Ai 8 di Mai a colin cincuante agns de muart di un un dai oms e inteletuâi che a àn dat di plui pe sô tiere, come predi, mestri, linguist, storic, leterât, critic di art e gjornalist. O fevelìn di Josef (Bepo) Marchet, pe anagrafe taliane Giuseppe Marchetti.
Nassût a Glemone tal 1902, al studie in seminari e al è ordenât predi tal 1925. Tai agns ch’a vegnin daûr, al frecuente i cors superiôrs di teologjie te Facoltât di Venegono e te Universitât Catoliche di Milan, là che al cuiste la lauree in letaris, cuntune tesi sul volgâr furlan tai codiçs di Glemone dal XIV secul. Tal 1929 al tache a insegnâ letaris a Udin e, dopo une esperience di capelan militâr in Abissinie, al torne a fâ il professôr in Friûl. Antifassist in timp di vuere, tal Fevrâr dal 1946 al fonde cun Felix (Felice) Marchi il gjornâl in lenghe furlane “Patrie dal Friûl”, fasint bataiis pal autonomisim, e tal 1949 al ten a batisim il moviment letarari "Risultive".
Il Friûl di vuê lu onore in tantis manieris uficiâls, ancje in Universitât (il Cirf al è intitulât a lui), ma al sarès fâi un tuart dismenteant, dutun cul impegn culturâl, la sô vis polemiche, che i à fat tignî la distance cun oms e istituzions che pûr a puartavin indenat la stesse cause.
Il so autonomisim furlan al jere plui radicâl di chel dai siei plui grancj esponents, Tiziano Tessitori e Michele Gortani, o des plui impuartantis Associazions, a partî de Societât Filologjiche Furlane, e nol faseve nissun scont a Rome. Origjinâl ancje il fat di poiâsi, lui predi, a un miedi anarchic pe fondazion e pal finanziament dal gjornâl.
Dai prins numars di “Patrie dal Friûl”, che al puartave il sot-titul “sfuei setemanâl indipendent” si ere capît che al pontave suntune identitât etniche e lenghistiche che no fos un supuart de talianetât. E cuant che tal 1947 la plui part dai furlans, ancje autonomiscj, a cjaparin lis distanziis par une Regjon a Statût speciâl decidude ae Costituent, ch’e intindeve prudelâ la minorance slovene, lui al restâ cuasi di bessôl te sô bataie. Anzit, in chê volte al à vût scrit che «il furlan nol à mai pierdude une cuarte di teren de bande dal todesc e dal sclâf che a son pursì lenghis svilupadis e feveladis ancje plui a larc dal talian; ma al à pierdût e al piert ogni dì cuintri il talian e fintremai cuintri il venit che al è nome un dialetuz; parcè che chei di Vignesie prin e i talians daspò a son rivâz adore di fâ jentrâ inte coce de nestre int che il furlan al è nome un rustic lengaz di contadins e di ignoranz».
Ancje cun Triest al leve ju pesant: «cumò si varès di deventâ l’interland di Triest par projodi la capitâl di lat, di formadi, di spongje, di massàriis distinadis ‘e prostituzion; e rizevi in ganbio tubercolosi, sifilide e insolenzis. A Triest, fintremai cent agns indaûr, si fevelave ancjemò furlan; dopo, chêi là nus àn rineâz, si son civilizâz e si son miscliçâz cun duc’ i rifudùms che s’ingorghin tun puart di mar».
A un ciert pont “Patrie” e tacâ a publicâ a pontadis la sô Cuintristorie dal Friûl, jessude in libri tal 1974, vot agns dopo de sô muart, là che nol è dificil capî che, cence tantis preocupazions storichis, l’autôr al sminuive la presince dai antics Romans in Friûl par sglonfâ chê dai Celts.
La difese dai poetis di Risultive lu puartà ancje a une rebecade di Pier Paolo Pasolini, sustât par un so scrit dal 1952. «La sua nota illustrativa è scritta, mi sembra, – i scriveve Pasolini suntune letare – per dir bene della Cantarutti in funzione del male che si poteva pensare di me».
Cu la Filologjiche i rapuarts di pre’ Bepo a jerin come suntune altalene, e la sô partecipazion sincere no mancjave di cualchi contrast, come cuant che al à vût criticât i “siors professôrs” de Societât che a fevelain par talian di culture furlane. Ma al à ancje diret cun onestât, dal 1961 fin ae muart, la riviste “Sot la Nape”.
Alfin, no va dismenteade la sô opare Lineamenti di grammatica friulana, publicade a Udin tal 1952, che no je stade tignude in bon cont cuant che si è decidût di dâ ae lenghe furlane une gnove grafie cu la poie de Regjon. E al è stât, o crôt, un mâl, parce che si podeve puartâ lis modifichis cence trascurâ une tradizion grafiche tacade cun Jacopo Pirona e comedade propit di pre’ Bepo.