A son lenghis ch’a son daûr a pierdi i lôr naturâi spazis di comunicazion, massime tes relazions personâls e di ogni dì, lenghis ch’a viodin un decrement dai locutôrs, di chei duncje che lis fevelin, lenghis che ur coventin intervents di politiche lenghistiche par difindilis e promovint l’ûs in ogni ocasion, formâl e no formâl.
E i intervents di politiche lenghistiche si concentrin, di simpri e a reson, tai setôrs de publiche aministrazion e de scuele, par favorî la trasmission de lenghe a lis gnovis gjenerazions, e cu la presince tai media. No a câs ancje l’Union europeane e à dât fûr disposizions ta cheste direzion.
Di agns e agns la nestre Societât Filologjiche Furlane si bat, cun altris istituzions e associazions regjonâls ch’a àn a cûr identitât e culture di chenti, parcè che la lenghe furlane e vedi un ricognossiment istituzionâl. Un moment significatîf lu vin vivût, cumò vincj agns, cu l’aprovazion de leç regjonâl n. 15 dal 1996, la prime leç organiche a pro de lenghe furlane; te scuele, ancje se cun fature, cualchi pas indenant o vin rivât a fâlu, ma tai media o sin ancjemò une vore indaûr, soredut tai setôrs de radiofonie e de television.
Lis emitentis privadis a ricevin de Regjon cualchi contribût, ancje se pôcs e sence continuitât, ma la cuistion fondamentâl e reste chê de RAI, ch’e varès di vê ancje la funzion di concessionari dal servizi public.
Par cheste reson o vin sintût, cun sodisfazion, di un document ch’al è stât firmât, no di tant, di dutis lis RSU (rapresentancis sindacâls unitariis) de RAI, ch’a fasin part di CGIL, SNATER, CISL, UIL, un document ch’al è stât mandât ai rapresentants pulitics dal Guvier, Regjon, Parlament e ancje RAI; ta chest document si lamentisi de mancjade rinovazion de Convenzion tra Presidence dal Consei dai Ministris – Dipartiment pe informazion e editorie – e la RAI su la programazion radiotelevisive realizade pes comunitâts culturâls e lenghistichis ch’a si cjatin tal Friûl-Vignesie Julie.
Si trate di une cuistion tecniche, magari, ma il document al sosten che la professionalitât dai operadôrs dal servizi public no pues esprimisi se no cuntun ricognossiment ch’al permet di mantignî la cuantitât di oris di trasmission e la cualitât dai contignûts. La preocupazion e je fuarte, par vie che la leç n. 89 dal 2014 e à declarât che tal Friûl-Vignesie Julie e sedi no dome une semplice sede de RAI, ma un centri di produzion decentrât pe promozion des culturis e des lenghis dal teritori. Cundiplui, un ordin dal dì presentât de deputade Tamara Blažina ai 21 di Otubar dal 2015, ch’al impegnave il Guvier a dâ continuitât e a fâ cressi lis ativitâts leadis ae cussì clamade Convenzion, al è stât fat bon dal Guvier stes, te persone dal sotsegretari Giacomelli. Intun altri incuintri si à vût discutût de incressite de produzion culturâl e informative par talian, sloven e furlan, cuntune presince plui intense sul teritori, tant sul canâl televisîf, che cu l’ativazion di spazis in rêt. Il document des rapresentancis sindacâls unidis al ricuarde, ancjemò, che la Convenzion e je une condicio sine qua non par davuelzi une funzion primarie di servizi public, tai fats, un servizi ch’al sedi leât al detât costituzionâl di plene paritât, ancje lenghistiche, e al fâs apel a lis istituzions e a dutis lis fuarcis pulitichis e culturâls a dâsi sot in chel sens.
In cont di cheste situazion, la Societât Filologjiche Furlane e torne a marcâ il fat che la lenghe furlane no à vût, fin cumò, nissune significative presince tal servizi public, dal sigûr une vore plui basse rispiet a chê ch’e à vût, e justamentri, la lenghe slovene, ma ancje il todesc o il ladin dal Sud Tirol e il francês de Val d’Aoste. No vin mai vût nissun servizi di informazion, ch’al sarès fondamentâl, e i programs culturâi in lenghe furlane, par altri, a son dome par radio, no àn caratar di continuitât e a mancjin par stagjons interiis (par esempli d’Istât).
Si spietìn che la Convenzion, ch’o ai dit prime, e sedi confermade prime pussibil, par inserî il furlan cuntune struture di trasmissions radiofonichis e televisivis, te nestre regjon, come chê dal sloven. E sarès propit ore.