che, al contrari, a fasin il mâl dal Friûl, che lu frucin e lu fasin a tocs, ch’a comprometin lis sôs espressions istituzionâls, storichis, lenghistichis e culturâls, ch’a dinein i valôrs de sô memorie e de sô tradizion. E jo mi domandi, e us domandi, se pontant ae nestre stele polâr, ch’al è il Friûl, lis robis a stan lant in miôr o in piês e, ancjemò, ce prevision che si sintìn di fâ pal doman de nestre Tiere.
Chi no si trate dome di economie e nancje dome di culture. Provìn a pensâ ai nestris paîs, soredut chei de alte, cun cjasis simpri plui sieradis e mancul int par strade, cu lis cjampanis che nus clamin pai funerâi e no pai batisims. E la pierdite dai valôrs morâi e civîi, la maleducazion, la vergognose volgaritât dai compuartaments publics, lis cent e mil stradis, piçulis e grandis, che no puartin in di nissune bande, ch’a fischin il nestri teritori, che nus rindin simpri di plui tiere là che si passe e simpri mancul tiere là che si vîf. La “cuistion furlane”, ch’o disevi prime, nol è un probleme sôl, al è un complès di problemis, e je une cuistion ch’al è masse facil pensâ di risolvile declarant la difese de autonomie e de specialitât, prime di domandâsi e di capî ce che si varès di meti dentri ta cheste autonomie e ta cheste specialitât. A son dôs peraulis ch’a restin vueidis e sterpis, a son doi concets metafisics, imateriâi, spirituâi, se no ju puartìn a produsi risultâts pal nestri vivi di ogni dì. E chi, par me, i discors a son almancul doi.
Il prin discors al rivuarde, duncje, i contignûts de autonomie, là che no vin di sierâsi in difese di ce ch’o vin, ch’al sarà simpri di mancul, soredut se a continuin a ridusi i trasferiments dal Stât centrâl ae Regjon. A part blocâ cheste riduzion dai finanziaments – ma chi, naturalmentri, a son i nestris politics ch’a àn di zuiâ la lôr partide cun Rome – al sarès il câs di impegnâsi tal procès di slargjâ l’autonomie regjonâl, come ch’a àn fat i trentins e i sudtirolês tai ultins sessante agns, pensant par esempli a scuele, universitât, ambient e bens culturâi. La formazion scuelastiche e universitarie dai nestris fîs, il guvier dal teritori e des risorsis naturâls, la gjestion dal patrimoni artistic, archivistic, archeologjic (e ancje, la sô valorizazion in tiermins turistics, si capìs): ise cheste dome che une rivendicazion fûr di timp e di misure o, magari, la prospetive concrete par dâ, come ch’a àn fat i trentins, une gnove anime a cheste nestre autonomie simpri plui lamie, sconfusionade e spauride?
Il secont discors al rivuarde l’articolazion de Regjon e soredut il rapuart tra il Friûl e Triest. Ogni dì si lei sul gjornâl o si scolte par radio l’intervent di chest politic o di chel inteletuâl ch’a declarin la lôr opinion su la macroregjon cul Venit e cul Trentin (sence domandâur ai trentins ce ch’a pensin), su la citât metropolitane di Triest o adiriture sul Teritori libar di Triest, sul Friûl fat a tocs par colpe des utis, sul referendum pes dôs provinciis autonomis e vie indenant. O sintìn, plui a Pordenon che a Udin, ma ancje a Udin: se o vin di stâ sot di Triest, al è miôr tornâ sot di Vignesie. Al samee che nol sedi pussibil jessi parons a cjase nestre, o vin di stâ sot di cualchidun, o vin di restâ sotans. Jo o pensi, pluitost, ch’o vin di scomençâ a dî e a dimostrâ che cheste e je la nestre Regjon, la Regjon furlane, e o sotolinei furlane; ch’o vin di tratâ seriamentri la devoluzion sul teritori des competencis aministrativis, che cumò lis à dutis in man la Regjon, a Triest, e rivâ a une ripartizion plui juste des risorsis; ch’o vin di risolvi nô i nestris problemis sence sperâ che cualchidun di fûr al vegni chi a dânus lezions, disint ch’al è pal nestri ben e no pal so. Se no rivìn a gjestî la situazion intun cuadri unitari e je dome che colpe nestre e dai nestris politics, che ju vin votâts nô. Se Triest e domande plui autonomie, cu la citât metropolitane o altris formis di agregazion aministrative (il Teritori libar), jo no ai nuie ce dî: ognidun al à dirit di jessi paron a cjase sô, l’impuartant al è che nol vegni a paronâ a cjase mê. E je vere che il matrimoni tra Friûl e Triest al è stât un matrimoni di interès e no d’amôr, ma no crôt che divorziâ e sedi la soluzion juste: piês il tacon de buse, si disarès. Cirìn di prontâ, inalore, la liste des robis concretis di fâ e metìnsi sot par fâlis, daûr dal esempli di Tiziano Tessitori, nestri President e pari de Regjon autonome. A tacâ, jo o dîs, di chê “cuistion furlane”, ch’e inten la culture, l’identitât, la lenghe, il teritori, une cuistion che i tiermins di autonomie e specialitât, al moment, no àn rivât a rapresentâ ad in plen: se propit nô furlans no si rindìn cont ch’e esist une cuistion furlane, o dimostrìn di no capî il probleme e duncje di no vê titul par risolvilu. In câs, di jessi nô part di chest probleme, se no propit la sô cause.
Lis peraulis a son impuartantis, ma ancje i numars. O vevi pensât di tignî une part di cheste Relazion morâl propit sui numars, par rindi la dimension de ativitât dal nestri Sodalizi a pro de nestre int, par capî miôr ce ch’o fasìn e ce ch’o vin di fâ. Sì, parcè che tal 2019 a colin i prins cent agns de fondazion dal nestri Istitût, e chest centenari al rive intun moment: nô o varìn di domandâsi il sens e lis resons profondis dal nestri impegnâsi par tignî vive la nestre identitât, la culture, la lenghe, la memorie dal nestri popul. E soredut, o pensi, o varìn di dâsi une rispueste.
Un’ocasion di riflession, intant, nuse à dade l’ARLeF. Ai prins di Zenâr, se mi visi ben, nus rive la domande di tirâ dongje e meti in ordin lis informazion su lis ativitâts didatichis e formativis su la lenghe furlane ch’o vin inmaneât tai ultins dîs agns. Mi limiti, chi, ai ultins trê agns, i trê agns di chest Ufici di Presidence. O vin fat 66 cors pratics, tai comuns dal Friûl, cun 1.200 partecipants. O vin tignût 30 cors di formazion par insegnants, naturalmentri ricognossûts dal Ufici scuelastic regjonâl (ancje parcè ch’o sin un ent di formazion acreditât), cun passe 850 partecipants. Un numar, scusait, straordenari.
La comunicazion e je un’altre ocasion di contat cu la int, naturalmentri, e ancje chi o vin numars une vore impuartants. O vin la nestre pagjine Marilenghe sul Messaggero, ative dal Zenâr dal 2005, e tai ultins trê agns o vin vudis 62 jessudis. Il nestri Friûl di Jevât sul setemanâl de Arcidiocesi di Gurize al ven fûr dal Fevrâr dal 2008 e tai ultins trê agns o vin vudis 33 jessudis. Il nestri sît internet, tirât a gnûf dal 2014, al à vût 18.700 visitis dome tal 2015; o vin une newsletter cun passe 2.000 contats e 250 spedizions tai ultins trê agns; la nestre pagjine Facebook e conte 5.000 “mi plâs” – ma no il gno, jo no soi su Facebook. La Biblioteche sociâl, par dîus, e à garantît il servizi di document delivery a passe 6.000 utents, in trê agns, e continue l’increment dal so patrimoni in reson di 500 volums ad an – ancje cun impuartantis donazions di privâts – e la catalogazion di titui di argoment furlan in colaborazion cu lis rêts bibliotecaris de Regjon, par no dî de ativitât dal Centri di documentazion e ricercje educative, simpri te struture de Biblioteche, i contats cu lis scuelis e la racuelte dai materiâi didatics. E dopo a son i progjets speciâi.
La produzion editoriâl, lis rivistis sociâls e lis publicazions no statutaris, a fasin numars impuartants, par distribuzion di copiis e venditis (ancje in rêt). Plui impuartant ancjemò però, seont di me, al è il numar dai colaboradôrs a chestis publicazions, in dut il Friûl e fûr dal Friûl, une partecipazion corâl che si le viôt soredut in ocasion dai Congrès e de redazion dai Numars Unics. Ancje par vie di cheste adesion popolâr, di cheste largje partecipazion de int, o rivìn a capî cetant che la Filologjiche e je ricognossude sul teritori tant che ent di riferiment pe lenghe e pe culture furlane. E propit su chest ricognossiment, ch’al è un dai valôrs plui impuartants ch’o vin, o rivìn ancje a promovi la Setemane de culture furlane, ch’e conte ogni an desenis di adesions di associazions, prolocos, scuelis, istituzions publichis e privadis, personis ch’a decidin di dânus une man par dâ un servizi al Friûl. Ancje l’an passât il sucès de Setemane de culture furlane al è stât straordenari, plui di ce che si spietavin, e propit la Setemane, o riten, al è stât il salt di cualitât fondamentâl ch’o vin fat tai ultins timps: prime lis iniziativis sociâls impuartantis a jerin dome il Congrès e la Fraie, ma cumò o rivìn a tignî i rapuarts, ogni an, cun dut il teritori, stabilint colaborazions cu lis associazions locâls, promovint manifestazions, fasint sù une vere “rêt de culture furlane”. Cheste e je pardabon la sodisfazion plui biele: là ch’o domandìn une man, nuses dan dutis e dôs, o sintìn l’afiet e la considerazion che la nestre Filologjiche e à in dut il Friûl, o capìn, une volte di plui, che la nestre comunitât nus domande unitât e no division, nus domande di lavorâ in cunvigne, no di lâ ognun par so cont.
Il rapuart di colaborazion al è stât particolarmentri fuart cu lis altris associazions ch’a son chi cun nô in vie Manin, a Palaç Mantiche: la Deputazion di Storie patrie pal Friûl, l’Academie di Udin di Siencis, Letaris e Arts, l’Associazion Amici dei Musei, l’Associazion teatrâl furlane. Propit cun lôr e cun altris amîs, l’Academie San Marc di Pordenon, l’Istitût Pio Paschini pe Storie de Glesie in Friûl e l’Universitât popolâr di Udin, o sin impegnâts tal progjet “Identitât culturâl dal Friûl”, un progjet ch’al à la poie de Fondazion CRUP e che si propon propit di dâ rispueste a chê “cuistion furlane” ch’o disevi prime. Ma dute cheste ativitât, come ch’o viodês, e je par creâ colaborazions, par meti la Societât al servizi dal mont culturâl furlan, par rindile simpri plui vierte e pronte a interpretâ la sô funzion di ent di riferiment par dute la Regjon. E ancje l’ativitât in sede, chi a Udin, e je cressude une vore, cu la partecipazion a Friuli DOC e a Vicino/Lontano, cu lis mostris te Cjanive de Filologjiche, lis manifestazions, lis conferencis.
Par sierâ cheste mê Relazion morâl, il gno plui cordiâl ringraziament ur va a ducj chei, istituzions e personis, ch’a àn metût a disposizion risorsis economichis e timp par dânus une man tal 2015: la Regjon autonome, che si spietìn di recuperâ une cuote di finanziament cul assestament di Jugn par promovi l’ativitât dal Centri di documentazion e ricercje educative pe scuele furlane; la Fondazion CRUP, di Udin e Pordenon, che no dome nus sosten pai nestris progjets, in particolâr par Olmis, ma nus à judât une vore pe ristruturazion di cheste sede; la Fondazion CARIGO, di Gurize, la Bancje popolâr di Cividât, di simpri cun nô, il Credit cooperatîf di Lucinìs Fare e Caprive e chei altris istitûts di credit cooperatîf, che nus àn judât pe Setemane de culture furlane, par publicazions e altris ativitâts. O ringrazii di cûr i mestris dai cors pratics di furlan, ch’a curin cun passion il rapuart cul teritori e che no ju ringraziarìn mai avonde (si varès di fânt il dopli dai cors pratics, chest si varès di fâ!). O ringrazii ducj chei che nus àn puartât un socio gnûf, un amì, un fi, un nevôt, par fâ cressi la nestre Societât. O ai lassât par ultins che ch’a àn lavorât di plui: il nestri Vicepresident par Udin, Giannino Angeli, chel par Pordenon, Pier Carlo Begotti, e chel par Gurize, Renzo Medeossi; il Tesorîr, Carlo del Torre, e il Segretari, Pier Giorgio Sclippa. Cun lôr, cui diretôrs e i redatôrs des rivistis, cui curadôrs des publicazions, cui components des Comissions, dal Consei gjenerâl, dal Comitât diretîf, cui nestris dipendents e cui altris colaboradôrs, o vin cirût di fâ pal miôr.
Graziis a ducj e bon lavôr pal an cu ven!
Il President de Societât Federico Vicario