Cjârs Cunfradis e Amîs de Societât Filologjiche Furlane,
l’an ch’o vin a pene passât nol è stât un an facil; chest nusal ripetin ogni moment e lu
viodìn benon, par altri, ogni dì. In Friûl e in Italie, magari cussì no, o vivìn intune
situazion di grande precarietât, la crisi economiche e je fuarte, simpri di plui, la
disocupazion, massime chê dai zovins, e je une vore alte, lis prospetivis pal doman a
son malsiguris, il cuadri economic e sociâl al è pardabon complicât, par cualchi aspiet
dramatic. Il riflès di cheste situazion lu vin vivût ancje nô in Filologjiche: tal 2013,
come ch’o savês, o vin scugnût frontâ une riduzion drastiche dal finanziament
regjonâl ordenari, passant di 290-300.000 euros a 150.000, praticamentri la metât dal
an prime. Cheste riduzion drastiche nus à metûts intune situazion di grande dificoltât,
al è clâr, par vie che dome che lis spesis pes nestris struturis, prime di dut lis spesis
pal personâl (sîs dipendents cun contrat a timp indeterminât), ma ancje lis spesis pe
ristruturazion e pal funzionament di Palaç Mantica e naturalmentri pes dôs sedis di
Gurize e di Pordenon, di nestre proprietât, a rivin propit, plui o mancul, a chei
300.000 euros. Chel de Regjon nol è l’unic contribût ch’o vin, par furtune, ma al reste
però chel plui impuartant. Ce vuelial dî praticamentri, par nô, chest discors? Al vûl dî
ch’o vin di recuperâ finanziaments, cu lis nestris ativitâts, cui nestris progjets, cu la
vendite di libris, prodots e servizis, par rivâ a paiâ no dome lis spesis di chê
specifiche ativitât (un libri, prime di vendilu, o vin di stampâlu e stampâlu al coste),
ma ancje lis spesis gjenerâls, ch’a son altis. E cheste situazion, intun moment di crisi
economiche e sociâl, là che bêçs no’nd è, là che tancj di lôr a àn di fâ i conts par rivâ
ae fin dal mês, no je assolutamentri facil. O pues sigurâus ch’o vin fat
praticamentri i meracui, se o podìn presentâsi a cheste Assemblee ordenarie cui
risultâts economics in ordin.
La mê impression, in gjenerâl, e je che il livel di atenzion pe politiche culturâl, pe
politiche lenghistiche, pe valorizazion de storie, de tradizion e de identitât furlane al
ledi sbassantsi. Si sin confrontâts sul argoment in ocasion de cunvigne ch’o vin fate a
Gurize cui amîs dal Istitût sloven di ricercje di Triest, tal mês di Dicembar
Minorancis lenghistichis storichis in Italie. Buinis pratichis a confront te promozion
lenghistiche e culturâl. O vin di resisti, plui di un lu à dit, rispiet a une forme di
“riflùs” culturâl procurât da la crisi economiche, un riflùs ch’al met in discussion
ancje il ricognossiment dai dirits lenghistics de nestre comunitât, che cun fature o vin
finalmentri rivât a otignî: no podìn, in altris peraulis, gjoldi di une rendite positive
determinade da lis leçs di tutele, chês regjonâls e chê statâl, no podìn considerâ
“consolidâts” i livei di tutele, o vin di stâ simpri in vuaite e no vin di molâ lis
posizions. Vuê la “cuistion de lenghe” e je simpri mancul al ordin dal dì da lis
istituzions regjonâls e o vin un biel ripeti che l’autonomie speciâl le vin dome par vie
de presince des comunitâts lenghistichis, al è dut dibant: l’autonomie si tirile fûr
dome cuant che si pierdile o si riscje di pierdile, cuant che l’ultin treno si ferme a
Mestre, cuant che si discût, a Rome, di sierâ un Ufici scuelastic regjonâl e, par
combinazion, al è propit il nestri, cuant che nus puartin vie i documents antîcs e cun
chei la nestre memorie (il riferiment al è ai archivis di Stât di Pordenon e di Udin),
cuant ch’o sin i prins a rispietâ i nestris dovês e i ultins a domandâ il rispiet dai
nestris dirits. Ca si podarès discuti al infinît, in realtât, su valôrs tant che storie,
culture, identitât di un popul, lenghe, tradizions, ma ancje istruzion, formazion e
ricercje, intun moment ch’al samee che dut al sedi plui impuartant di chei valôrs chi,
parcè che lis prioritâts a son altris, a son simpri altris. No si trate di taiâ la sanitât o di
fâ di mancul di fâ la tierce corsie de autostrade, si trate di domandâ un livel minim di
atenzion par chestis cuestions, ch’al vûl dî un investiment plui consistent di chel
avilent 0,2% di risorsis che la nestre Regjon e met su la promozion de identitât
furlane tal so complès.
Provìn a cjalâ ancje fûr di cjase nestre. Chê altre dî, dome par fâ un esempli, o ai vût
pes mans l’ultin numar di “Gnovis pagjinis furlanis”, la riviste de clape culturâl
Union scritôrs furlans, un numar particolarmentri sclagnut, di pocjis pagjinis, une
riviste che dopo passe trente agns e varès di sierâ par mancjance di finanziaments;
une riviste di difusion modeste, magari, ma significative, impuartant pai contignûts,
simpri ben informade su la realtât leterarie furlane. E la Patrie dal Friûl, ancje chê,
ch’e à ridusût il numar di pagjinis e ch’e je tornade al blanc e neri. E Onde furlane,
ch’e passe di un tai di finanziament a chel altri. E l’Associazion teatrâl furlane, la
mari di dutis lis compagniis di teatri amatoriâl furlan, ch’e fâs une ativitât cussì
impuartant pe promozion de lenghe ancje tai piçui paîs. E la Deputazion di storie
patrie pal Friûl, e l’Academie di Udin di Siencis, Letaris e Arts, e l’Istitût pe storie
sociâl e religjose di Gurize, e l’Associazion La Basse pal studi de furlanetât tai
mandaments di Tisane e di Puart, e il Circul culturâl Menocchio… dutis istituzions e
associazions, ancje gloriosis (l’Academie di Udin e conte passe 400 agns di storie da
la fondazion, un secul la Deputazion di storie patrie), che si cjatin in dificoltât par
colpe de riduzion, in cualchi câs dal azerament, dai finanziaments regjonâi,
istituzions che di an in an no san se e trop ch’a rivaran a vê pal lôr funzionament,
dome par esisti.
La nestre prime preocupazion, di ducj nô, e je pe Societât Filologjiche, naturalmentri
(o sin chi par chel), par vie ch’o vin di impegnâsi par lâ indenant nô, cu lis nestris
iniziativis e ativitâts, ma jo mi domandi. L’ARLeF (l’Agjenzie regjonâl pe lenghe
furlane) no à risorsis par inviâ il plan di politiche lenghistiche e par fâ convenzions
cui sogjets acreditâts (ancje cun nô). Sino par chest plui siôrs o plui puars? La
Deputazion di storie patrie, l’Academie di Udin, l’Associazion teatrâl furlane, chês
altris istituzions ch’o ai nomenât cumò denant (ma la liste e je plui lungje): se no
rivin a fâ ativitât, a pro dal Friûl, sino plui siôrs o plui puars? L’Universitât dal Friûl,
ancje jê cul azerament dal contribût su la leç 15, che no pues ocupâsi de didatiche de
lenghe furlane tal cors di Formazion primarie (il cors di studi pai insegnants, il
discors al sarès lunc), che no pues formâ (ma soredut clamâ in servizi) studiôs e
ricercjadôrs che si ocupin di robis furlanis: sino plui siôrs o plui puars? E la
Biblioteche Civiche di Udin, altri ent cetant impuartant pe culture furlane,
ricognossût pe sô funzion cu la leç 15 e, di chest an, cul finanziament azerât: sino plui
siôrs o plui puars?
Jo o pensi che la Societât Filologjiche Furlane e sedi simpri di plui, ancje in cheste
situazion di dificoltât, salacor soredut in cheste situazion di dificoltât, pont di
riferiment centrâl pal nestri teritori e pe culture furlane – o cirarai di mutivâlu
presentant la liste des ativitâts ch’o vin fat e che si proponìn di fâ. Lu dimostre, o
pues dîlu, il rapuart strent ch’o vin cu lis istituzions regjonâls – i doi assessorâts ae
Culture, soredut, cul assessôr Gianni Torrenti, e ae Istruzion, cu l’assessore Loredana
Panariti; o pensi a lis istituzions statâls – il Ministeri pai Bens culturâi, ma ancje lis
sorintendincis regjonâls, ai bens archivistics, architetonics e artistics; o pensi a lis
associazions furlanis – la nestre partecipazion in Mittelfest, che propit vinars stât o
vin votât il gnûf Consei di aministrazion, là ch’o sin rapresentâts dal nestri Tesorîr
Carlo del Torre: a lui e al President, Federico Rossi (Fidrì dai Ros), ur augurìn bon
lavôr; la nestre partecipazion al Centri studi Pasolini di Cjasarse, là ch’o vin, tal
Comitât sientific, il nestri Segretari Pier Giorgio Sclippa; i nestris rapuarts cul
Ciavedàl di Cordenons, bandiere de furlanetât a soreli a mont, cul Ent Friûl tal Mont
e cun altris associazions che di agns o colaborìn (par esempli o vin la cunvigne anuâl
cul Centri studi di Prampero, l’Academie di Udin, l’Associazion des dimoris
storichis, la Deputazion di storie patrie e altris); i nestris progjets cul Istitût sloven di
ricercjis di Triest (SLORI) e lis nestris colaborazions cui fradis ladins des Dolomitis;
o pensi al grant progjet di rindi Palaç Mantica la vere Cjase de culture furlane, dant
acet a plui associazions culturâls, par condividi simpri di plui spazis fisics e ocasions
di colaborazion; o pensi ae imprese dal Atlant lenghistic talian, pensât e inmaneât culì
in Filologjiche dal nestri Ugo Pellis e altris benemerits de culture furlane (e ancje ta
chel comitât sientific o sin ben rapresentâts, cul prof. Frau); o pensi ae cressite de
nestre biblioteche sociâl, ch’e devente simpri plui pont di riferiment ancje par chei
ch’a desiderin lassâ in buinis mans memoriis e materiâi, libris e documents di interès
pal Friûl (l’ultin câs al è stât chel de donazion dal fonts Costantini di predicjis
furlanis, cun documents da la fin dal Sietcent ai prins dal Nufcent), ma di un pâr di
agns ancje impuartant Centri di documentazion pe scuele furlane (cun passe 750 titui
pe scuele e pe infanzie e cuntune schedadure, di Lucio Perès, di passe mil materiâi su
insegnament e promozion de lenghe); o pensi ai moments culturâi e di presince sul
teritori – e l’an passât a son stâts passe novante, un numar mai cussì impuartant – e o
podarès continuâ.
Nô o rapresentin pe nestre int, o soi cunvint, une sielte di cualitât, prime di dut, e lu
dimostrìn cul nestri lavôr; une sielte di continuitât, parcè ch’o vin une tradizion di
puartâ indenant e o vin une biele struture par fâlu; une sielte di cuantitât, parcè che
ancje il numar des iniziativis al è impuartant e nô o vivìn ogni dì pal rapuart cul
teritori; e une sielte di prospetive, parcè che chi o vin di pensâ ancje al doman dal
nestri Friûl, par tignî dongje une comunitât ch’e merete di vê un pont di riferiment
fuart, intun moment che, lu ai dit prime, simpri di mancul a son i sogjets ch’a puedin
ocupâsi de nestre identitât, tradizion, storie e lenghe. Par concludi il discors, us dîs
che nol è plui il timp di divisions – e cheste e je une nestre “specialitât”, o sin mestris,
nô furlans, a barufâ e a cuistionâ tra di nô – ma al è il timp de condivision, colaborant
cun dutis lis personis di “buine volontât” e, par furtune, a’nd è plui di ce che si pense.
Par chest o soi sigûr – ma chest il President Pelizzo a son agns che nusal à spiegât –
che la colaborazion no je nancje plui une sielte, ma une necessitât.
Prime di sierâ cheste Relazion morâl, il gno plui cordiâl ringraziament ur va a ducj
chei, istituzions e personis, ch’a àn metût a disposizion risorsis economichis e timp
par dânus une man ta chest 2013: la Regjon autonome (che in part o vin recuperât une
cuote di finanziament, cu l’ultime finanziarie, e che si spietìn altris risorsis cul
assestament di Jugn); la Fondazion CRUP, di Udin e Pordenon, che no dome nus
sosten pai nestris progjets, ma nus à judât une vore pe ristruturazion di cheste sede; la
Fondazion CARIGO, di Gurize, la Bancje popolâr di Cividât, il Credit cooperatîf di
Lucinìs Fare e Caprive e il Credit cooperatîf Friulovest, che nus àn judât par
publicazions e ativitâts. E dopo o ringrazii ducj chei, e a son tancj, ch’a àn dedicât e a
continuin a dedicâ il lôr timp e la lôr passion par fâ vivi e cressi le nestre Societât e,
cun jê, la cussience, l’identitât e i valôrs dal nestri popul. Un ringraziament particolâr,
alore, ai prins colaboradôrs de Societât: ai diretôrs e ai redatôrs des rivistis, ai
curadôrs des publicazions, ai mestris dai cors pratics, ai components des comissions,
dal Consei gjenerâl e dal Comitât diretîf, ai amîs dal Ufici di Presidence, e ai nestris
dipendents.
Graziis a ducj e bon lavôr!
Il President de Societât
Federico Vicario