Cetantis musis vino di vê par podê gjavâse inte vite? Cetantis nus coventino par salvâsi de ruvine? Par podê lassâ la ferade di un alc?
Chest si domande il protagonist dal romanç “Silvie te Catedrâl di Taragone” di Gianluca Franco, Premi San Simon 2018, editât de Societât Filologjiche Furlane.
E chest al è ancje il teme de cjantade par vôs e orchestre “Maggio 1972”, che di chel romanç e je gjavade fûr.
Ai 31 di Mai dal 1972 une telefonade anonime e vise la centrâl operative dai carabinîrs di Gurize che intun lusiç te localitât di Petean e je postade une Cinccent cun doi bûs tal parebrîs. E je une vuate. Cuant che dôs volantis di Gardiscje a rivin sul puest l’auto al salte par aiar. A murin trê carabinîrs. E po dopo a saran altris carabinîrs a disviâ lis indagjins sul atentât par che i colpevui a restin scapui.
La vite di un trop di fantats di Caprive e je savoltade di chei fats, intun mont li che nol è plui nuie di sigûr, li che il ben e il mâl si misclicin e si confondin.
La cjantade e conte cheste storie, cu lis musichis di Fabio Rivolt e i tescj di Gianluca Franco, cu lis leturis da “Lis Tarlupulis” e cu la esecuzion musicâl dal “Ensemble d’Anjou”.