La Setemane de culture furlane, dai 4 ai 14 di Mai, e torne chest an a proponi il so percors di promozion dal nestri teritori cuntune rêt di colaborazions simpri plui largje e cualificade. La storie e la memorie dal Friûl, duncje, lis personis che lu àn onorât cul lavôr, l’inteligjence e la sensibilitât, lis resons dal nestri cjatâsi e ricognossisi part di une comunitât ch’e cres in armonie e concuardie, l’identitât di un popul, lis istituzions ch’a rapresentin i siei valôrs. Chest al è il troi ch’al segne la Setemane de culture furlane pal 2017, une rassegne pensade e realizade par dâ continuitât a un’esperience di riflession su moments impuartants de nestre vite coletive a partî de ereditât umane di chês personis ch’a àn savût capî e interpretâ in maniere plui alte il spirt dal Friûl, personis sicu Pieri Çorut, pari de lenghe furlane, Maria Tore Barbina, ricercjadore di etnografie e lenghistiche, Domeni Zannier, poete e promotôr di Scuele libare furlane, Toni Beline, scritôr e cussience critiche dal so timp, Gilberto Pressacco, musicolic e inteletuâl. Su chest troi o vin cjatât l’adesion e la partecipazion di amîs e di associazions che si impegnin, cun passion, par fâ madressi une dimension culturâl gnove ae nestre Tiere, une Tiere che nô o volìn plui unide, plui fuarte, plui cussient de sô storie e plui sigure dal sô doman.
Il program de rassegne al rive, chest an, a 121 events, un numar pardabon impuartant, plui alt di simpri, a testemoneâ l’adesion e il favôr che la Setemane e cjate te nestre comunitât regjonâl. O vin une vore di iniziativis pensadis pai fruts e pe scuele furlane, cu la presentazion dal diari bilengâl Olmis e lis maratonis di leture tes bibliotechis de Regjon, ma ancje mostris, visitis, conferencis, cunvignis di studi, concerts e spetacui teatrâi. La presentazion puntuâl de rassegne e je a disposizion sul sît www.scf2017.it, là che une descrizion dal event e compagne dutis lis indicazions utilis par rivâ sul puest. Cheste Setemane de culture furlane e je la miôr ocasion, par ducj, par ufrî un contribût ae promozion culturâl, e ancje turistiche, dal Friûl: o cunfidìn che ancje chest an la partecipazion de popolazion e savarà premiâ il grant sfuarç fat pe organizazion de rassegne.
Il nestri agrât, di cûr, ur va a ducj chei che si son dedicâts a meti adun e a promovi un program cussì interessant, ch’al viôt la corâl colaborazion di 130 associazions e prolocos, 60 comuns, un risultât che nus conferme la bontât di cheste iniziative. Une Setemane de culture furlane che i augurìn, di cûr, la miôr furtune.
Federico Vicario
«Messaggero Veneto», 25.04.2017