Per la Festa del papà, una poesia di Maria Gioitti del Monaco (1890-1972).
Sopra, una famiglia friulana in un quadro di Otto D'Angelo (1923-2018).
MIÒ PARI
Miò pari l'è un bon on,
un fregul brontolòn,
un fregul testardùt
ma brâf, capàz in dut;
che, se 'l si sint in vene,
al sa tignî la pene
in man tant che il penèl,
il tràpano e il marcièl,
la splane, il plomp, la see,
la lime e la ronzee.
L'è propi straordinari:
l'à fat il funzionari
e l'ufizial, ma 'i plâs
savê par ogni câs
e intìndisi di dut.
Cussì, par so costrùt,
une dì al è cialiâr
domàn fari o zitâr,
po marangòn, pitôr,
stagnìn o muradôr…
l'à fat des invenzions
di vuadagnâ bezzòns…
ma no gi è lade une
mai drete. Eh, la fortune!…
Al rît pôc, nol fevele,
'i mancie la bardele
c'al pâr magari un ors…
Ma po, a tirâ in discòrs
o pulitiche o vuere,
la lenghe 'i scor lizere.
L'è stagno, ben plantât
e bulo pa so etât;
nol sint che si avizzine
– cui disie? – l’otantine.
L'è un on in dut spezzial,
pluitòst originàl,
di un ziart temperamènt
che, se àncie al è contènt,
al ten la muse dure
cui fioi… par fâi paure.
Nol laude su la muse,
e se alc no 'i va nol scuse.
– Vino fat ben papà? –
Al rugne un: - hem! Za, za… –
L'impire lis mustacis…
Tasìn, pro bono pacis!
Ma dopo, par daùr,
co ben al è sigùr
che noaltris no sintìn,
al dîs, cun chel tantìn
di borìe dai contènz:
– Mes fiis son portènz! –
Ma 'o sai che nie al mont
'i tòcie il cûr in font
tant che 'l capolavôr
che ài fat cun tant amôr.
E 'o crôt che Napoleon
nol vedi vût il ton,
mostrànt il Re di Rome
a l'assemblee, come
miò pari co pardùt
al mostre il miò frutùt:
– Chist ca, l'è miò nevôt,
un agnul, si lu viôt…
l'è il frut, po, di mé fie,
il fi da mé Marie! –