Codroip: Patrie de scuele furlane! Si jere capît ancjemò di cuant che, cence bisugne di leçs o di bants di finanziaments, chi un mestri, che dopo al sarès deventât Diretôr didatic e Dirigjent scolastics, al puartave in classe la marilenghe, savoltant une mentalitât inlidrisade dentri e fûr de scuele. A son cuasi dîs agns che chest mestri, diretôr e dirigjent al è lât in pension e ancjemò, dopo cuasi vincj agns di Leç 482/99, dopo cuasi cuatri agns di Plan Aplicatîf di Sisteme pal insegnament de lenghe furlane, al si domande cemût produsi il cambiament di mentalitât par rindi pardabon eficaç il furlan a scuele!
E nô chest lambic lu vin ereditât di Pierino Donada - si jere capît che si stave fevelant di lui! - e o cirìn di puartâlu indenant di trê agns incà cuntune zornade pensade pal mont dai insegnants di lenghe furlane: Marilenghe & Mariscuele. Un apontament che il mont da la scuele al spiete e al gradìs. Lu disin i numars dai docents che a partecipin rivant di dut il teritori di lenghe furlane. La formule da la iniziative e à trê ingredients: il prin al è il caratar operatîf da lis voris parcè che cheste zornade di formazion e à di jessi zovevule ai insegnant, puartant un vantaç reâl te ativitât didatiche a scuele. Il secont al è chel da la inovazion: di an in an si cîr di insiorâ il program puartant dutis lis gnovis vignudis fûr da la editorie, da lis diretivis ministeriâls, dai progjets da la nestre scuele e di chê dal panorame da lis lenghis di minorance europeanis. Il tierç ingredient al è chel da la rêt: lis colaborazions cun ents, associazions e esperts e je fondamentâl! Chest an l’iniziative e je pardabon cressude propit grazie a lis colaborazions e a la fiducie che in tancj a àn dimostrât viers chest progjet.
Marilenghe & Mariscuele . Tierce zornade de scuele furlane e ven fate dal Comun di Codroip cu la Societât Filologjiche Furlane e l’I.C. di Codroip, in colaborazion cui Comuns di Basilian e Bertiûl, cul I.C. di Basilian e Sedean, cul I.I.S. Linussio di Codroip, cu la poie de ARLeF, da la Provincie di Udin e da la BCC FriulOvestBanca, cul patrocini da la Regjon, dal Consei Regjonâl, dal Ufici Scolastic Regjonâl e da la Universitât dal Friûl.
L’apontament al è par sabide ai 9 di Avrîl, inte suaze da lis manifestazions da la Fieste de Patrie dal Friûl. Dopo da lis regjistrazions (tacant a lis 8.30) e i salûts dai sorestants, a lis 9.30 e tacarà la cunvigne Marilenghe presint e futûr moderade di Federico Vicario, president de Sff. Il prin intervent al sarà par cure dal Ufici Scolastic Regjonâl cun Paola Floreancig e Paola Cencini che a fevelaran di Insegnament de lenghe furlane: situazion corint e prospetivis. Dopo i tocjarà a Daniela Marrocchi, Dirigjente tecniche e referente pes lenghis minoritariis dal MIUR, cun Futuris azions par un ricognossiment des competencis linguistichis dai arlêfs, e a Rosalba Perini de Filologjiche, che e presentarà la publicazion Marilenghe te scuele, esempli di lezions CLIL pes Primariis.
Tor 11 – e cheste e je la grande novitât di chest an – a cjaparan la peraule i insegnants in prime persone, par resonâ su La scuele che o volìn. Ideis, propuestis e sfidis dai insegnants di furlan.
La polse par gustâ e sarà un vêr laboratori di cusine furlane cun cerce pe cure dal Istitût Linussio e si tignarà li dal Laboratori di enogastronomie dal Istitût Professionâl pe enogastronomie e pe ospitalitât alberghiere (ex asîl di Çupicje).
Par finî a saran i laboratoris, 6 in dut secont la etât di destinazion (scuelis de infanzie, primariis e secondariis di I grât), che si fasaran a Codroip, Basilian e Bertiûl: La lenghe: lezions CLIL pes primariis; Il lengaç dal cuarp: lis danzis tradizionâls, cun Lorena D’Agostini e Daria Miani; Il lengaç dal sun: il cjant didatic par furlan cun Arianna Plazzotta; Il lengaç dal colôr: zâl, vert e ros jenfri formis e colôrs cun Federica Pagnucco; Il lengaç de scriture: la “conte curte” cun Raffaele Serafini; Il lengaç de imagjine: il fumet, mieç ideâl par imparâ une lenghe cun Luca Malisan e il Gotem Studio.
La partecipazion e je libare e a gratis e la zornade e sarà ricognossude di esonerazion par inzornament secont il CCNL corint, cun consegne di un atestât. Par informazions e par segnâsi: sportel@comune.codroipo.ud.it.