A Sant Zorç di Noiâr, aes 20,30 di joibe 24 novembar cu ven, in colaborazion cu la Biblioteche di S.Zorç, al ven presentât il setim volum de golaine: Miti, Fiabe e Leggende del Friuli storico, editôr Chiandetti, dal titul Tiaris di Acuilee - gnove racolte.
La presentazion uficiâl e ven fate dal prof. Raimondo Strassoldo a Aquilee, vinars cu ven,17 di novembar, aes 20.30, inte Sale Conseâr). Tra altris relatôrs e sarà presinte Adriana Miceu, la curadore dal volum. Intant de serade a vegnarà lete cualchi fiabe, storiis e contis fantastichis che i informatôrs dai paîs de Basse Furlane a àn contât a vive vôs e che, il dut, si cjate testemoneât tal libri.
L'inventari des contis a son lis plui disparadis: a van des storiis di aganis e di orculis; di diaui e danâts; storiis di parencis; di lûcs, di glesiis e di meracui; di Atile, di tesaurs, bestiis stranis... e di tant altri. Chest volum al è il setim tassel di une grande golaine che l'Istitût A.Tellini, ae fin, al varà realizât in tantis lenghis e dialets (furlan, todesc, sloven e venit): une "enciclopedie" di contis cjapadis sù in dut il Friûl storic e formade di ben 17 volums.
Tiaris di Acuilee – gnove racolte al vegnarà presentât, daspò, in tantis altris bandis de Basse Furlane: Ruda, Sante Marie Le Lungje, Flumisel, Cervignan, Palme, Daêl.