Inte suaze dal incuintri In ricuart dal mestri Aldo, in colaborazion cul Comun e la Pro Loco di Migjee, si presente ancje il prin romanç di Egle Taverna, publicât de Societât Filologjiche Furlane inte golaine «Agâr».
A son storiis plenis di colôrs, che di dentri de pagjine blancje e nere a saltin tai voi intant che si lei; storiis che ancje cuant che a contin di fats lontans tal timp, di personaçs che magari si puedin smirâ in fotografiis in blanc e neri (o viradis a sepe) a pandin colôrs vivarôs e inmagants. Al è il câs di cheste storie, une conte a colôrs di une vicende in blanc e neri, là che il pinel colorât ur da vôs e fuarce ai sintiments e aes sensazions dai personaçs. Di une bande, lis “lidrîs”, la prime fuarce che e parone sui personaçs, un pont fer e sigûr, alc che al ten peâts ben par tiere; di chê altre bande lis “alis” par cjapâ il svol, par cressi e par lâ daûr dai mots dal cûr. No si pues meti lis alis e svolâ vie se no si àn lidrîs: vâl a dî che no si pues cori daûr dai siums se prin no si sa di dulà che si ven e cui che si è. Ma al è vêr ancje il incontrari: no si pues vê une vite complene se no si svole adalt e si reste fers tal propri jessi sigûr.
Egle Taverna e scrîf par talian e par furlan fin dai timps dal liceu, e à otignût plusôrs premis di poesie, finaliste e segnalade in diviers concors leteraris in Friûl ma ancje nazionâi. E je autore di poesiis e di contis che a tratin di tradizions, sintiments e ricuarts, cul intindiment di rindi omaç a la sô tiere dal Friûl di soreli jevât: Gurize, li che e je a stâ, Lucinîs, là che e à passât i agns de zoventût, Migjee, il paîs de sô infanzie, il flum Lusinç. Dopo da lis racueltis “La valîs dai siums” (2012) e “Claps dal Lusinç” (2016) cheste e je la volte di un romanç.