Ai 28 di Otubar, dì di San Simon, inte sale consiliâr dal Municipi di Codroip come par tradizion e je stade la cerimonie di premiazion dal premi leterari plui impuartant dal Friûl, il San Simon, dedicât a Agnul di Spere e rivât chest an a la edizion numar 43.
Lis categoriis di partecipazion a jerin dôs: romanç e conte a fumets.
Pe sezion dal romanç la jurie, a la unanimitât, e à assegnât il premi a la opare “Une storie sole” di Gianluca Franco. Une storie - si lei tal verbâl - centrade su dôs storiis, che a puartin il letôr a confrontâsi cuntune domande fondamentâl che e parten ae vite dal om: il probleme dal mâl. Il mâl naturâl, che nol à nissune cause prossime, ma che al somee scrit dentri de vite di ducj i vivents; il mâl al è chel che al derive dal arbitri dal om, e duncje al ven premeditât intun mût cussient e razionâl. L’epilic dal libri al mostre che la muart e la vite a son peadis tra di lôr; in mûts diferents, ducj i protagoniscj de storie a cjapin part a une conclusion che e previôt la salvece, come che l’autôr nus ricuarde cu la sentence finâl: «Cheste int, che ducj no san, e sta salvant il mont» (Jorge Luis Borges, "I juscj"). Pe jurie, l’implant naratîf al ven tignût in man dal autôr in mût salt e rigorôs e i profîi psicologjics dai personaçs no son dome delineâts in mût verisimil, ma ancje cun sensibilitât e profonditât.
Te stesse sezion, a son stadis segnaladis lis oparis “Lune rosse comanche” di Francesco Tami e “Zaraton” di Raffaele Serafini.
Pe sezion de conte a fumets, il premi al è lât a la opare “Friûl in tâl mont” di Lorenzo Marangone e Giulia Stirpe Te motivazion si lei: «Al ven fûr un gust pardabon plasevul pal colôr e pes formis. Imagjins e conte a vadin indenant in maniere coerente mostrant il grant impegn dai autôrs par puartâ insom une storie atuâl dulà che il malstâ sociâl dai timps di vuê al cjate une origjinâl vie di fughe: une soluzion che cualchi volte nus plasarès a ducj che si inveràs...».