Cjârs Cunfradis e Amîs de Societât Filologjiche Furlane,
il moment che si cjatìn a vivi nol è facil. Ancje l’an passât, magari cussì no, la crisi economiche si è fate sintî a fuart, lis situazions di dificoltât sociâl a son stadis tantis e seriis, la mancjance di lavôr, par zovins e mancul zovins, e je stade in cualchi câs dramatiche. Ogni dì o vin sintût, ancje chi di nô, di impresis daûr a sierâ, di fameis che no rivin ae fin dal mês, di istituzions publichis e privadis che no àn lis rispuestis che la int si spiete. Dome cumò, tai ultins doi o trê mês, al samee che alc al ledi in miôr, cuntune riprese economiche ch’e varès di puartânus fûr tal zîr di cualchi an, a disin, di cheste situazion cussì complicade. L’uniche maniere che nô o cognossìn par frontâ e superâ lis dificoltâts – e cheste no je la prime prove che la Storie nus met denant, la liste e podarès jessi lungje – e je chê di lavorâ, di impegnâsi di plui, al è il sens di responsabilitât e di solidarietât, al è il dâsi adun, al è il savê cjatâ lis resons plui profondis dal nestri jessi comunitât e popul.
La Societât Filologjiche e vîf ta cheste realtât, naturalmentri, o sin lontans dai agns Novante, ancje nô o vin scugnût cjapâ at e fâ front a cheste situazion. Ce vino fat? Ce ch’a fasin ducj: o vin lavorât di plui, si vin impegnât di plui, o vin cirût dutis lis formis di colaborazion cu lis istituzions publichis e lis associazions privadis, ch’a vedin a cûr il ben de nestre int, o vin cjatât dentri di nô e cui nestris amîs lis fuarcis par dâ alc di plui, par fâ simpri miôr ce ch’o podevin fâ cun ce ch’o vevin a disposizion. E il lavôr chest an propit nol è mancjât (o cirarai di presentâusal, par cualitât e numars, ca di pôc, dopo la Relazion morâl), un an che nus à puartât cualchi risultât impuartant, o riten, e ch’al à segnât une valide prospetive di bati di chi indenant ancje par une gnove politiche culturâl de nestre regjon.
O vin di metisi, simpri di plui, al servizi dal teritori e in cunvigne cui sogjets (associazions e istituzions culturâls) ch’a operin sul teritori. La comunitât furlane e à straordenaris valôrs di culture, di tradizion, di civiltât e di identitât – te pluralitât des sôs declinazions locâls, si capìs – valôrs ch’a domandin dome che di vignî fûr e di jessi cognossûts e preseâts. E il valôr dai valôrs, disìn cussì, e je l’unitât dal Friûl, dut intîr, une unitât ideâl ma ancje materiâl, ch’o vin di scombati ogni dì parcè che no vegni mancul, parcè che lis divisions no vedin di prevalê, parcè che lis resons dal nestri ricognossisi comunitât furlane a sedin simpri plui fuartis dai argoments di chei che lis dinein. E se in cheste prospetive lis condizions dal timp presint no son facilis, parcè ch’o vin di fâ i conts cu la globalizazion, parcè ch’o vivìn une crisi morâl e sociâl, ancjemò prime che economiche, parcè che lis trasformazions dal ambient e dai mûts di vivi, lis gnovis imigrazions, i disecuilibris, lis prevaricazions e lis disparitâts, se dut chest al samee di comprometi la nestre vision di Friûl, alore o vin di impegnâsi ancjemò di plui. E je cussì, no son altris discors di fâ, no vin nissune altre soluzion.
Ma alc di impuartant lu vin fat.
La novitât dal an passât e je stade siguramentri la Setemane de culture furlane, une novitât cussì biele e ch’e à vût un sucès cussì grant, plui di ce che si spietavisi ancje nô, ch’al sarès di domandâsi parcè che no le vin pensade prime. O vin rivât a promovi passe cuarante manifestazions, tra cunvignis e conferencis, tra visitis a monuments, escursions sul teritori e presentazions di volums, tra spetacui teatrâi, musicâi e pes scuelis, maratonis di leture, o vin puartât la Setemane de culture furlane in cinc provinciis (Pordenon, Udin, Gurize, Vignesie e Trevîs), o vin vude la poie di ducj i comuns là ch’o vin fat iniziativis, dai istitûts di credit (siet bancjis di credit cooperatîf e lis nestris dôs fondazions di Udin e Pordenon e di Gurize) e di altris privâts che nus àn dade une man. Ma soredut, e chest al è fondamentâl, o vin vude l’adesion e la partecipazion di associazions culturâls regjonâls e locâls, prolocos, scuelis, o vin vude la rispueste de int e l’aiût di tancj di lôr che si son impegnâts e a àn dât il lôr timp e la lôr passion par rindi plui biele la Setemane de culture furlane; che no je dome nestre, ma e je di ducj. Cheste e je stade pardabon la sodisfazion plui biele: là ch’o vin domandade une man, nuses àn dadis dutis e dôs, o vin podût sintî l’afiet e la considerazion che la nestre Filologjiche e à in dut il Friûl, o vin capît, une volte di plui, che la nestre comunitât nus domande unitât e no division, nus domande di lavorâ in cunvigne, no di lâ ognun par so cont. E cheste prove le vin dade, inalore, la prove che la comunitât furlane, la nestre comunitât, e je buine di programâ e di meti in vore progjets in colaborazion, che no si trate plui di fâ “di bessôi”, come che si diseve une volte, ma ch’e je ore di “fâ scuadre” e di “metisi in rêt”, come che si dîs cumò.
E simpri in cheste prospetive, tra l’altri, o vin rivât a un altri biel risultât, chest an, chel di vê cumò cun nô ta cheste sede storiche di vie Manin, a Palaç Mantiche, altris amîs impegnâts pe promozion de culture, de storie e de lenghe furlane: mi riferìs ae Deputazion di Storie patrie pal Friûl, ae Academie di Udin di Siencis, Letaris e Arts, ae Associazion Amîs dai Museus e ae Associazion teatrâl furlane. No si trate dome di condividi un lûc fisic – e, magari, une part di spesis di funzionament, che nol è dutcâs mâl – chi si trate di resonâ insieme su iniziativis e progjets, di confrontâsi e di miorâsi, di condividi ancje i servizis di une sede ch’e dispon di une biele biblioteche, une vore frecuentade di studiôs e students, di un biel Salon d’onôr, di spazis par esposizions, mostris, conferencis, cunvignis, di un sît internet e di une newsletter ch’a funzionin une vore ben. Cheste e je la nestre “Cjase de culture furlane”, un biel progjet e une scomesse: o scometìn che insieme o lavorìn miôr che no di bessôi, o scometìn che ducj a podaran puartâ e ricevi un contribût, cu la massime libertât, par cressi lôr e fâ cressi i valôrs de culture e de identitât de nestre tiere. Se e je vere ch’o sin l’istitût culturâl di riferiment pe culture furlane, o vin di cjapâsi une part di responsabilitât positive e propositive, ta cheste situazion, o vin di metisi al servizi dal teritori, come simpri e plui di simpri, une “buine pratiche”, chê di metisi a disposizion di chei altris, che dome cui ch’al fâs volontariât le capìs fin insom e al à lis cjartis in regule par metile in vore. Sì, la culture furlane e je volontariât, soredut volontariât: no rivarìn mai a compensâ il lavôr dai studiôs, dai cultôrs, dai ricercjadôrs, di dutis chês personis che, ognidun cu lis sôs competencis, a tegnin e a dedichin il lôr timp a cheste idee che si clame Friûl.
Nol è compit nestri, ch’o sin un Istitût culturâl, chel di judicâ chei altris e di fâ la liste dai bogns e dai triscj, di chei che nus judin e di chei che nus dan cuintri. Dut al contrari, o sin nô che si spietìn, ch’o domandìn, ch’o pratindìn di jessi judicâts e valutâts, par viodi ricognossût ce che di bon o fasìn, ogni dì, cun passion e spirt di servizi, par vie che nol esist progrès sence ricognossiment dal merit, sence justizie, sence ecuitât e sence onestât. Se nus interesse l’unitât de comunitât furlane, spirituâl e ideâl prime di dut, o sin chi a domandâ di fâ un investiment fuart sui sogjets, come la nestre Societât Filologjiche, ch’a resonin e ch’a operin cun cualitât e cun continuitât, ch’a dan ponts di riferiment sigûrs, che si misurin cun chei altris in maniere positive e no esclusive. La Regjon e à di scoltâ la vôs de culture furlane, la nestre vôs, une vôs ch’e je spieli di storie, di tradizion e di valôrs, une vôs ch’e domande unitât pal Friûl, une vôs ch’e domande di scoltâ l’anime di un popul, parcè che nô no vin pôre di confrontâsi cul moment storic ch’o vivìn, di cjalâ indenant e di proponi soluzions ancje gnovis par nô e pai furlans di doman.
O voi a concludi cheste Relazion morâl cuntun pâr di osservazions: no pensi ch’a sedin provocazions, magari indicazions operativis pal an cu ven e pai agns dopo.
Tiziano Tessitori, grant President de Societât Filologjiche (dal ’54 al ’63) e pari de Regjon autonome, al diseve: “Ducj i furlans di bon judizi a volaran fâsi dongje ae Societât Filologjiche Furlane, par dâi une vite prosperose e feconde pal ben de Piçule Patrie”. Chest al è il moment, par chest o sin chi. La prime indicazion e je ch’o vin di recuperâ un livel di finanziament regjonâl just e in linie cul lavôr ch’o fasìn e cu la funzion ch’o vin, pont di riferiment centrâl al servizi dal nestri teritori e de culture furlane. Se si ves di valutâ il numar di ativitâts e di publicazions che si fasin cumò, in confront par esempli cui agns Novante, ch’o disevi prime, si varès di vê al mancul cuatri voltis ce ch’o vin. I conts precîs, par passâ dai francs ai euros, ju lassi fâ al Tesorîr. La nestre struture e je al limit, o varessin di vê al mancul un pâr di personis in plui, se o volìn mantignî il livel des ativitâts ch’o fasìn sence scjafoiâsi: o vin progjets impuartants pes sedis citadinis di Gurize e di Pordenon, di nestre proprietât, par no dî di Tumieç e de Cjargne, une aree che, par plui resons, dutis lis istituzions de regjon a varessin di tignî cont particolâr.
La seconde indicazion e je ch’o vin di pontâ a vê cun nô la nestre int, simpri di plui: il numar dai socios al à fondamentâl e pardabon o speri che Tessitori, cul timp, e vedi reson. Rispiet al an passât chest numar al è cressût, cualchi socio “morôs” al à tornât a paiâ la cuote e numerôs a son i socios gnûfs. Chest al sarà stât pe visibilitât ch’o vin vude pe Setemane de culture furlane e pes ativitâts ch’o vin fat, ma ancje pal grant lavôr dai mestris dai cors di furlan, ch’a curin il rapuart cul teritori e che no ju ringraziarìn mai avonde: si varès di fâ il dopli dai cors pratics, chest si varès di fâ. Se ducj o rivassin a puartâ un socio gnûf, e magari doi i Conseîrs e i Fiduciaris, o saressin a puest. E di plui si varès di fâ pai socios “a distance”, magari tal forest, fasint une biele promozion de nestre ativitât in colaborazion cui amîs dal Ent Friûl tal Mont – che lis publicazions e dutis lis comunicazions a rivin ancje par internet. Un biel obietîf al sarès rivâ a “cuote 5.000” pal prin secul di vite dal Sodalizi: il secul al cole dal 2019, o vin ancjemò cualchi an par lavorâi parsore.
Par sierâ cheste mê Relazion morâl, il gno plui cordiâl ringraziament ur va a ducj chei, istituzions e personis, ch’a àn metût a disposizion risorsis economichis e timp par dânus une man tal 2014: la Regjon autonome, che si spietìn di recuperâ une cuote di finanziament in ordenari e altris risorsis cul assestament di Jugn; la Fondazion CRUP, di Udin e Pordenon, che no dome nus sosten pai nestris progjets (in particolâr par Olmis), ma nus à judât une vore pe ristruturazion di cheste sede; la Fondazion CARIGO, di Gurize, la Bancje popolâr di Cividât, simpri cun nô, il Credit cooperatîf di Lucinìs Fare e Caprive e chei altris istitûts di credit cooperatîf, che nus àn judât par publicazions e ativitâts. E dopo o ringrazii ducj chei, e a son tancj, ch’a àn dedicât e a continuin a dedicâ il lôr timp e la lôr passion par fâ vivi e cressi le nestre Societât e, cun jê, la cussience, l’identitât e i valôrs dal nestri popul. Un ringraziament particolâr, inalore, ai prins colaboradôrs de Societât: ai diretôrs e ai redatôrs des rivistis, ai curadôrs des publicazions, ai mestris dai cors pratics, ai components des Comissions, dal Consei gjenerâl e dal Comitât diretîf, ai amîs dal Ufici di Presidence, e ai nestris dipendents. Graziis a ducj e bon lavôr pal an cu ven!
Il President de Societât
Federico Vicario
Udin, al 1 di Març dal 2015