Lignan e Ernest Hemingway a son doi nons che a van vie insieme, di cuant che tal 1954 il Premi Nobel amerecan, tal viodi Lignan Pinede in costruzion, al à vût dit: «Ma cheste e je la Florida d’Italie!», un sproc che al à fat la fortune de citât di mâr nostrane. E je cheste la prime volte di Hemingway a Lignan, ma no in Friûl: tal Otubar dal 1948 il scritôr e la sô femine Mary Welsh a son in vacance a Cortine cuant che Hemingway, daûr a cirî di savê alc su la pescje des trutis, al ven mandât li di un nobil furlan espert de materie, il cont Federico Kechler. Tra i doi e nas une grande amicizie. Il cont lu puarte inte sô risierve, i da acet inte vile di famee a Cortine e i fâs cognossi, tra ducj, so fradi Alberto, clamât “Titi”, che al sarà tra i fondadôrs de Lignano Pineta Spa.
Ai 24 di Otubar dal 1948 Ernest e Mary a vegnin pe prime volte in Friûl, ospits di “Titi” te sô vile di Frofean, par une partide di cjace a gneurs e fasans. In Dicembar il scritôr al è a San Martin di Codroip, inte vile dal tierç dai fradis Kechler, Carlo, par passâ une zornade di cjace aes pernîs: in viaç par San Gaetan, dopo une gulizion inte vile di “Titi” a Frofean, Hemingway e Kechler a rivin a Tisane, su la crosere tra lis stradis a vuê clamadis vie Marconi e vie Egregis Gaspari, là che Carlo al veve invidât a vignî cun lôr la amie Adriana Ivancich, une nobile veneziane di disenûf agns che e veve cjase ancje inte vile di San Michêl dal Tiliment: Hemingway si inamorarà di jê e le fasarà deventâ Renata intal romanç Di là dal fiume e tra gli alberi. La presince dal scritôr in Friûl – inte vile di Carlo Kechler a San Martin di Codroip – e je testemoneade inmò une volte inte metât di Març dal 1949 e a Zenâr dal 1950, cuant che Ernest e Mary, tornâts a Vignesie, a son siei ospits par uns doi dîs. La ultime volte di Hemingway in Friûl (e in Italie) e je tal 1954. In Zenâr Ernest e Mary a son vîfs par meracul, dopo di un dopli incident aeri in Afriche: tra i tancj a van a cjatâ il scritôr, ferît e convalessent a Vignesie, un zovin Sergio Maldini – in chê volte gjornalist dal «Messaggero Veneto» e prossim vincidôr dal premi Campiello cun La casa a nord-est – e l’amì Federico Kechler, che lu invide inte vile di famee a Percût di Pavie par passâ culì cualchi zornade di polse.
Vinars ai 9 di Avrîl dal 1954 l’autist dai Kechler Adamo De Simon al compagne Ernest e Mary a Percût, ma prime si ferme fûr program a Udin: tal ristorant dal albierc "Friuli" di place XX Settembre, li che in chê volte si cjatavin artiscj e inteletuâi, a son uns dodis zovins che lu spietin par cognossilu; tra chei a son ancje personaçs che tai agns a deventaran innomenâts, come Carlo Scarsini, Piero e Loris Fortuna, Isi Benini e Gino Valle. Rivât a Percût, Hemingway al reste in polse, fûr che par une scjampade al Tor, testemoneade dal incuintri cun Gianfranco D’Aronco e Chino Ermacora. Ai 15 di Avrîl dal 1954 Ernest e Mary a lassin Percût: dopo vê gustât tal ristorant “La Bella Venezia” di Tisane, innomenât pai plats di salvadi e di pes prontâts de coghe Onelia Mondolo, Hemingway e i Kechler a rivin a Lignan Pinede, li che Federico al vûl fâi viodi al scritôr il cantîr de citât in costruzion. Par scrivi il Plan Regoladôr di Pinede, so fradi Alberto al veve clamât l’architet di Udin Marcello D’Olivo, che al deventarà un dai plui grancj rapresentants mondiâi dal “stîl organic”. Ve che, traviersade la pinede a forme di spirâl disegnade dal D’Olivo, a Hemingway i ven fûr di bocje il famôs sproc su «la Floride d’Italie». Alore Federico – cuntun colp teatrâl – i da in man la cjarte di Pinede e i domande di meti la firme suntun lot che la famee Kechler i dave par costruî la sô cjase furlane, che però no je mai stade fate sù. Hemingway ridint al firme la cjarte e, dopo di une cjaminade dilunc dal cantîr dal “Treno”, fat di buteghis bassis e apartaments vierts sui doi flancs de vie principâl di Pinede – al monte sù su la Lancia dai Kechler par tornâ a Vignesie.
Davide Lorigliola
«Messaggero Veneto», 18.08.2015